• ຊາວໜຸ່ມດອກໄມ້ແດງ ຮວມຕົວກັນຈັດງານຄອນເສີດຄັ້ງທໍາອິດ

ໂດຍ: ສີເປື້ອນມື 18 ກຸມພາ 2020 (23.46 ນ.) Read : 437

ຮ້ານອາຫານຂອບໃຈເດີ ຮ່ວມກັບ ບໍລິສັດ ອິນເຕີເວຍ ບໍລິຫານ ອະສັງຫາລິມະຊັບ ຈໍາກັດ ຈະໄດ້ຈັດງານຄອນເສີດຂອງວົງດົນຕີຊາວໜຸ່ມໃນຕໍານານ ດອກໄມ້ແດງ ຂຶ້ນ ເພື່ອເຜີຍແຜ່ສຽງເພງລາວຕົ້ນສະບັບຈາກຄົນຮຸ່ນເກົ່າ ໃຫ້ແກ່ຄົນຮຸ່ນໃໝ່ໄດ້ຮັບຮູ້ ແລະພ້ອມກັນອະນຸຮັກສຽງເພງເຫຼົ່ານີ້ໃຫ້ຄົງຢູ່ກັບສັງຄົມລາວຕະຫຼອດໄປ ແລະເພື່ອຫາລາຍໄດ້ສົມທົບທຶນຊ່ວຍເຫຼືອສິລະປິນຜູ້ອາວຸໂສ ພ້ອມທັງເປັນການເຕົ້າໂຮມວົງດົນຕີໃນຕໍານານ ຊາວໜຸ່ມດອກໄມ້ແດງ ທີ່ບໍ່ໄດ້ຖືກເຕົ້າໂຮມມາເປັນເວລາຫຼາຍກວ່າ 30 ປີ. ລາຍໄດ້ທັງໝົດ ນອກຈາກຫັກຄ່າໃຊ້ຈ່າຍທັງໝົດແລ້ວ ຈະມອບສົມທົບທຶນຊ່ວຍເຫຼືອສິລະປິນອາວຸໂສ ທີ່ໄດ້ສ້າງຊື່ສຽງໃຫ້ແກ່ວົງການເພງລາວ. ງານຖະແຫຼງຂ່າວໄດ້ຈັດຂຶ້ນໃນວັນທີ 18 ກຸມພາ 2020 ທີ່ຮ້ານອາຫານ ຂອບໃຈເດີ ນະຄອນຫຼວງວຽງຈັນ.

ງານການກຸສົນຂອງຕໍານານຊາວໜຸ່ມດອກໄມ້ແດງ ແມ່ນຈະຈັດຂຶ້ນເປັນເວລາ 8 ມື້ ນັບຕັ້ງແຕ່ວັນທີ 22-29 ກຸມພາ 2020 ເຊິ່ງແຕ່ລະວັນຈະເລີ່ມຕັ້ງແຕ່ເວລາ 17:00-21:00 ໂມງ ທີ່ຫາດສວນດອນຈັນ (ກົງກັນຂ້າມກັບຮ້ານອາຫານຊັນທາຣາແຄມຂອງ). ພາຍໃນງານຈະມີການຕົບແຕ່ງພາຍໃຕ້ບັນຍາກາດແບບຍ້ອນຍຸກ, ໃນໄລຍະເວລາ 7 ວັນ ທໍາອິດ (ວັນທີ 22-28 ກຸມພາ) ແມ່ນຈະຈັດເປັນຕະຫຼາດນັດຍ້ອນຍຸກ ພ້ອມທັງມີການເສບດົນຕີຄົບງັນແບບເບົາໆ ແລະສໍາລັບວັນທີ 29 ກຸມພາ 2020 ແມ່ນງານຄອນເສີດຂອງວົງດົນຕີຊາວໜຸ່ມດອກໄມ້ແດງ.

ງານສະແດງຄອນເສີດຈະເລີ່ມຕັ້ງແຕ່ເວລາ 18:30 ໂມງ ເປັນຕົ້ນໄປ ເຊິ່ງຈະມີການສະແດງຈາກສິລະປິນຮຸ່ນເກົ່າ ແລະຮຸ່ນໃໝ່ເຂົ້າຮ່ວມ ພ້ອມທັງສະແດງຜົນງານເພງດັງຂອງຊາວໜຸ່ມດອກໄມ້ແດງ ເຊັ່ນ: ຍາມແລງບ້ານເຮົາ, 4 ບຸກ,​ ເຮັດໃຫ້ສຸດຂຸດໃຫ້ເຖິງ, ສາວລາວຍຸກໃໝ່, ວຽງໃນຝັນ... ສໍາລັບການຈອງໂຕະແມ່ນລາຄາ 1 ລ້ານກີບ (ສໍາລັບ 8 ທ່ານ) ພ້ອມດ້ວຍອາຫານ 5 ຢ່າງ ແລະເຄື່ອງດື່ມ. ສອບຖາມ ຫຼືຈອງໂຕະໄດ້ທີ່ເບີ 020 2878 7779 ແລະ 020 2223 0672.




ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ