• Top Thai Brands 2020 ງານວາງສະແດງສຸດຍອດສິນຄ້າທີ່ມີຊື່ສຽງຂອງແບຣນໄທ

ໂດຍ: ສີເປື້ອນມື 31 ມັງກອນ 2020 (12.08 ນ.) Read : 783

ໃນຕອນເຊົ້າຂອງວັນທີ 31 ມັງກອນ 2020 ກົມສົ່ງເສີມການຄ້າລະຫວ່າງປະເທດ ກະຊວງພານິດ ແຫ່ງຣາຊະອານາຈັກໄທ ໂດຍສໍານັກງານສົ່ງເສີມການຄ້າໃນຕ່າງປະເທດ ໄດ້ຈັດພິທີຖະແຫຼງຂ່າວການຈັດງານສະແດງສິນຄ້າສຸດຍອດແບຣນໄທ “Top Thai Brands 2020” ພາຍໃຕຫົວຂໍ້ ໄທລາວຕໍ່ຍອດອະນາຄົດ ເປີດໂລກການຄ້າໄຮ້ພົມແດນ ເຊິ່ງຖືເປັນງານສະແດງສິນຄ້າທີ່ຍິ່ງໃຫຍ່ອີກງານໜຶ່ງໃນ ສປປ ລາວ ທີ່ຈະຈັດຂຶ້ນໃນລະຫວ່າງວັນທີ 04-08 ມີນາ 2020 ທີ່ຈະຈັດຂຶ້ນທີ່ສູນສະແດງສິນຄ້າ ລາວ-ໄອເຕັກ (ຕຶກເກົ່າ). ໃຫ້ກຽດເຂົ້າຮ່ວມໃນພິທີຖະແຫຼງຂ່າວມີ: ທ່ານ ນາງ ປະວິຕຣາ ມ່ວງສະກຸນ ທີ່ປຶກສາຝ່າຍການພານິດ ທີ່ນະຄອນຫຼວງວຽງຈັນ, ທ່ານ ຈັນສະໝອນ ສີສະອາດ ຮອງຫົວໜ້າກົມສົ່ງເສີມການຄ້າ ກະຊວງອຸດສາຫະກໍາ ແລະການຄ້າ, ທ່ານ ນາງ ຈັນທະຈອນ ວົງໄຊ ຮອງປະທານສະພາການຄ້າ ແລະ ອຸດສາຫະກໍາແຫ່ງຊາດ, ທ່ານ ຄົມປັນຍາ ເພັງວິໄນຍາ ປະທານບໍລິສັດ ຄົມປັນຍາເອັນເຕີເທຣນເມັ້ນ ຈໍາກັດ ແລະທ່ານ ນາງ ນິດຊາ ໃຈລັງກາ ເຈົ້າໜ້າທີ່ສູນພັດທະນາການຄ້າ ແລະທຸລະກິດໄທໃນອາຊຽນ ພ້ອມດ້ວຍແຂກທີ່ຖືກເຊີນ.

ຈຸດປະສົງຫຼັກຂອງການຈັດງານແມ່ນ ເພື່ອສົ່ງເສີມການຄ້າ ແລະການລົງທຶນຂອງສອງປະເທດ, ເພີ່ມມູນຄ່າການຄ້າລະຫວ່າງໄທກັບ ສປປ ລາວ, ເສີມສ້າງຄວາມເຊື່ອຖືໃຫ້ສິນຄ້າທີ່ມີຄຸນນະພາບໄດ້ມາດຕະຖານ ແລະມີເຄື່ອງໝາຍການຄ້າຂອງທັງສອງປະເທດ ໃຫ້ເປັນທີ່ນິຍົມ ແລະຍອມຮັບຂອງກຸ່ມຜູ້ບໍລິໂພກ ແລະກະຕຸ້ນໃຫ້ນັກທຸລະກິດທັງສອງປະເທດເກີດຄວາມຮ່ວມມືເຊິ່ງກັນ ແລະກັນ. ໃນປີນີ້ ໄດ້ຄັດເລືອກກຸ່ມທຸລະກິດຫຼາຍກວ່າ 230 ທຸລະກິດ ເຂົ້າຮ່ວມງານ ເຊິ່ງເນັ້ນໃນເລື່ອງຂອງສິນຄ້ານະວັດຕະກໍາ ຄວາມຄິດສ້າງສັນນະວັດຕະກໍາທາງການຄ້າ ແລະທຸລະກິດ ກຸ່ມສິນຄ້າປະເພດອາຫານ ແລະເຄື່ອງດື່ມ, ສຸຂະພາບ, ຄວາມງາມ, ເຄື່ອງໃຊ້ພາຍໃນເຮືອນ, ສິນຄ້າສໍາລັບເດັກນ້ອຍ, ເຄື່ອງໜັງ ແລະສິນຄ້າກະເສດ ລວມເຖິງສິນຄ້າ ODOP ຈາກພາຍໃນ ສປປ ລາວ. ຄາດວ່າຈະມີຜູ້ເຂົ້າຢ້ຽມຊົມງານທັງພາຍໃນ ແລະຕ່າງປະເທດ ປະມານບໍ່ຕໍ່າກວ່າ 50.000 ຄົນ.

ນອກຈາກນັ້ນ, ຍັງມີກິດຈະກໍາພິເສດ ບໍ່ວ່າຈະເປັນການສໍາມະນາຈາກຜູ້ປະກອບການຈາກໄທ ແລະລາວ, ກິດຈະກໍາພົບປະກັບຄົນທີ່ມີຊື່ສຽງຈາກປະເທດໄທ ພ້ອມດ້ວຍມິນິຄອນເສີດຈາກສິລະປິນທີ່ມີຊື່ສຽງ ເຊັ່ນ: ຕັກກະແຕນ ຊົນລະດາ, ລໍາເພີນ ວົງສະກອນ, ເຕີ້ຍ ອະພິວັດ,​ ອີສານ ພາສວບ ແລະສິລປິນລາວ ໄດ້ແກ່: ສິລິພອນ ຈາກຢູນາ ສະຕູດິໂອ ທີ່ຈະມາໃຫ້ຄວາມມ່ວນຊື່ນໃນງານ.

ສະນັ້ນ, ຈຶ່ງຂໍເຊີນຊວນນັກທຸລະກິດ ແລະຜູ້ທີ່ສົນໃຈເຂົ້າຢ້ຽມຊົມງານໄດ້ທຸກມື້ ຕັ້ງແຕ່ວັນທີ 04-08 ມີນາ 2020 ເລີ່ມແຕ່ເວລາ 10:00-21:00 ໂມງ ທີ່ສູນວາງສະແດງສິນຄ້າ ລາວ-ໄອເຕັກ (ຕຶກເກົ່າ) ນະຄອນຫຼວງວຽງຈັນ. ສາມາດສອບຖາມຂໍ້ມູນເພີ່ມຕື່ມໄດ້ທີ່ https:www.topthaibrandslaos.com ຫຼືເພຈເຟສບຸກ: Thai Trade Center Vientiane.


ທີ່ມາ:
  • ຮູບພາບ