• ກະຮູ້ຢູ່ ເພງໃໝ່ຂອງໜຸ່ມ ໂຊນ່ານ ແຈັກເກັດ ພ້ອມສັງກັດໃໝ່

ໂດຍ: ສີເປື້ອນມື 26 ກຸມພາ 2020 (14.45 ນ.) Read : 327

ພາຍຫຼັງທີ່ໄດ້ອອກເພງຄູ່ໄປໃນຕົ້ນປີ 2020 ເຊິ່ງກໍໄດ້ຮັບກະແສຕອບຮັບເປັນຢ່າງດີ ສໍາລັບຄົນທຸກເພດໄວ ແລະຫຼ້າສຸດກໍໄດ້ປ່ອຍເພງໃໝ່ອອກມາໃຫ້ໄດ້ຮັບຟັງກັນໄປເປັນທີ່ຮຽບຮ້ອຍແລ້ວ ມາຕາມຄໍາຮຽກຮ້ອງຕ້ອງການຂອງແຟນເພງທີ່ລໍຖ້າເພງດ່ຽວທີ່ມີເນື້ອຫາຊື້ງໆເອົາໃຈຄົນອົກຫັກໃນປີນີ້ ກັບໜຸ່ມ ໂຊນ່ານ ແຈັກເກັດ ມາພ້ອມດ້ວຍຜົນງານເພງທີ່ມີຊື່ວ່າ: ກະຮູ້ຢູ່ ແລະສັງກັດໃໝ່ ໂຕເອງ ສະຕູດິໂອ.

ກະຮູ້ຢູ່ ເປັນອີກຜົນງານເພງໜຶ່ງທີ່ໜຸ່ມ ໂຊນ່ານ ຕັ້ງໃຈເຮັດອອກມາ ບໍ່ວ່າຈະເປັນການແຕ່ງເນື້ອຮ້ອງ ແລະທໍານອງດ້ວຍຕົນເອງ ປະສານກັບສຽງດົນຕີແບບເສົ້າໆ ເຮັດໃຫ້ເພງດັ່ງກ່າວເຂົ້າກັນແບບລົງຕົວ ແລະໄດ້ອາລົມຄົນອົກຫັກແບບສຸດໆ ເຊິ່ງໃຊ້ເວລາໃນການຜະລິດເກືອບ 1 ປີເຕັມ (ການແຕ່ງເພງ, ທໍານອງ, ຮຽບຮຽງ, ຜະລິດດົນຕີ, ບັນທຶກສຽງ ແລະມິກສຽງ). ຖືວ່າຜົນງານເພງນີ້ ໄດ້ຕໍ່ຍອດຈາກເພງເກົ່າ ຄືເພງ ຄືວ່າເດະໃນປີຜ່ານມາ ມີເນື້ອຫາທີ່ຂ້ອນຂ້າງເຈັບປວດ ທັງທີ່ຮູ້ທັງຮູ້ວ່າເຂົາບໍ່ຮັກແຕ່ກໍຍັງຮັກເຂົາ ຮູ້ວ່າເຂົາມີໃໝ່ແຕ່ໃຈມັນກະຍັງຕັດບໍ່ຂາດ ບໍ່ຮູ້ວ່າເປັນຍ້ອນກໍາອັນໃດຈຶ່ງເຮັດໃຫ້ຮັກຄັ້ງນີ້ລືມບໍ່ລົງ ແລະຍັງຄົງຄິດຮອດແຕ່ຄົນເກົ່າ.

ກວ່າຈະມາເປັນຜົນງານເພງນີ້ ໄດ້ມີການຮວມຮວມເອົາບັນດາອາລົມ ແລະຄວາມຮູ້ສຶກຈາກຄົນອ້ອມຂ້າງ ໂດຍສະເພາະກໍແມ່ນໝູ່ເພື່ອນ ທີ່ມັກຈະພົບກັບຄວາມຮັກທີ່ບໍ່ຄ່ອຍຈະສົມຫວັງພໍປານໃດ ເຖິງແມ່ນວ່າຈະຮັກ ແລະທຸ້ມເທໃຫ້ເຂົາພຽງໃດ ສຸດທ້າຍກໍຍັງຖືກຖິ້ມ. ເຊື່ອວ່າເພງນີ້ອາດຈະຖືກກັບໃຜອີກຫຼາຍຄົນຢ່າງແນ່ນອນ ແລະໃນໄວໄວນີ້ຈະມີມິວສິກປະກອບເພງອອກມາໃຫ້ໄດ້ຮັບຊົມກັນຢ່າງແນ່ນອນ.

ສຸດທ້າຍກໍຂໍຝາກຜົນງານເພງໃໝ່ ກະຮູ້ຢູ່ ໄວ້ໃນອ້ອມເອິກອ້ອມໃຈຂອງແຟນເພງທຸກຄົນແນ່ເດີ ເປັນອີກເພງໜຶ່ງທີ່ຕັ້ງໃຈເຮັດຫຼາຍ ແລະຢ່າລືມຕິດຕາມຜົນງານການເຄື່ອນໄຫວຂອງສິລະປິນໄດ້ທີ່ ເຟສບຸກສ່ວນຕົວ: Sonarn Jacket Singer ພ້ອມດ້ວຍເພຈ ແລະຢູທູບຊ່ອງ Toeng Studio ຢ່າລືມກົດຕິດຕາມຊ່ອງເພື່ອທີ່ຈະບໍ່ໄດ້ພາດຮັບຊົມ ແລະຮັບຟັງເພງໃໝ່ຈາກພວກເຮົາ.




ທີ່ມາ:
  • ແທັກທີ່ກ່ຽວຂ້ອງ