• ເຈົ້າແຂວງໄຊຍະບູລີ ຢ້ຽມຢາມອ້າຍນ້ອງທະຫານຊາຍແດນ

ໂດຍ: ສີເປື້ອນມື 13 ກຸມພາ 2020 (11.30 ນ.) Read : 252

ວັນທີ 12 ກຸມພາ 2020 ນີ້, ທ່ານ ພົງສະຫວັນ ສິດທະວົງ ປະທານປ້ອງກັນຊາດ-ປ້ອງກັນຄວາມສະຫງົບແຂວງ, ເຈົ້າແຂວງ ໄຊຍະບູລີ, ໄດ້ລົງຢ້ຽມຢາມພົບປະກັບອ້າຍນ້ອງທະຫານຊາຍແດນ ເຂດເມືອງ ບໍ່ແຕນ ເນື່ອງໃນໂອກາດສະເຫລີມສະຫລອງ ວັນສ້າງຕັ້ງກອງທັບປະຊາຊົນລາວ ຄົບຮອບ 71 ປີ ເພື່ອຖາມຂ່າວຄາວ, ຄວາມສຸກ-ທຸກ ແລະ ໃຫ້ກໍາລັງໃຈອ້າຍນ້ອງທະຫານ ຊາຍແດນແຕ່ລະຄົນ. ພ້ອມທັງໄດ້ຮຽກຮ້ອງໃຫ້ອ້າຍນ້ອງທະຫານແຕ່ລະສະຫາຍຈົ່ງເຊີດຊູທຸກກໍາລັງແຮງເຂົ້າໃນການປະຕິບັດໜ້າທີ່-ທີ່ຊາດໄດ້ມອບໝາຍໃຫ້ ກໍຄື ການຮັກສາຊາຍແດນ, ເຂດນໍ້າແດນດິນອັນຄົບຖ້ວນຂອງຊາດ ໂດຍສະເພາະແມ່ນເຂດນໍ້າແດນດິນຂອງແຂວງ ໄຊຍະບູລີ ໄວ້ໃຫ້ໝັ້ນຄົງ, ພ້ອມກັນອົດທົນຜ່ານຜ່າອຸປະສັກນາໆປະການ ເພື່ອເຮັດໜ້າທີ່ວິຊາສະເພາະໃຫ້ສໍາເລັດ.
ໃນໂອກາດດຽວກັນນີ້, ທ່ານ ພົງສະຫວັນ ສິດທະວົງ ຍັງໄດ້ນໍາເອົາເຄື່ອງອຸປະໂພກ-ບໍລິໂພກ ມອບໃຫ້ອ້າຍນ້ອງທະຫານທີ່ເຮັດໜ້າທີ່ປ້ອງກັນຊາຍແດນ, ຈາກນັ້ນ ກໍໄດ້ໄປຢ້ຽມຢາມ ແລະ ພົບປະກັບປະຊາຊົນ ບ້ານນໍ້າພຽງ ໂດຍທ່ານໄດ້ຮຽກຮ້ອງໃຫ້ອົງການປົກຄອງບ້ານສືບຕໍ່ຊື້ນໍາ-ນໍາພາປະຊາຊົນໃນການປູກພືດເປັນສິນຄ້າໃຫ້ຫລາຍ, ປູກໃນສະຖານທີ່-ທີ່ຂັ້ນເທິງໄດ້ຈັດສັນໃຫ້, ເອົາໃຈໃສ່ປົກປັກຮັກສາປ່າໄມ້, ຕ້ານ ແລະ ສະກັດກັ້ນໄຟປ່າ, ຮັກສາສຸຂະພາບ ພ້ອມທັງປ້ອງກັນ ແລະ ເຝົ້າລະວັງການແຜ່ລະບາດຂອງພະຍາດຄົນ ແລະ ສັດ ຕາມລະດູການ, ຮັກສາຄວາມສາມັກຄີໃຫ້ເປັນປືກແຜ່ນ, ສືກສາອົບຮົມລູກຫລານໃຫ້ຫ່າງໄກຈາກຢາເສບຕິດ ແລະ ເປັນເຈົ້າການໃນການປ້ອງກັນຊາຍແດນຮ່ວມກັບອ້າຍນ້ອງທະຫານຊາຍແດນໃຫ້ມີຄວາມສະຫງົບ ແລະ ອື່ນໆ.

ທີ່ມາ: ປະເທດລາວ Pathedlao
  • ຮູບພາບ

  • ແທັກທີ່ກ່ຽວຂ້ອງ