• ທະນາຄານ ເອັສທີ ມອບລົດໃຫ້ກູ້ໄພ 5 ໜ່ວຍງານ

ໂດຍ: ສີເປື້ອນມື 21 ມັງກອນ 2020 (10.58 ນ.) Read : 965

ໃນວັນທີ 20 ມັງກອນ 2020 ຜ່ານມາ ທະນາຄານ ເອັສທີ ຈໍາກັດ ໄດ້ຈັດພິທີມອບລົດກູ້ໄພ ໃຫ້ກັບໜ່ວຍກູ້ໄພ ທີ່ສໍານັກງານໃຫຍ່ ທະນາຄານ ເອັສທີ ຈໍາກັດ ນະຄອນຫຼວງວຽງຈັນ. ໃຫ້ກຽດມອບໂດຍ: ທ່ານ ໄຊຍາ ໄຊສຸລິວົງ ຮອງປະທານສະພາບໍລິຫານ ທະນາຄານ ເອັສທີ ຈໍາກັດ ແລະກ່າວຮັບໂດຍ ທ່ານ ພົນຈັດຕະວາ ຄໍາຜາຍ ຈັນສີສະໝຸດ ປະທານທີ່ປຶກສາກິດຕິມະສັກ ສະມາຄົມອາສາກູ້ໄພນະຄອນຫຼວງວຽງຈັນ, ທ່ານ ສົມສະຫວັນ ຜາງນີວົງ ປະທານໜ່ວຍກູ້ໄພພັດທະນາຜາສຸກ, ທ່ານ ນາງ ສຸພາວັນ ປະຖໍາມະວົງ ປະທານມູນນິທິຊ່ວຍເຫຼືອງຄົນທຸກຍາກ, ທ່ານ ນາງ ສີສະຫຼຽວ ທໍາມະເທວາ ປະທານທີ່ປຶກສາມູນນິທິຊ່ວຍເຫຼືອຄົນທຸກຍາກ, ທ່ານ ສຸກສາຄອນ ສີພັນດອນ ວິຊາການພະແນກສຸກເສີນ ຄະນະຮັບຜິດຊອບໜ່ວຍກູ້ຊີບອົງການກາແດງລາວ ແລະພ້ອມແຂກເຂົ້າຮ່ວມ ໄດ້ແກ່ບັນດາຜູ້ບໍລິຫານ ທະນາຄານ ເອັສທີ ຈໍາກັດ ແລະທ່ານເຈົ້າເມືອງ 5 ຕົວເມືອງ.

ທະນາຄານ ເອັສທີ ຈໍາກັດ ໄດ້ເລັງເຫັນເຖິງຄວາມສໍາຄັນຂອງວຽກງານຊ່ວຍເຫຼືອສັງຄົມ ໂດຍບໍ່ຫວັງຜົນຕອບແທນ ໂດຍສະເພາະແມ່ນວຽກງານຂອງໜ່ວຍກູ້ໄພທີ່ໄດ້ຊ່ວຍເຫຼືອສັງຄົມມາໂດຍຕະຫຼອດ. ຈຸດປະສົງຂອງການມອບລົດສຸກເສີນໃນຄັ້ງນີ້ ກໍແມ່ນເພື່ອເປັນການອໍານວຍຄວາມສະດວກ ແລະນໍາໃຊ້ສົ່ງຄົນເຈັບໃຫ້ທັນເວລາ ທາງທະນາຄານ ເອັສທີ ຈໍາກັດ ໂດຍສະເພາະແມ່ນທ່ານ ສີທັດ ໄຊສຸລິວົງ ປະທານສະພາບໍລິຫານ ທະນາຄານ ເອັສທີ ຈໍາກັດ ເລັງເຫັນຄວາມສໍາຄັນໃນວຽກງານດັ່ງກ່າວ ຈຶ່ງໄດ້ນໍາເອົາທຶນສ່ວນຕົວຈໍານວນໜຶ່ງ ພ້ອມດ້ວຍບັນດາບໍລິສັດໃນເຄືອ ເອັສທີ ກຣຸບ ພ້ອມດ້ວຍລູກຄ້າຂອງທະນາຄານ ເອັສທີ ຮ່ວມໃຈສົມທົບທຶນ ແລະນໍາມາມອບໃຫ້ກູ້ໄພ 5 ໜ່ວຍງານ.

ສໍາລັບພິທີການມອບ-ຮັບລົດກູ້ໄພໃນຄັ້ງນີ້ ທະນາຄານ ເອັສທີ ຈໍາກັດ ໄດ້ມອບລົດຕູ້ ຮຸ່ນ H1 AT4X2 ຈໍານວນ 5 ຄັນ ໃຫ້ກັບກູ້ໄພ 5 ໜ່ວຍງານ ໄດ້ແກ່:​ ສະມາຄົມອາສາກູ້ໄພ ນະຄອນຫຼວງວຽງຈັນ (1624), ມູນນິທິຊ່ວຍເຫຼືອງຄົນທຸກຍາກ (1623), ໜ່ວຍກູ້ຊີບອົງການກາແດງລາວ ສູນກາງ (1625), ມູນນິທິຮ່ວມໃຈ ຊ່ວຍເຫຼືອຜູ້ປະສົບໄພ ນະຄອນຫຼວງ (1630) ແລະໜ່ວຍກູ້ໄພ ພັດທະນາຜາສຸກ. ນອກຈາກນັ້ນ, ຍັງໄດ້ມອບເງິນຊ່ວຍເຫຼືອພາກສ່ວນຕ່າງໆຕື່ມອີກ ໜ່ວຍງານລະ 5 ລ້ານກີບ ລວມມູນຄ່າການຊ່ວຍເຫຼືອໃນຄັ້ງນີ້ ຈໍານວນ 1.620.000.000 ກີບ.


ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ