• ຈາກຄວາມໄຝ່ຝັນ ຈົນກາຍເປັນສິລະປິນເຕັມຕົວ

ໂດຍ: ສີເປື້ອນມື 08 ມັງກອນ 2020 (13.38 ນ.) Read : 991

ໜຸ່ມ ແພງ ຜູ້ໄທເມືອງວັງ ສິລະປິນນັກໜ້າໃໝ່ນັກຮ້ອງຄ້າຍເພງ Toeng Studio ໄດ້ແຈ້ງເກີດກັບຜົນງານເພງໃໝ່ ເພື່ອຄົນທາງນັ້ນ ທີ່ໄດ້ປ່ອຍມາທາງຄື້ນວິທະຍຸ, ຊ່ອງຢູທູບ Toeng Studio ໃນວ່າງບໍ່ດົນມານີ້ ແລະກໍາລັງເປັນສິລະປິນທີ່ໜ້າຈັບຕາເບິ່ງໃນປັດຈຸບັນ.

ທ້າວ ແພງຕາ ວົງສະໄໝ ຫຼື ແພງ ຜູ້ໄທເມືອງວັງ ໃຫ້ສຳພາດວ່າ: ຖິ່ນຖານບ້ານເກີດຂອງຕົນເອງແມ່ນເປັນຄົນຢູ່ບ້ານ ໄຊຍະລາດ ເມືອງ ວິລະບູລີ ແຂວງ ສະຫວັນນະເຂດ ຖິ່ນຖານລຳເນົາເກີດຈາກຖິ່ນບ້ານນອກຄອກນາເຊື້ອສາຍຊົນເຜົ່າຜູ້ໄທ. ກ່ອນຈະມາໄດ້ມີຜົນງານເພງນີ້ກໍຍ້ອນວ່າ ເມື່ອພາຍຫຼັງໄດ້ຮຽນຈົບຈາກສະຖາບັນຍຸຕິທຳພາກກາງ ແຂວງ ສະຫວັນນະເຂດ ຕົນເອງຈຶ່ງໄດ້ຕັດສິນໃຈດີ້ນຮົນສູ້ຊົນເຂົ້າມາເຮັດວຽກຢູ່ ສຳນັກຂ່າວແຫ່ງໜຶ່ງໃນນະຄອນຫຼວງວຽງຈັນ ເຊິ່ງກໍເປັນອີກຊ່ອງໜຶ່ງທີ່ໄດ້ເປີດໂອກາດໃຫ້ຕົນເອງມີປະສົບການຫຼາຍຢ່າງ ແລະຍ້ອນມີໃຈມັກຮັກໃນດ້ານສິລະປະການຮ້ອງເພງ ຈຶ່ງໄດ້ມັກຕິດຕາມອັບເດດຂໍ້ມູນຂ່າວສານ ໃນວົງການບັນເທີງຈົນໄດ້ມາຮູ້ຈັກຄ້າຍເພງ Toeng Studio ເຈົ້າຂອງຄ້າຍເພງດັ່ງກ່າວເຫັນວ່າ ຕົນເອງມີພອນສະຫວັນ. ດັ່ງນັ້ນ, ຈຶ່ງໄດ້ເປີດໂອກາດໂດຍການແຕ່ງຜົນງານເພງໃຫ້ ມີຊື່ເພງວ່າ ເພື່ອຄົນທາງນັ້ນ”.

 ເພງ ເພື່ອຄົນທາງນັ້ນ ປະພັນ ແລະຮຽບຮຽງໂດຍໜຸ່ມ ໂຊນ່ານ ແຈັກເກັດ ເຈົ້າຂອງຄ້າຍເພງ Toeng Studio ທັງເປັນນັກແຕ່ງເພງ, ສິລະປິນນັກຮ້ອງ ແລະຜູ້ກຳກັບນັກສະແດງເອັມວີຫຼາຍໆເພງທີ່ມີຊື່ສຽງໃນສັງຄົມ. ຜົນງານເພງດັ່ງກ່າວ ເປັນເພງຊ້າທີ່ຟັງແລ້ວມ່ວນຈັບໃຈ ໂດຍມີເນື້ອຫາທີ່ກຳລັງໃຈໃຫ້ຄົນທີ່ຢູ່ຕ່າງແຂວງ ຄົນທີ່ເຂົ້າມາສູ້ຊົນຊອກຫາວຽກເຮັດງານທຳຢູ່ໃນເມືອງ ເພື່ອຫາເງິນສົ່ງໃຫ້ຄອບຄົວ ແລະຍາດຕິພີ່ນ້ອງຢູ່ທາງບ້ານ.

ໜຸ່ມ ແພງ ຜູ້ໄທເມືອງວັງ ກ່າວຕື່ມອີກວ່າ: ເພງນີ້ເປັນຜົນງານຄັ້ງທຳອິດໃນຊີວິດ ລວມທັງເປັນການແຈ້ງເກີດໃນການກ້າວມາເປັນສິລະປິນ ໃນວົງການບັນເທີງເພງລາວ ແລະຝາກເຖິງຜູ້ທີ່ມີຄວາມໄຝ່ຝັນຢາກເປັນນັກຮ້ອງ ເຮົາຕ້ອງໝັ່ນເຝິກຝົນຕົນເອງໃຫ້ມີຄວາມກ້າສະແດງອອກ ແລະ ສິ່ງນັ້ນຈະເປັນໂຕສ້າງຈຸດແຂງໃຫ້ກັບເຮົາເກີດປະສົບຄວາມສຳເລັດ.

ສຸດທ້າຍນີ້ ຂໍຝາກຜົນງານເພງໃໝ່ເພງນີ້ ແລະຊ່ວຍເປັນກໍາລັງໃຈໃຫ້ນັກຮ້ອງໜ້າໃໝ່ແນ່ເດີ ໃນໄວໆນີ້ ຈະມີການສະແດງລະຄອນປະກອບເອັມວີຢ່າງແນ່ນອນ ເຊິ່ງສາມາດຕິດຕາມໄດ້ທາງຊ່ອງຢູທູບ ແລະເພຈຂອງ: Toeng Studio ຫຼືເຟສ໌ບຸກສ່ວນຕົວ: ແພງ ຜູ້ໄທເມືອງວັງ.

ກົດຟັງເພງຕາມວີດິໂອລຸ່ມນີ້:




ທີ່ມາ: Toeng Studio
  • ແທັກທີ່ກ່ຽວຂ້ອງ