• ລາວ ໂທລະຄົມຈະທຸ້ມທຶນ 26,9 ລ້ານໂດລາ

ໂດຍ: ສີເປື້ອນມື 12 ກຸມພາ 2020 (16.37 ນ.) Read : 409

ໃນວັນທີ 11 ກຸມພາ 2020 ທາງບໍລິສັດ ລາວ ໂທລະຄົມມະນາຄົມ ມະຫາຊົນ ໄດ້ຈັດກອງປະຊຸມສະຫຼຸບຜົນງານການເຄື່ອນໄຫວວຽງານ ປະຈໍາປີ 2019 ຂຶ້ນ ຢ່າງເປັນທາງການ ທີ່ສໍານັກງານໃຫຍ່ ບໍລິສັດ ລາວ ໂທລະຄົມມະນາຄົມ ມະຫາຊົນ ນະຄອນຫຼວງວຽງຈັນ. ພາຍການເປັນປະທານຂອງທ່ານ ສຸພົນ ຈັນທະວີໄຊ ຜູ້ອໍານວຍການໃຫຍ່ ບໍລິສັດ ລາວ ໂທລະຄົມມະນາຄົມ ມະຫາຊົນ ແລະໃຫ້ກຽດເຂົ້າຮ່ວມໄດ້ແກ່: ທ່ານ ປອ. ທັນສະໄໝ ກົມມະສິດ ລັດຖະມົນຕີ ກະຊວງໄປສະນີ, ໂທລະຄົມມະນາຄົມ ແລະ ການສື່ສານ ແລະທ່ານ ປິຍະວັດ ຈະຣິຍະເສດຖະພົງ ຕາງໜ້າສາຂາຫຸ້ນຕ່າງປະທເ ທັງເປັນຮອງຜູ້ອໍານວຍການໃຫຍ່ ບໍລິສັດ ລາວ ໂທລະຄົມມະນາຄົມ ມະຫາຊົນ ພ້ອມດ້ວຍຕົວແທນ ລລທ ສູນກາງ ແລະສາຂາແຂວງທົ່ວປະເທດ.

ທ່ານ ສຸພົນ ຈັນທະວີໄຊ ໄດ້ຜ່ານບົດສະຫຼຸບຜົນງານການເຄື່ອນໄຫວວຽກງານດໍາເນີນທຸລະກິດ ໃນປີ 2019 ແລະທິດທາງແຜນການໃນປີ 2020 ເຊິ່ງໃນໜຶ່ງປີຜ່ານມາທີ່ ບໍລິສັດ ລາວ ໂທລະຄົມ ຍາດມາໄດ້ເປັນຕົ້ນແມ່ນ: ໄດ້ລົງທຶນຂະຫຍາຍຕາໜ່າງລະບົບໂທລະຄົມມະນາຄົມ ມູນຄ່າທັງໝົດ 25,93 ລ້ານ ໂດລາສະຫະລັດ. ປັດຈຸບັນ ລາວ ໂທລະຄົມ ມີສະຖານີມືຖືລະບົບ 2G, 3G, 4G ແລະ4.5G ທັງໝົດ ຈໍານວນ 7.436 ສະຖານີ; ໃນນີ້, ມີລະບົບ GSM 2G ຈໍານວນ 1.928 ສະຖານີ, 3G ຈໍານວນ 2.843 ສະຖານີ, 4G ຈໍານວນ 2.045 ສະຖານີ, 4.5G ຈໍານວນ 620 ສະຖານີ, IP Core/IP RAN 1.343 ແລະ FTTH ຈໍານວນ 66.294 Port ກວມ 47% ຂອງຫຼັງຄາເຮືອນໃນເຂດເທດສະບານ. ມີສັນຍານໂທລະສັບມືຖືຄວບຄຸມໄດ້ທົ່ວປະເທດ, ກວມປະຊາກອນ 80%; ໃນນັ້ນ ລະບົບ4G ກວມ 58%.

ທັງໝົດເຫຼົ່ານັ້ນ ມັນໄດ້ກາຍເປັນປັດໃຈຫຼັກທີ່ຊຸກຍູ້ໃຫ້ ລາວ ໂທລະຄົມ ສາມາດຂະຫຍາຍລູກຄ້າໃໝ່ ແລະຮັກສາຈໍານວນລູກຄ້າເກົ່າໄວ້ໄດ້. ມາເຖິງປັດຈຸບັນມີຜູ້ຊົມໃຊ້ໂທລະສັບມືຖືໃນລະບົບ ຈໍານວນ 1.4 ລ້ານເລກໝາຍ, ໂທລະສັບຕັ້ງໂຕະ 33.000 ເລກໝາຍ,​ ໂທລະສັບວິນໂຟນ 304 ພັນເລກໝາຍ ແລະອິນເຕີເນັດ 1.3 ລ້ານລູກຄ້າ. ເຮັດໃຫ້ປີຜ່ານມາສາມາດສ້າງລາຍຮັບໄດ້ທັງໝົດ 1.702,5 ຕື້ກີບ (ລວມອາກອນ), ໃນນັ້ນ, ມີກໍາລັງ 177,5 ຕື້ກີບ ແລະສາມາດປະຕິບັດພັນທະໃຫ້ລັດຖະບານໄດ້ທັງໝົດ ຈໍານວນ 471,1 ຕື້ກີບ ເຊິ່ງກວມເອົາອັດຕາສ່ວນ 27,6% ຂອງລາຍຮັບທີ່ ລາວ ໂທລະຄົມ ປະຕິບັດໄດ້ໃນປີ 2019. ນອກນັ້ນ, ຍັງໄດ້ປັບປຸງລະບຽບ, ນະໂຍບາຍສະຫວັດດີການສັງຄົມຕ່າງໆ ເພື່ອຍົກສູງລະດັບຊີວິດການເປັນຢູ່ຂອງພະນັກງານໃຫ້ດີຂຶ້ນເລື້ອຍໆ. ຄຽງຄູ່ກັບການດໍາເນີນທຸລະກິດ ຍັງໄດ້ປະກອບສ່ວນຊ່ວຍເຫຼືອ ແລະໃຫ້ການອຸປະຖໍາຕໍ່ອົງການຈັດຕັ້ງພັກ-ລັດ ແລະສັງຄົມ ເປັນມູນຄ່າ 2,1 ຕື້ກວ່າກີບ. ໃນນັ້ນ, ອັນພົ້ນເດັ່ນໄດ້ຊຸກຍູ້ງານສະເຫຼີມສະຫຼອງວັນສ້າງຕັ້ງກອງທັບ ຄົບຮອບ 70 ປີ ໃນມູນຄ່າ 700 ລ້ານກີບ.

ສໍາລັບແຜນການໃນປີ 2020 ນີ້, ລາວ ໂທລະຄົມ ຈະສູ້ຊົນໃຫ້ໄດ້ຖານລູກຄ້າໃໝ່ໃຫ້ເພີ່ມຂຶ້ນ 97.934 ເລກໝາຍ ແລະສ້າງລາຍຮັບໃຫ້ໄດ້ທັງໝົດ 1.804,9 ຕື້ກີບ (ລວມອາກອນ) ທຽບໃສ່ປີ 2019 ເພີ່ມຂຶ້ນ 6,3%, ຄາດຄະເນກໍາໄລໃຫ້ໄດ້ 371,3 ຕື້ກີບ ເພີ່ມຂຶ້ນ 33,5% ແລະຄາດວ່າຈະສາມາດປະຕິບັດພັນທະໃຫ້ລັດຖະບານ ຈໍານວນ 507,4 ຕື້ກີບ. ນອກນັ້ນ, ຍັງຈະລົງທຶນ 26,9 ລ້ານໂດລາສະຫະລັດ ເພື່ອສືບຕໍ່ປັບປຸງ ແລະຂະຫຍາຍເຄືອຂ່າຍການໃຫ້ບໍລິການດ້ານໂທລະຄົມມະນາຄົມ ໂດຍສະເພາະແມ່ນ Mobile Broadband and Fixed Broadband ໃຫ້ຮັບປະກັນທາງດ້ານປະລິມານ ແລະຄຸນນະພາບ, ຂໍ້ມູນມີຄວາມປອດໄພ ແລະເປັນລະບົບທັນສະໄໝ ເພື່ອຮັບປະກັນໃຫ້ແກ່ການບໍລິການສັງຄົມ ທັງໝົດນີ້ກໍເພື່ອໃຫ້ບັນລຸຕາມແຜນຍຸດທະສາດ ແລະວິໄສທັດກ້າວໄປສູ່ຍຸກ Lao Digital Life.


ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ