• ເທດສະການບຸນກິນຈຽງ ຫຼືນໍເປ່ເຈົ້າ ປະຈໍາປີ 2020 ທີ່ບ້ານຊໍາເກດ ເມືອງສີໂຄດຕະບອງ ນະຄອນຫຼວງວຽງຈັນ

ໂດຍ: ສີເປື້ອນມື 30 ທັນວາ 2019 (12.00 ນ.) Read : 192

ເພື່ອເປັນການສືບສານວັດທະນະທໍາ ແລະຮີດຄອງປະເພນີຂອງຊົນເຜົ່າມົ້ງ ທີ່ໄດ້ສືບທອດຕໍ່ກັນມາຕັ້ງແຕ່ບູຮານ ແລະເພື່ອເປັນບ່ອນເຕົ້າໂຮມຄວາມສາມັກຄີ ແລະພົບປະສັງສັນ ລະຫວ່າງຊົນເຜົ່າມົ້ງທີ່ອາໄສຢູ່ລາວ ແລະຕ່າງປະເທດ. ດັ່ງນັ້ນ, ຈຶ່ງໄດ້ມີການຈັດງານເທດສະການບຸນກິນຈຽງຊົນເຜົ່າມົ້ງ ຫຼື ບຸນນໍເປ່ເຈົ້າ ປະຈໍາປີ 2020 ຂຶ້ນຢ່າງເປັນທາງການ ທີ່ສະໜາມກີລາພື້ນເມືອງລາວສໍາພັນນານາຊາດ ບ້ານ ຊໍາເກດ ເມືອງ ສີໂຄດຕະບອງ ນະຄອນຫຼວງວຽງຈັນ. ໃຫ້ກຽດເຂົ້າຮ່ວມໃນພິທີເປີດງານດັ່ງກ່າວ ມີທ່ານ ນາງ ພູວຽງ ແກ້ວວົງວິຈິດ ເຈົ້າເມືອງໆ ສີໂຄດຕະບອງ, ທ່ານ ວາກີຣີ ວົງໄຊ ຄະນະປະທານຈັດງານບຸນກິນຈຽງຊົນເຜົ່າມົ້ງ, ທ່ານ ທອງວິໄລ ລິດທິເດດ ຄະນະປະທານຈັດງານບຸນກິນຈຽງຊົນເຜົ່າມົ້ງແລະທ່ານ ໂຊກໄຊ ຊົງ ຄະນະປະທານຈັດງານບຸນກິນຈຽງຊົນເຜົ່າມົ້ງ.

ງານເທດສະການບຸນກິນຈຽງຂອງຊົນເຜົ່າມົ້ງ ປະຈໍາປີ 2020 ໄດ້ງານມາຢ່າງຕໍ່ເນື່ອງ ເຊິ່ງມີນີ້ກໍເປັນປີທີ 4 ແລະໃນປີຜ່ານມາ ກໍຖືວ່າໄດ້ຮັບກະແສຕອບຮັບເປັນຢ່າງດີ ແລະມີມວນຊົນທຸກຊົນເຜົ່າເຂົ້າຮ່ວມຢ່າງຫຼວງຫຼາຍ. ເທດສະການດັ່ງກ່າວແມ່ນເປັນງານສົ່ງທ້າຍປີເກົ່າຕ້ອນຮັບປີໃໝ່, ເປັນສັນຍາລັກແຫ່ງຄວາມສາມັກຄີ, ຄວາມຜູກພັນໃນວົງສາຄະນາຍາດຂອງຊົນເຜົ່າມົ້ງທີ່ຢູ່ຫ່າງໄກຊອກຫຼີກ ໄດ້ມາພົບປະສັງສັນ ແລະເຮັດພິທີກໍາ ເພື່ອລະນຶກເຖິງບັນພະບູລຸດຂອງວົງສາຄະນາຍາດຕົນ ເຊິ່ງນໍາພາ ໂດຍ ເຈົ້າກົກ-ເຈົ້າເລົ່າ ທີ່ໄດ້ນໍາພາຊາວເຜົ່າມົ້ງ ຈັດງານບຸນກິນຈຽງທີ່ຍິ່ງໃຫຍ່ຂຶ້ນມາແຕ່ດົນນານ ແລະມີຄວາມໝາຍສໍາຄັນ ທີ່ສ່ອງແສງເຖິງຮີດຄອງປະເພນີ ແລະວັດທະນະທໍາອັນດີງາມຂອງຊົນເຜົ່າມົ້ງໃນລາວ.

ໃນປິນີ້ໄດ້ຈັດຂຶ້ນໃນລະຫວ່າງ ວັນທີ 28 ທັນວາ 2019 ຫາ ວັນທີ 05 ມັງກອນ 2020. ສໍາລັບເທດສະການບຸນກິນຈຽງຂອງຊົນເຜົ່າມົ້ງປີນີ້ ກໍມີຫຼາກຫຼາຍກິດຈະກໍາທີ່ໜ້າສົນໃຈຫຼາຍຢ່າງ ບໍ່ວ່າຈະເປັນການໂຍນໝາກຄອນ, ສະແດງສິລະປະຂອງຊົນເຜົ່າມົ້ງ, ຂັບລໍາພື້ນເມືອງຂອງຊົນເຜົ່າມົ້ງ ແລະການແຂ່ງຂັນກີລາປະເພດຕ່າງໆ ເຊັ່ນ: ກີລາບານເຕະ, ຕີໝາກຂ່າງ, ຍິງໜ້າເກັກ,​ ງົວຊົນງົວ ແລະອື່ນໆ. ນອກຈາກນັ້ນ, ຍັງມີການຈັດງານປະກວດນາງສາວຊົນເຜົ່າມົ້ງທົ່ວປະເທດ ປະຈໍາປີ 2020 “Miss Hmong Laos 2020” ໃນລະຫວ່າງວັນທີ 02-03 ມັງກອນ 2020 ເພື່ອຊີງເງິນລາງວັນ 103 ລ້ານກີບອີກດ້ວຍ.

 


ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ