• ເຈົ້າໜ້າທີ່ເຂັ້ມງວດການຂັບຂີ່ຊ່ວງສະຫຼອງປີໃໝ່ສາກົນ

ໂດຍ: ສີເປື້ອນມື 30 ທັນວາ 2019 (14.30 ນ.) Read : 177

ເຈົ້າໜ້າທີ່ກ່ຽວຂ້ອງໂດຍສະເພາະເຈົ້າໜ້າທີ່ຈະລາຈອນໃນທົ່ວປະເທດຈັດກຽມກຳລັງຄຸມເຂັ້ມຕໍ່ການຂັບຂີ່ຂອງພໍ່ແມ່ປະຊາຊົນລາວໃນໄລຍະສະເຫຼີມສະຫຼອງສົ່ງທ້າຍປີເກົ່າ 2019 ແລະຕ້ອນຮັບປີໃໝ່ 2020ທັງນີ້ກໍເພື່ອເຮັດໃຫ້ການຂັບຂີ່ໃຫ້ມີຄວາມເປັນລະບຽບຮຽບຮ້ອຍ ແລະຫຼຸດຜ່ອນຕົວເລກອຸບັດເຫດຕາມທ້ອງຖະໜົນກໍຄືຊີວິດ, ສຸຂະພາບ ແລະຊັບສິນຂອງປະຊາຊົນຜູ້ຂັບຂີ່.

ສະເພາະຢູ່ນະຄອນຫຼວງວຽງຈັນ (ນວ) ທ່ານ ພັທ ສັງຄົມ ພົມມະລາດ ຮອງຫົວໜ້າພະແນກຕໍາຫຼວດຈະລາຈອນຫ້ອງຕໍາຫຼວດ ປກສ ນະຄອນຫຼວງເປີດເຜີຍກ່ອນໜ້ານີ້ລະບຸວ່າ: ພະແນກຕໍາຫຼວດຈະລາຈອນ ນວ ໄດ້ມີແຜນສົມທົບກັບກອງຮ້ອຍຈະລາຈອນ 9 ຕົວເມືອງ ໃນນະຄອນຫຼວງວຽງຈັນ ຈະສຸມໃສ່ 3 ວຽກງານຫຼັກເພື່ອຫຼຸດຜ່ອນອຸບັດເຫດໃນ 3 ວຽກຈະສຸມໃສ່ມີ 1 ເຜີຍແຜ່ໂຄສະນາວຽກງານຈະລາຈອນ ແລະປະກາດແຈ້ງການຂອງກອງບັນຊາການ ປກສ ນວ ໃຫ້ມວນຊົນໄດ້ຮັບຮູ້ເຖິງກົດລະບຽບຈະລາຈອນ ພ້ອມທັງປະຕິບັດ ຕາມຢ່າງເຂັ້ມງວດ 2. ລະບາຍການ ສັນຈອນຕາມຈຸດຕ່າງໆ ແລະ ອອກກວດກາຕາມເສັ້ນທາງຕ່າງໆຢູ່ໃນຂອບເຂດຈຸດກໍານົດທັງກາງເວັນ ແລະກາງຄືນ 3. ໃຊ້ມາດຕະການບັງຄັບກົດໝາຍ ແລະ ປະຕິບັດຕາມຂໍ້ຕົກລົງຂອງອົງການປົກຄອງນະຄອນຫຼວງເລກທີ 1323 ແລະ ເລກທີ 03 ເນັ້ນໃສ່ຄວບຄຸມທາດເຫຼົ້າ ແລະກວດກາຄວາມໄວຢູ່ຕາມເສັ້ນທາງຕ່າງໆພາຍໃນນະຄອນຫຼວງວຽງຈັນ.

ໃນນີ້, ຈະໄດ້ວາງກຳລັງລົງ 2 ຮ້ອຍກວ່າຄົນ ເພື່ອເຮັດໜ້າທີ່ຄວບຄຸມການສັນຈອນຕະຫຼອດ 24 ຊົ່ວໂມງ, ຊຶ່ງມີ 10 ຈຸດ ຢູ່ໃນຂອບເຂດ 9 ຕົວເມືອງທີ່ໄດ້ກຳນົດໄວ້ ເພື່ອຫຼຸດຜ່ອນອຸບັດເຫດທີ່ຈະເກີດຂຶ້ນ, ຊຶ່ງປີ 2018 ຜ່ານມາ, ນັບແຕ່ວັນ 30 ທັນວາ 2018–1 ມັງກອນ2019 ທົ່ວນະຄອນຫຼວງວຽງຈັນມີອຸບັດເຫດເກີດຂຶ້ນ 28 ຄັ້ງ, ມີຄົນໄດ້ຮັບບາດເຈັບ 47 ຄົນ ແລະ ເສຍຊີວິດ 6 ຄົນ.

ທ່ານ ພັທ ສັງຄົມ ພົມມະລາດ ໄດ້ຮຽກຮ້ອງມາຍັງຜູ້ໃຊ້ລົດ-ໃຊ້ຖະໜົນທຸກໆຄົນຈົ່ງພາກັນຂັບຂີ່ຢ່າງມີສະຕິໃນໄລຍະງານສະເຫຼີມສະຫຼອງບຸນປີໃໝ່ສາກົນທີ່ຈະມາ ຮອດນີ້ຊຶ່ງໄລຍະນີ້ແຕ່ລະປີຈະມີອຸບັດເຫດເກີດຂຶ້ນຫຼາຍທີ່ສຸດສະນັ້ນຝາກເຖິງນັກຂັບຂີ່ໃນການສັນຈອນໄປມາຢູ່ຕາມເສັ້ນທາງຕ່າງໆໃຫ້ ຍົກສະຕິປະຕິບັດກົດລະບຽບຈະລາຈອນພ້ອມທັງປະຕິບັດຕາມແຈ້ງການຂອງກອງບັນຊາການ ປກສ ນວ ຢ່າງເຂັ້ມງວດເພື່ອສະເຫຼີມສະຫຼອງງານບຸນດັ່ງກ່າວໃຫ້ມີຄວາມມ່ວນຊື່ນ,ທັງມີຄວາມປອດໄພຮັບປະກັນເຮັດໃຫ້ສະພາບການສັນຈອນບໍ່ມີຄວາມແອອັດ ແລະຮັບປະກັນບັນຫາອຸບັດເຫດແມ່ນໃຫ້ຫຼຸດໜ້ອຍຖ່ອຍລົງກວ່າປີຜ່ານມາ,ຖ້າຫາກຮູ້ສຶກວ່າຕົນເອງເມົາແລ້ວຫ້າມຂັບຂີ່ລົດຢ່າງເດັດຂາດ,ຢ່າໃຊ້ຄວາມໄວເກີນກຳນົດໃຫ້ປະຕິບັດຕາມກົດລະບຽບທີ່ໄດ້ກຳນົດໄວ້ຢ່າງເຂັ້ມງວດ ແລະຖ້າຈະລ້ຽວລົດຕ້ອງເປີດໄພສັນຍານກ່ອນທຸກໆຄັ້ງ ເພື່ອປ້ອງກັນບໍ່ໃຫ້ເກີດອຸບັດເຫດ.

ທີ່ມາ: ເສດຖະກິດ-ສັງຄົມ
  • ຮູບພາບ

  • ແທັກທີ່ກ່ຽວຂ້ອງ