• “ເຂົ້າໃຈກັນແນ່” ເພງໃໝ່ຕົ້ນປີ 2020 ຂອງໜຸ່ມ ໂຊນ່ານ ແລະ ດາວໃສ

ໂດຍ: ສີເປື້ອນມື 14 ມັງກອນ 2020 (14.06 ນ.) Read : 406

ພາຍຫຼັງທີ່ໄດ້ຫ່າງຫາຍຈາກການປ່ອຍຜົນງານເພງໃໝ່ດົນສົມຄວນກັບສິລະປິນ ໂຊນ່ານ ແຈັກເກັດ ເຈົ້າຂອງຜົນງານຫຼາກຫຼາຍສຽງພຽງ ໃນຕົ້ນປີ 2020 ກັບມາພ້ອມກັບແນວເພງໃໝ່ທີ່ເອົາໃຈຄົນມັກກີລາບານເຕະໂດຍສະເພາະ ກັບຜົນງານເພງທີ່ມີຊື່ວ່າ: ເຂົ້າໃຈກັນແນ່ ຜົນງານເພງນີ້ ຖືວ່າເປັນສະໄຕລ໌ ແລະຮູບແບບໃໝ່ຂອງໜຸ່ມ ໂຊນ່ານ ແຈັກເກັດ ເນື່ອງຈາກຜ່ານມາໄດ້ປ່ອຍເປັນຜົນງານເພງ ລາວສະໄໝ ແລະລູກທົ່ງອິນດີ້ ແຕ່ສໍາລັບເພງນີ້ເປັນເພງລູກທົ່ງລາວແທ້ໆ ມາແບບຈັງຫວະລໍາວົງລາວ.

ຜົນງານເພງ ເຂົ້າໃຈກັນແນ່ ເປັນເພງໃໝ່ຕົ້ນປີ 2020 ອອກມາຕາມຄວາມຮຽກຮ້ອງຕ້ອງການຂອງສັງຄົມ ແລະເພື່ອເປັນການລອງແນວທາງໃໝ່ຂອງໜຸ່ມ ໂຊນ່ານ ເອງ. ເພງດັ່ງກ່າວ ໜຸ່ມ ໂຊນ່ານ ໄດ້ເປັນຄົນປະພັນ ແລະທໍານອງດ້ວຍຕົນເອງ ໂດຍມີແຮງບັນດານໃຈຈາກຄົນອ້ອມຂ້າງ. ເນື້ອຫາເພງເວົ້າເຖິງຜູ້ທີ່ມີຄອບຄົວ ຫຼືມີແຟນມັກເຕະບານຈົນບໍ່ມີເວລາໃຫ້ຄອບຄົວ ເພາະມັກເຕະບານເປັນຊີວິດຈິດໃຈ ເຊິ່ງເນື້ອຫາອາດຈະຖືກໃຈກັບໃຜຫຼາຍຄົນໃນຍຸກນີ້. ພິເສດ! ນອກຈາກນີ້, ຍັງໄດ້ນັກຮ້ອງສາວຈາກກອງສິລະປະກອນຂອງກອງທັບປະຊາຊົນລາວ ນັ້ນກໍຄື ດາວໃສ ແສງປະທິບ ມາຮ່ວມຮ້ອງເພງຄູ່ອີກດ້ວຍ ເຮັດໃຫ້ຜົນງານເພງດັ່ງກ່າວມີສະເໜ່ ແລະມີຄວາມໂດດເດັ່ນຫຼາຍຂຶ້ນ ຖືວ່າເປັນໄປຕາມຄອນເຊັບ ບ່າວນັກຂາວກັບສາວທະຫານ ເພາະໜຸ່ມ ໂຊນ່ານ ເອງກໍເປັນນັກຂ່າວຢູ່ສໍານັກຂ່າວແຫ່ງໜຶ່ງ ໃນນະຄອນຫຼວງວຽງຈັນ.

ປັດຈຸບັນ, ຜົນງານເພງດັ່ງກ່າວໄປຖືກປ່ອຍອອກອາກາດເປັນທີ່ຮຽບຮ້ອງແລ້ວທາງເພຈ ແລະຊ່ອງຢູທູບຂອງ Toeng Studio ເຊິ່ງເປັນຄ້າຍເພງນ້ອງໃຫມ່ທີ່ຫາກໍແຈ້ງເກີດໃນເມື່ອບໍ່ດົນມານີ້ ພ້ອມທັງສາມາດຮັບຟັງໄດ້ຕາມວິທະຍຸທຸກຄື້ນທົ່ວປະເທດ.

ສຸດທ້າຍກໍຂໍຝາກຜົນງານເພງ ເຂົ້າໃຈກັນແນ່ ຂອງໜຸ່ມ ໂຊນ່ານ ແຈັກເກັດ ແລະສາວ ດາວໃສ ແສງປະທິບ ໄວ້ໃນອ້ອມເອິກອ້ອມໃຈຂອງທຸກຄົນແນ່ເດີ ເພາະເປັນຜົນງານເພງທໍາອິດທີ່ທັງສອງຄົນຕັ້ງໃຈເຮັດແບບສຸດໆ ແລະຝາກຕິດຕາມມິວສິກວີດິໂອໃນໄວໆນີ້ ທາງເພຈ ແລະຊ່ອງຢູທູບຂອງ Toeng Studio.




ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ