• ທົ່ງມີໄຊ ດຳເນີນກອງປະຊຸມໃຫຍ່ ອົງຄະນະພັກເມືອງ ຄັ້ງທີ IV

ໂດຍ: ສີເປື້ອນມື 10 ກຸມພາ 2020 (15.13 ນ.) Read : 309

ກອງປະຊຸມໃຫຍ່ຄັ້ງທີ IV ຂອງອົງຄະນະພັກ ເມືອງທົ່ງມີໄຊ, ແຂວງໄຊຍະບູລີ ໄດ້ໄຂຂຶ້ນຢ່າງເປັນທາງການ ໃນວັນທີ 10 ກຸມພາ 2020 ພາຍໃຕ້ການເປັນປະທານຂອງ ສະຫາຍ ສົມພອນ ໄຊດວງຕາ ກໍາມະການພັກແຂວງ, ເລຂາພັກເມືອງ, ເຈົ້າເມືອງທົ່ງມີໄຊ ໂດຍມີ ສະຫາຍ ພົງສະຫວັນ ສິດທະວົງ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງໄຊຍະບູລີ, ມີຄະນະປະຈຳພັກແຂວງ, ປະທານສະພາປະຊາຊົນແຂວງ, ກໍາມະການພັກແຂວງ, ຄະນະປະຈຳພັກເມືອງ, ແລະ ພາກສ່ວນກ່ຽວຂ້ອງເມືອງອ້ອມຂ້າງ ເຂົ້າຮ່ວມ 100 ກວ່າສະຫາຍ, ໃນນັ້ນມີຜູ້ແທນສົມບູນທີ່ມາຈາກຄະນະພັກຮາກຖານ ແລະ ໜ່ວຍພັກທົ່ວເມືອງ 73 ສະຫາຍ, ຍິງ 9 ສະຫາຍ, ທີ່ເປັນຕົວແທນໃຫ້ແກ່ສະມາຊິກພັກທັງໝົດ 714 ສະຫາຍ.
ໃນກອງປະຊຸມ ສະຫາຍ ສົມພອນ ໄຊດວງຕາ ໄດ້ທົບທວນ ແລະ ຕີລາຄາຄືນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ III ໂດຍຍົກໃຫ້ເຫັນຜົນສຳເລັດ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ຈາກການປະຕິບັດໜ້າວຽກງານຮອບດ້ານໄລຍະ 5 ປີຜ່ານມາ, ພ້ອມທັງໄດ້ກໍານົດທິດທາງ ແລະ ຄາດໝາຍສູ້ຊົນໃນຕໍ່ໜ້າ, ຈາກນັ້ນຜູ້ແທນກອງປະຊຸມຍັງຈະໄດ້ຄັດເລືອກເອົາຄະນະບໍລິຫານງານພັກເມືອງຊຸດໃໝ່, ພ້ອມທັງໄດ້ຮັບຟັງການປະກອບຄໍາຄິດຄໍາເຫັນຂອງບັນດາຫ້ອງການ, ກົມກອງ ແລະ ຕົວແບບດ້ານຕ່າງໆ.
ໃນໄລຍະ 5 ປີຜ່ານມາ ເສດຖະກິດ ເມືອງທົ່ງມີໄຊ ໄດ້ຮັບການຂະຫຍາຍຕົວຢ່າງຕໍ່ເນື່ອງ ໃນລະດັບ 8,84% ຕໍ່ປີ, ລວມຍອດຜະລິດຕະພັນພາຍໃນ ບັນລຸ 163,9 ຕື້ກີບ, ສະເລ່ຍລາຍຮັບຕໍ່ຫົວຄົນບັນລຸໄດ້ 17,13 ລ້ານກີບ ຫລື ເທົ່າກັບ 2.142 ໂດລາສະຫະລັດ, ສາມາດເກັບລາຍຮັບເຂົ້າງົບປະມານໄດ້ທັງໝົດ 7,62 ຕື້ກີບ, ພື້ນຖານໂຄງລ່າງໄດ້ຮັບການພັດທະນາເຊັ່ນ: ການກໍ່ສ້າງເສັ້ນທາງປູຢາງ, ປັບປຸງ ແລະ ສ້ອມແປງເສັ້ນທາງລະຫວ່າງບ້ານຕໍ່ບ້ານ, ປະຊາຊົນໄດ້ຊົມໃຊ້ໄຟຟ້າ 100%, ຊົມໃຊ້ນໍ້າປະປາ 53,8%, ການຜະລິດດ້ານກະສິກໍາ ໄດ້ມີຫລາຍປັດໄຈໃໝ່ເກີດຂຶ້ນ ແລະ ຂະຫຍາຍຕົວໄປຕາມທິດທີ່ທັນສະໄໝເທື່ອລະກ້າວ, ໄດ້ປັບປຸງຄຸນນະພາບການສຶກສາຂັ້ນພື້ນຖານໃຫ້ສູງຂຶ້ນ, ເດັກໃນເກນອາຍຸໄດ້ຮັບການເຂົ້າຮຽນຢ່າງທົ່ວເຖິງ, ຄອບຄົວທຸກຍາກ 11 ຄອບຄົວ, ກວມເອົາ 0,54% ຂອງຄອບຄົວທັງໝົດ.

ທີ່ມາ: ປະເທດລາວ Pathedlao
  • ຮູບພາບ

  • ແທັກທີ່ກ່ຽວຂ້ອງ