• AGL ແລະ EMI ເຊັນສັນຍາຮ່ວມມືປະກັນໄພຊີວິດເງິນຝາກ

ໂດຍ: ສີເປື້ອນມື 16 ມັງກອນ 2020 (14.19 ນ.) Read : 374

ໃນວັນທີ 16 ມັງກອນ 2020 ຜ່ານມາ ບໍລິສັດ ອາລິອັນສ໌ ປະກັນໄພລາວ ໄດ້ຈັດພິທີເຊັນສັນຍາລະຫວ່າງ ບໍລິສັດ ປະກັນໄພລາວ (AGL)​ ແລະສະຖາບັນການເງິນຈຸລະພາກ ເອກພັດທະນາ (EMI). ຈຸດປະສົງ ແມ່ນເພື່ອຮ່ວມສະໜອງປະກັນໄພຊີວິດເງິນຝາກ ໃຫ້ກັບບັນດາລູກຄ້າທີ່ຝາກເງິນກັບສະຖາບັນ.​ ໂດຍການເປັນປະທານຂອງ ທ່ານ ກີ ອາໂປວີ ຜູ້ອໍານວຍການໃຫຍ່ ບໍລິສັດ ອາລີອັນສ໌ ປະກັນໄພລາວ ແລະທ່ານ ສົມພອນ ສີແສງລັດ ຜູ້ອຳນວຍການໃຫຍ່ ສະຖາບັນການເງິນຈຸລະພາກ ເອກພັດທະນາ,​ ມີແຂກຖືກເຊີນ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.​

AGL ແລະ EMI ໄດ້ມີການຮ່ວມມືສະໜອງປະກັນໄພມາແຕ່ປີ 2017,​ ເຊິ່ງການຮ່ວມມືຄັ້ງທຳອິດ ແມ່ນການພັດທະນາຜະລິດຕະພັນປະກັນຊີວິດສຳລັບເງິນກູ້ ໃຫ້ລູກຄ້າທີ່ມາກູ້ຢືມ,​ ທັງນີ້ ກໍເພື່ອຕອບສະໜອງຕາມຄວາມຕ້ອງການຂອງລູກຄ້າຫຼາກຫຼາຍກຸ່ມ ສະຖາບັນດັ່ງກ່າວຈຶ່ງໄດ້ຮ່ວມມືກັບ ບໍລິສັດ ອາລິອັນສ໌ ປະກັນໄພລາວ ແລະກຸ່ມບໍລິສັດ ອາລິອັນສ໌ ປະເທດເຢຍລະມັນ ເພື່ອສ້າງຜະລິດຕະພັນໃໝ່ໃນຊື່ "ປະກັນໄພຊີວິດເງິນຝາກ"​ ຂຶ້ນມາ.​

ປະກັນໄພຊີວິດເງິນຝາກ ແມ່ນປະກັນໄພທີ່ໃຫ້ຄວາມຄຸ້ມຄອງ ແລະທົດແທນຄືນໃນກໍລະນີຜູ້ທີ່ເຮັດປະກັນໄພເສຍຊີວິດຈາກການເຈັບປ່ວຍ ຫຼືອຸບັດເຫດ ເຊິ່ງສັນຍາປະກັນໄພເງິນຝາກນີ້ ຈະຖືກຕິດຂັດກັບທຸກບັນຊີເງິນຝາກທີ່ມີກັບສະຖາບັນການເງິນຈຸລະພາກ ເອກພັດທະນາ.​ ທັງນີ້ ກໍເປັນອີກໜຶ່ງຜົນປະໂຫຍດທີ່ທາງສະຖາບັນ ໄດ້ມອບໃຫ້ກັບບັນດາລູກຄ້າ ເຊິ່ງລູກຄ້າຈະບໍ່ໄດ້ເສຍຄ່າໃຊ້ຈ່າຍໃດໆ.​

ສ່ວນຜົນປະໂຫຍດຂອງລູກຄ້າທີ່ຈະໄດ້ຮັບ ປະກອບມີ 1. ຄຸ້ມຄອງຂີວິດ ແລະທົດແທນຄືນ 100% ຈາກການເສຍຊີວິດຍ້ອນພະຍາດ ແລະອຸບັດເຫດ 200% ຂອງວົງເງິນຄຸ້ມຄອງ. 2.  ວົງເງິນຄຸ້ມຄອງສູງສຸດ 10 ລ້ານກີບ ຫຼືອີງຕາມຈໍານວນເງິນໃນບັນຊີ. ​3. ຄຸ້ມຄອງນັບແຕ່ອາຍຸ 18-64 ປີໂດຍບໍ່ຕ້ອງກວດສຸຂະພາບ.​

 


ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ