• ເຄືອໄໝຫັດຖະກໍາ ສະເຫຼີມສະຫຼອງຄົບຮອບ 20 ປີ ພ້ອມຂຶ້ນຮ້ານໃໝ່

ໂດຍ: ສີເປື້ອນມື 05 ມີນາ 2020 (15.05 ນ.) Read : 374

ໃນວັນທີ 03 ມີນາ 2020 ຜ່ານມາ ໄດ້ມີການຈັດພິທີສະເຫຼີມສະຫຼອງຄົບຮອບ 20 ປີ ແລະຂຶ້ນຮ້ານໃໝ່ຫັດຖະກໍາເຄືອໄໝ ພ້ອມດ້ວຍຕ້ອນຮັບວັນແມ່ຍິງສາກົນ (ວັນທີ 08 ມີນາ 2020 ຄົບຮອບ 110 ປີ). ໂດຍການເປັນປະທານຂອງທ່ານ ນາງ ສົມສະຫວັນ ໄຊຍະວົງ ຜູ້ອໍານວຍການຮ້ານເຄືອໄໝຫັດຖະກໍາ ແລະໃຫ້ກຽດເຂົ້າຮ່ວມໃນພິທີດັ່ງກ່າວມີທ່ານ ຫານຊະນະ ສີສານ ປະທານສະມາຄົມຫັດຖະກໍາ, ທ່ານ ປ້າ ຈິນດາ ພົມມະສະຖິດ ທີ່ປຶກສາອາວຸໂສ ສະມາຄົມຫັດຖະກໍາລາວ ພ້ອມທັງບັນດາຄະນະທີ່ປຶກສາ, ຄະນະບໍລິຫານງານສະມາຄົມຫັດຖະກໍາລາວ ແລະແຂກທີ່ຖືກເຊີນ.

ຮ້ານເຄືອໄໝຫັດຖະກໍາ ສ້າງຕັ້ງຂຶ້ນໃນວັນທີ 08 ມີນາ 2000 ຈົນມາເຖິງປັດຈຸບັນ ຄົບຮອບ 20 ປີ ໂດຍເລີ່ມຈາກຄວາມມັກຮັກ ແລະຫຼົງສະເໜ່ໃນແຜ່ນແພລາວ ຈຶ່ງເກີດມີຄວາມຄິດຢາກສ້າງສັນຜະລິດຕະພັນທີ່ມາຈາກສີມືຂອງຄົນລາວ ຈຶ່ງເຮັດໃຫ້ເກີດມີຮ້ານເຄືອໄໝຫັດຖະກໍາແຫ່ງນີ້ຂຶ້ນ. ຈາກຈຸດເລີ່ມຕົ້ນເຫັນວ່າຜະລິດຕະພັນເລີ່ມເປັນທີ່ຮູ້ຈັກ ແລະເປັນທີ່ນິຍົມຊົມຊອບຈາກສັງຄົມຢ່າງກວ້າງຂວາງ ຈຶ່ງເຮັດໃຫ້ເຄືອໄໝຫັດຖະກໍາເປີດສາຂາທີ 2 ຂຶ້ນໃນປີ 2005 ທີ່ບ້ານ ວັດຈັນ ເມືອງ ຈັນທະບູລີ ນະຄອນຫຼວງວຽງຈັນ.

ຜະລິດຕະພັນຂອງເຄືອໄໝຫັດຖະກໍາ ແມ່ນໄດ້ນໍາເອົາຜ້າຝ້າຍລາວ, ໄໝລາວເຄື່ອງຜະລິດຕະພັນແຕ່ງກາຍ, ເຄື່ອງຕົກແຕ່ງເຮືອນ, ເຄື່ອງທີ່ລະນຶກ ແລະອື່ນໆ.

ເຄືອໄໝຫັດຖະກໍາ ແມ່ນໜຶ່ງໃນຈໍານວນ 125 ຫົວໜ່ວຍຫັດຖະກໍາ ທີ່ເປັນສະມາຊິກຂອງສະມາຄົມ ຫັດຖະກໍາລາວ ທີ່ໄດ້ເຄື່ອນໄຫວ ແລະປະກອບສ່ວນໃນວຽກງານຫັດຖະກໍາລາວໄດ້ດີຕະຫຼອດມາ ພາຍໃຕ້ການຊີ້ນໍາ-ນໍາພາຂອງສະມາຄົມ ຫັດຖະກໍາ ເຊັ່ນ: ການເຂົ້າຮ່ວມງານວາງສະແດງຢູ່ພາຍໃນ ແລະຕ່າງປະເທດ ພ້ອມທັງປະກອບສ່ວນຊ່ວຍເຫຼືອສັງຄົມຕ່າງໆ.

ເນື່ອງໃນໂອກາດຄົບຮອບ 20 ປີຂອງເຄືອໄໝຫັດຖະກໍາ ຈຶ່ງໄດ້ຈັດງານວາງສະແດງ ແລະສາທິດ ເຄື່ອງຫັດຖະກໍາລາວເປັນເວລາ 5 ມື້ ໃນລະຫວ່າງວັນທີ 03-07 ມີນາ 2020 ທີ່ບ້ານ ສີສະຫວາດ ເມືອງ ຈັນທະບູລີ ນະຄອນຫຼວງວຽງຈັນ.


ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ