• ອາຫານອັນຕະລາຍເຮັດໃຫ້ລູກໂງ່ ແລະພັດທະນາການຊ້າ

ໂດຍ: ແມວດຳ 29 ທັນວາ 2017 (04.07 ນ.) Read : 952

ອາຫານເປັນສິ່ງທີ່ສໍາຄັນສໍາລັບພັດທະນາການຂອງເດັກນ້ອຍ, ຖ້າຫາກກິນອາຫານທີ່ບໍ່ມີປະໂຫຍດ, ບໍ່ມີຄຸນຄ່າທາງສານອາຫານກໍອາດເຮັດໃຫ້ພັດທະນາການທາງສະໝອງ ແລະ ຮ່າງກາຍຂອງລູກຊ້າກວ່າປົກກະຕິ.

1. ເຂົ້າໜົມຫວານທີ່ມີປະລິມານນ້ຳຕານສູງ.
ນອກຈາກເຂົ້າໜົມທີ່ມີປະລິມານນ້ຳຕານສູງຈະເຮັດໃຫ້ເດັກນ້ອຍເປັນໂລກອ້ວນ, ນ້ຳໜັກຫຼາຍກວ່າເກນທີ່ກຳນົດແລ້ວ, ມັນຍັງມີສ່ວນທຳລາຍສະໝອງຂອງເດັກນຳອີກ, ເພາະວ່ານ້ຳຕານຟລຸກໂຕສທີ່ຢູ່ໃນເຂົ້າໜົມຫວານຈະສົ່ງຜົນຕໍ່ການຫຼັ່ງສານອິນຊູລິນເຮັດໃຫ້ສະໝອງປະມວນຜົນຜິດພາດ, ເຮັດວຽກໜ້ອຍລົງ ແລະ ສົ່ງຜົນເສຍຕໍ່ອາລົມ, ຄວາມຄິດຂອງເດັກນ້ອຍ.

2. ອາຫານຈານດ່ວນ.
ອາຫານຈານດ່ວນເປັນອາຫານທີ່ບໍ່ມີຄຸນຄ່າທາງໂພຊະນາການ, ເນື່ອງຈາກສານອາຫານທີ່ບໍ່ຄົບຖ້ວນ, ນອກຈາກນີ້ ຍັງມີສານກັນບູດ, ມີເກືອ ແລະ ໂຊດຽມຫຼາຍເກີນໄປ, ເຊິ່ງເປັນສາເຫດກໍ່ໃຫ້ເກີດໂລກອ້ວນ, ເບົາຫວານ, ຄວາມດັນເລືອດສູງ, ໝາກໄຂ່ຫຼັງອັກເສບ ແລະ ໂລກຫົວໃຈ, ສຳລັບເດັກນ້ອຍທີ່ຢູ່ໃນໄລຍະກໍາລັງຈະເລີນເຕີບໂຕຖ້າບໍລິໂພກອາຫານຈານດ່ວນຫຼາຍເກີນໄປຈະເຮັດໃຫ້ໄດ້ຮັບສານອາຫານທີ່ບໍ່ພຽງພໍເຊິ່ງຈະສົ່ງຜົນຕໍ່ການພັດທະນາຂອງສະໝອງ ແລະ ການຮຽນຮູ້ຂອງເດັກນ້ອຍໃນໄລຍະຍາວ.

3. ອາຫານແຊ່ແຂງ ແລະ ອາຫານເຄິ່ງສຳເລັດຮູບ.
ເປັນອາຫານທີ່ບໍ່ຄວນໃຫ້ເດັກນ້ອຍໃນໄວຮຽນກິນເປັນປະຈຳ, ເພາະອາຫານປະເພດນີ້ຕ້ອງໄດ້ຜ່ານຂະບວນການຕ່າງໆເພື່ອເຮັດໃຫ້ອາຫານຢູ່ໄດ້ເປັນເວລາດົນ, ເປັນຫານທີ່ສົ່ງຜົນກະທົບຕໍ່ລະບົບປະສາດສ່ວນກາງ ແລະ ຍັງເພີ່ມຄວາມສ່ຽງໃຫ້ແກ່ເດັກເມື່ອໃຫຍ່ຂຶ້ນອາດເຮັດໃຫ້ເປັນໂລກສະໝອງເສື່ອມໄດ້.

4. ໂປຕີນແປຮູບ
ໂປຕີນເປັນສານອາຫານທີ່ສຳຄັນສຳລັບຮ່າງກາຍຂອງມະນຸດທັງຜູ້ໃຫຍ່ ແລະ ເດັກນ້ອຍ. ແຕ່ໂປຕີນທີ່ດີຕ້ອງໄດ້ມາຈາກຊີ້ນສັດທີ່ມີຄຸນນະພາບ, ບໍ່ໄດ້ຮັບການແປຮູບມາກ່ອນ. ຖ້າຫາກໃຫ້ລູກກິນອາຫານແປຮູບເລື້ອຍໆຈົນສະສົມໃນຮ່າງກາຍກໍຈະສົ່ງຜົນກະທົບຕໍ່ລະບົບປະສານໃນການປະມວນຜົນຕ່າງໆເຮັດໃຫ້ການຮຽນຮູ້, ການຈື່ຈຳບໍ່ດີ. ໂປຕີນແປຮູບໄດ້ແກ່: ໄສ້ກອກ ແລະ ແຮມບາງຊະນິດ, ເປັນໂປຕີນແປຮູບທີ່ມີສ່ວນປະສົມຂອງສານເຄມີເຊັ່ນ: ສານກັນບູດ ແລະ ໂຊດຽມ. 

5. ຊາ ແລະ ກາເຟ.
ເປັນເຄື່ອງດື່ມທີ່ບໍ່ເໝາະສົມກັບເດັກນ້ອຍເພາະສານຄາເຟອິນໃນຊາ ແລະ ກາເຟຈະສົ່ງຜົນໃຫ້ປະສາດຕື່ນຕົວ, ນອນບໍ່ຫຼັບ ເຊິ່ງຈະສົ່ງຜົນກະທົບໂດຍກົງຕໍ່ພັດທະນາການທາງສະໝອງຂອງເດັກນ້ອຍພ້ອມທັງເປັນການຂັດຂວາງການດູດຊຶມທາດເຫຼັກໃນກະແສເລືອດເພື່ອສົ່ງອົກຊີແຊນໄປໃຫ້ສະໝອງນຳອີກ.

ເຖິງຢ່າງໃດກໍຕາມຄວາມສະຫຼາດຂອງລູກສ່ວນໜຶ່ງກໍມາຈາກການລ້ຽງດູຂອງພໍ່ແມ່ເປັນສິ່ງສຳຄັນ, ຢ່າຟ້າວຕັດສິນ ແລະ ໝົດຫວັງວ່າລູກຕົນເອງບໍ່ເກັ່ງ ແລະ ບໍ່ສະຫຼາດ, ຖ້າຫາກພໍ່ແມ່ເອົາໃຈໃສ່ເບິ່ງແຍງລູກດ້ວຍຄວາມຮັກ ແລະ ເອົາໃຈໃສ່ກໍຈະເປັນສ່ວນໜຶ່ງທີ່ເຮັດໃຫ້ລູກໄດ້ຮັບການພັດທະນາທາງດ້ານສະໝອງພ້ອມທັງມີຄວາມສະຫຼາດເພີ່ມຂຶ້ນ.



ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ