• ຂົວຂ້າມນ້ຳຊ່ອງວັງວຽງ ເປີດໃຊ້ບໍລິການໂດຍບໍ່ເສຍຄ່າ

ໂດຍ: ສີເປື້ອນມື 17 ມັງກອນ 2020 (11.54 ນ.) Read : 440

ເມື່ອເວົ້າເຖິງສິ່ງອຳນວຍຄວາມສະດວກ ໃຫ້ແກ່ນັກທ່ອງທ່ຽວ ແລະ ປະຊາຊົນ ຊາວເມືອງວັງວຽງ ເວລາຂ້າມນໍ້າຊ່ອງ ເພື່ອໄປທ່ອງທ່ຽວ ຫລື ຂົ່ນສົ່ງຜົນຜະລິດຢູ່ອີກຝາກ ຂອງເມືອງວັງວຽງ, ເຊິ່ງມີແຫລ່ງທ່ອງທ່ຽວທຳມະຊາດຫລາຍບ່ອນ ເຊັ່ນ: ຖ້ຳປູຄຳ, ຖ້ຳອ່າງຫລວງ ແລະ ຖໍ້າຊ້າງ, ໃນເມື່ອກ່ອນເຫັນວ່າມີຄວາມຫຍຸ້ງຍາກຫລາຍ, ຕ້ອງໄດ້ຈ່າຍເງິນຄ່າຂ້າມຂົວທຸກຄັ້ງ, ລົດຂ້າມໄປມາໄດ້ເທື່ອລະຄັນໃຊ້ເວລາລໍຖ້າກັນພໍສົມຄວນ ແລະ ເຮັດໃຫ້ເກີດມີຄວາມແອອັດ ລົດຕິດເປັນແຖວຍາວ ໃນເວລານັກທ່ອງທ່ຽວມາທ່ອງທ່ຽວຫລາຍ.
ທ່ານ ບຸນຈັນ ມາລາວົງ ຮັກສາການເຈົ້າເມືອງໆວັງວຽງ, ໄດ້ແຈ້ງໃຫ້ນັກຂ່າວສຳນັກຂ່າວສານປະເທດລາວ ເມື່ອບໍ່ນານມານີ້ວ່າ: ໃນເມື່ອກ່ອນເມືອງວັງວຽງ ມີຂົວຂ້າມພຽງແຫ່ງດຽວ ແລະ ກໍພົບຄວາມຍຸ້ງຍາກຫລາຍຢ່າງ.
ສະນັ້ນ, ທາງການນຳຂັ້ນສູນກາງ ໂດຍສະເພາະ ທ່ານນາຍົກລັດຖະມົນຕີ ແລະ ຮອງນາຍົກ ໄດ້ລົງມາຢ້ຽມຢາມ ແລະ ພວກເຮົາກໍໄດ້ລາຍງານສະພາບຕົວຈິງ ໃຫ້ທ່ານນາຍົກ ແລະ ຮອງນາຍົກໄດ້ຮັບຊາບ. ຫລັງຈາກນັ້ນ, ເພີ່ນກໍ່ໄດ້ຊີ້ນຳ ກະຊວງໂຍທາທິການ ແລະ ຂົນສົ່ງ, ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ຕົກລົງກໍ່ສ້າງຂົວຂ້າມນ້ຳຊ່ອງແຫ່ງໃໝ່ ຢູ່ໃກ້ກັບຕະ ຫລາດເມືອງວັງວຽງ, ໂດຍໃຊ້ງົບປະມານໃນການກໍ່ສ້າງ 7 ຕື້ກວ່າກີບ, ມາຮອດປັດຈຸບັນ ການກໍ່ສ້າງຂົວດັ່ງກ່າວແມ່ນສຳເລັດ ແລະ ໄດ້ເປີດນຳໃຊ້ໂດຍບໍ່ເສຍຄ່າ ນັບແຕ່ເດືອນທັນວາ 2019 ເປັນຕົ້ນມາ, ສຳລັບເສັ້ນທາງຢູ່ ລະຫວ່າງ ຂົວຂ້າມໄປຫາເສັ້ນທາງແຫລ່ງທ່ອງທ່ຽວ ແມ່ນກຳລັງດໍາເນີນການກໍ່ສ້າງຢູ່ ເພາະເປັນທາງທີ່ໄດ້ບຸກເບີກໃໝ່ ແລະ ຕ້ອງໃຊ້ເວລາໃນການກໍ່ສ້າງພໍສົມຄວນ, ຈະໃຊ້ງົບປະມານໃນການກໍ່ສ້າງເສັ້ນທາງປະມານ 6,8 ຕື້ກີບ.

ທີ່ມາ: ປະເທດລາວ Pathedlao
  • ຮູບພາບ

  • ແທັກທີ່ກ່ຽວຂ້ອງ