• ແຂວງເຊກອງ ກະກຽມເປີດປີທ່ອງທ່ຽວ ມີຫລາຍກິດຈະກໍາທີ່ຫນ້າທ່ຽວຊົມ

ໂດຍ: Admin Mahason 13 ພະຈິກ 2017 (12.58 ນ.) Read : 612

ຕອນບ່າຍວັນທີ 10 ພະຈິກ 2017 ຜ່ານມານີ້ ທີ່ສະໂມສອນໃຫຍ່ຫ້ອງວ່າການປົກຄອງແຂວງເຊກອງ ໄດ້ມີພິທີຖະແຫລງຂ່າວກ່ຽວກັບການສະເຫລີມສະຫລອງປີທ່ອງທ່ຽວລາວ 2018 ທີ່ແຂວງເຊກອງໃຫ້ກຽດຖະແຫລງໂດຍທ່ານ ຖາວອນ ພົມມະໄລລຸນ ຮອງເຈົ້າແຂວງເຊກອງ ປະທານຄະນະກໍາມະການຈັດງານປີທ່ອງທ່ຽວລາວ 2018 ຂັ້ນແຂວງ, ມີບັນດາພາກສ່ວນອົງການຈັດຕັ້ງພັກ-ລັດ, ຫົວຫນ່ວຍທຸລະກິດເອກະຊົນ, ບັນດາອົງການຈັດຕັ້ງສາກົນ ແລະພາກສ່ວນທີ່ກ່ຽວຂ້ອງເຂົ້າຮ່ວມຮັບຟັງ. 

ທ່ານ ປະທານຄະນະກໍາມະການຈັດງານປີທ່ອງທ່ຽວລາວ 2018 ຂັ້ນແຂວງ ກ່າວວ່າ: ເພື່ອເປັນການສົ່ງເສີມໂຄສະນາເຜີຍແຜ່ ວັດທະນະທໍາ, ຮີດຄອງປະເພນີທີ່ເປັນເອກະລັກຂອງບັນດາເຜົ່າຊາວແຂວງເຊກອງ ກໍຄືທິວທັດທໍາມະຊາດທີ່ສວຍສົດງົດງາມ, ສົ່ງເສີມການອະນຸລັກແຫຼ່ງທ່ອງທ່ຽວທາງປະຫວັດສາດໃຫ້ມີຄວາມຄົງເດີມ ແລະໂດດເດັ່ນ ສາມາດດຶງດູດນັກທ່ອງທ່ຽວທັງພາຍໃນ ແລະຕ່າງປະເທດ ໃຫ້ເຂົ້າມາທ່ອງທ່ຽວແຂວງເຊກອງໃຫ້ນັບມື້ນັບຫລາຍຂຶ້ນ, ສະແດງເຖິງ ຄວາມພ້ອມໃນການຮອງຮັບໃຫ້ແກ່ນັກທ່ອງທ່ຽວທີ່ຈະເຂົ້າມາທ່ຽວຊົມແຂວງເຊກອງ, ມີຄວາມໜັ້ນໃຈເຊື່ອຖື ແລະ ໜ້າເພິ່ງພໍໃຈ ມາເຫັນແລ້ວ ຢາກມາອີກເທື່ອໃໝ່, ເພື່ອຕອບສະໜອງໃຫ້ແກ່ການເປີດປີທ່ອງທ່ຽວລາວ ປີ 2018 ຄະນະນໍາຂອງແຂວງເຊກອງ ໄດ້ກະກຽມຄວາມພ້ອມ ເພື່ອຮອງຮັບການເປີດງານດັ່ງກ່າວມີຜົນສໍາເລັດຫຼາຍດ້ານ, ໄດ້ຕົກລົງເຫັນດີເປັນເອກະພາບ ກໍານົດ ເອົາວັນທີ 31 ທັນວາ 2017 ນີ້ ເປັນວັນເປີດປີທ່ອງທ່ຽວຂອງແຂວງຂຶ້ນຢູ່ທີ່ເດີ່ນສວນເສົາຫຼັກເມືອງ ເຊິ່ງແມ່ນໄລຍະສະເຫລີມສະຫລອງບຸນປີໃຫມ່ສາກົນ, ງານສະເຫຼີມສະຫຼອງວັນຊາດທີ 2 ທັນວາ ແລະ ງານບຸນຊ່ວງເຮືອປະເພນີປະຈໍາປີຂອງເມືອງລະມາມ ແຂວງເຊກອງ ໂດຍຈະມີບັນດາກິດຈະກໍາຕ່າງໆທີ່ຫນ້າສົນໃຈ ແລະຫນ້າທ່ຽວຊົມ ຫຼາກຫຼາຍຢ່າງ ເປັນຕົ້ນ: ຈະມີການປະກວດສິລະປະວັນນະຄະດີຕ່າງໆ, ງານສະແດງສິລະປະວັນນະຄະດີພື້ນເມືອງຂອງບັນດາເຜົ່າໃນທົ່ວແຂວງ, ຈັດເທດສະການອາຫານຂອງບັນດາເຜົ່າ, ຈັດວາງສະແດງຜົນຜະລິດກະສິກໍາ-ຫັດຖະກໍາຂອງບັນດາເຜົ່າ, ການຈັດລາຍການຢ້ຽມຢາມແຫລ່ງທ່ອງທ່ຽວສໍາລັບສື່ມວນຊົນ ແລະຫົວຫນ່ວທຸລະກິດຜູ້ປະກອບການບໍລິການການທ່ອງທ່ຽວທັງພາຍໃນ, ຕ່າງແຂວງ ແລະຕ່າງປະເທດ. ພິເສດ, ການເປີດປີທ່ອງທ່ຽວລາວ ປີ 2018 ຂອງແຂວງເຊກອງ ແມ່ນຈະໄດ້ເປີດພ້ອມກັບງານບຸນປະເພນີປະຈໍາປີ ສວນເສົາຫລັກເມືອງ 10 ເຜົ່າ ຂອງແຂວງ, ໃນນີ້ ຈະມີຂະບວນກ້ອນກໍາລັງ 500 ( ແຮ່ຂັນໝາກເບັງ 100 ຂັນ, ຄ້ອງ 100 ໜ່ວຍ, ແຄນ 100 ດວງ, ກອງຫາງ 100 ອັນ ແລະກະບັ້ງ ຫຼືຂຸ່ຍ 100 ອັນ ), ນອກນີ້ ຍັງມີກິດຈະກໍາສະເຫຼີມສະຫຼອງສອງວັນປະຫວັດສາດລາວ-ຫວຽດນາມ, ງານວາງສະແດງຜະລິດຕະພັນສິນຄ້າ ແລະຮູບພາບທ່າແຮງການທ່ອງທ່ຽວຂອງແຂວງເຊກອງ, ຜະລິດຕະພັນການທ່ອງທ່ຽວ ແລະແຫຼ່ງທ່ອງທ່ຽວອັນທີ່ໂດດເດັ່ນຂອງຂອງແຂວງ ໂດຍສະເພາະແມ່ນແຫຼ່ງທ່ອງທ່ຽວປະຫວັດສາດ, ທໍາມະຊາດ ແລະວັດທະນະທໍາ ເຫຼົ່ານີ້ເປັນຕົ້ນ.

ໂອກາດນີ້, ທ່ານ ປະທານຄະນະກໍາມະການຈັດງານປີທ່ອງທ່ຽວລາວ 2018 ຂັ້ນແຂວງກໍໄດ້ຮຽກຮ້ອງມາຍັງພາກລັດ, ເອກະຊົນ, ຜູ້ປະກອບການທຸລະກິດ, ພະນັກງານລັດຖະກອນ, ສອງກໍາລັງປະກອບອາວຸດ ພ້ອມດ້ວຍປະຊາຊົນບັນດາເຜົ່າທຸກທົ່ວໜ້າ ຕະຫຼອດຮອດບັນດາອົງການຈັດຕັ້ງສາກົນຕ່າງໆ ຈົ່ງໃຫ້ການຮ່ວມມື, ຮ່ວມແຮງຮ່ວມໃຈກັນ ປະກອບສ່ວນເປັນເຈົ້າພາບທີ່ດີໃນການຈັດງານປີທ່ອງທ່ຽວລາວ 2018 ທີ່ແຂວງເຊກອງ ເພື່ອເຮັດໃຫ້ການຈັດງານຄັ້ງນີ້ ບັນລຸຕາມຈຸດປະສົງເປົ້າໝາຍທີ່ວາງໄວ້ ສາມາດດຶງດູດນັກທ່ອງທ່ຽວທັງພາຍໃນ ແລະຕ່າງປະເທດໃຫ້ເຂົ້າມາທ່ຽວຊົມແຂວງເຊກອງຂອງພວກເຮົາໃຫ້ນັບມື້ນັບເພີ່ມຂຶ້ນ.

ທີ່ມາ: ຂ່າວ-ພາບ: ນາລີວັນ
  • ຮູບພາບ

  • ແທັກທີ່ກ່ຽວຂ້ອງ