• ວຽງຈັນສະຫວັນເມືອງລາວ ຜົນງານເພງໃໝ່ຂອງ “ພົງສະຫວັນ ໄຊຍະວົງສ໌”

ໂດຍ: ສີເປື້ອນມື 10 ມັງກອນ 2020 (11.13 ນ.) Read : 643

ພົງສະຫວັນ ໄຊຍະວົງສ໌ ເປັນສິລະປິນລາວທີ່ອາໄສຢູ່ຕ່າງປະເທດ ແລະເປັນອີກຜູ້ໜຶ່ງທີ່ມີໃຈມັກຮັກໃນເລື່ອງຂອງສຽງເພງ ເຖິງແມ່ນວ່າຈະໄປຢູ່ໄກບ້ານໄກເມືອງປານໃດກໍຕາມ ແຕ່ຫົວໃຈກໍຍັງບໍ່ລືມບ້ານເກີດ ແລະຍັງເລືອກທີ່ຈະສືບສານວັດທະນະທໍາຮີດຮອງປະເພນີອັນດີງາມຂອງລາວເຮົາຄົງໄວ້.

ສໍາລັບຜົນງານເພງທີ່ເຮັດໃຫ້ຄົນໃນສັງຄົມຮູ້ຈັກສິລະປິນຄົນນີ້ ໄດ້ແກ່ຜົນງານເພງ ລືມອ້າຍສາຫຼ້າຍ້ອນໄດ້ມີການຈັດກິດຈະກໍາການແຂ່ງຂັນຮ້ອງ Cover ເພື່ອຢາກຊ່ວຍເຫຼືອ ແລະສົ່ງເສີມໃຫ້ຜູ້ທີ່ມີໃຈມັກຮັກໃນດ້ານການຮ້ອງເພງ ແຕ່ບໍ່ມີໂອກາດ. ດັ່ງນັ້ນ, ທາງເຈົ້າຂອງຜົນງານເພງເພິ່ນຈຶ່ງໄດ້ຈັດກິດຈະກໍານີ້ຂຶ້ນ ເຊິ່ງກໍໄດ້ກະແສຕອບຮັບເປັນຢ່າງດີ, ມີຜູ້ເຂົ້າຮ່ວມແຂ່ງຂັນຫຼາຍສົມຄວນ ແລະໄດ້ຄັດເລືອກເອົາຜູ້ຊະນະເລີດ ຈໍານວນ 3 ຄົນ ແລ້ວໄດ້ສ້າງເພງໃຫ້ເຂົາເຈົ້າໄປແລ້ວຄົນລະ 1 ເພງ ເຊິ່ງແຕ່ລະເພງທີ່ໄດ້ສ້າງອອກໄປນັ້ນກໍຖືວ່າໄດ້ຮັບຄວາມນິຍົມຊົມຊອບຈາກຄົນໃນສັງຄົມເປັນຢ່າງດີ ເຮັດໃຫ້ພວກເຂົາກ້າວມາເປັນສິລະປິນຢ່າງເຕັມຕົວ.

ຫຼ້າສຸດທາງ ພົງສະຫວັນ ໄຊຍະວົງສ໌ ກໍໄດ້ປ່ອຍຜົນງານເພງໃໝ່ພ້ອມດ້ວຍມິວສິກວີດິໂອງາມໆອອກມາໃຫ້ມວນຊົນໄດ້ຮັບຊົມກັນໄປເປັນທີ່ຮຽບຮ້ອຍແລ້ວ ເຊິ່ງຜົນງານດັ່ງກ່າວມີຊື່ວ່າ: ວຽງຈັນສະຫວັນເມືອງລາວ ປະພັນໂດຍ: ອາຈານ ພອນສະຫວັນ ພັນທະວິຈິດ. ສໍາລັບແຮງບັນດານໃຈທີ່ຜະລິດຜົນງານດັ່ງກ່າວນີ້ກໍຍ້ອນວ່າຕົນເອງມີຄວາມມັກຮັກ ແລະຢາກອະນຸຮັກທໍານອງດົນຕີທີ່ເປັນຈັງຫວະລໍາວົງໄວ້ ເຊິ່ງຜົນງານເພງດັ່ງກ່າວກໍໄດ້ພັນລະນາເຖິງວັດທະນະທໍາລາວປະສານກັບທໍານອງເພງທີ່ມ່ວນອອນຊອນ, ແຫຼ່ງທ່ອງທ່ຽວທີ່ສວຍສົດງົດງາມໃນນະຄອນຫຼວງວຽງຈັນ ໃນນັ້ນກໍມີທັງພຣະທາດຫຼວງທີ່ເປັນສັນຍາລັກຂອງປະເທດລາວ ເພື່ອໃຫ້ຊາວໂລກໄດ້ຮັບຮູ້.

ສຸດທ້າຍນີ້ທາງສິລະປິນ ພົງສະຫວັນ ໄຊຍະວົງສ໌ ກໍຂໍຂອບໃຈມິດຮັກແຟນເພງທຸກຄົນໃນທົ່ວໂລກ ທີ່ໃຫ້ກໍາລັງໃຈ ແລະສະໜັບສະໜູນກັນຕະຫຼອດມາ ແລະໃນອະນາຄົດຍັງຈະມີຜົນງານເພງໃໝ່ໃຫ້ໄດ້ຮັບຊົມ ແລະຮັບຟັງກັນເລື້ອຍໆ. ສາມາດຕິດຕາມຜົນງານເພງໃໝ່ ແລະການເຄື່ອນໄຫວຂອງສິລະປິນ ໄດ້ທີ່ Facebook: Phongsavanh Saiyavong ແລະ YouTube: PS Productions Channel.

ສາມາດກົດຮັບຊົມ ແລະຮັບຟັງຜົນງານເພງໃໝ່ ວຽງຈັນສະຫວັນເມືອງລາວ ຂອງສິລະປິນ ພົງສະຫວັນ ໄຊຍະວົງສ໌ ໄດ້ຕາມວີດິໂອດ້ານລຸ່ມນີ້:




ທີ່ມາ: Phongsavanh Saiyavong
  • ແທັກທີ່ກ່ຽວຂ້ອງ