• Mitsubishi Xpander 2019 ຕອບໂຈດທຸກການໃຊ້ງານ

ໂດຍ: ສີເປື້ອນມື 13 ທັນວາ 2019 (15.41 ນ.) Read : 353

ໃນວັນທີ 12 ທັນວາ 2019 ຜ່ານມາ ທາງບໍລິສັດ ມິດຊຸບິຊິ ມໍເຕີ ລາວ ໄດ້ຈັດງານເປີດໂຕລົດຮຸ່ນໃໝ່ “Mitsubishi Xpander 2019” ຄັ້ງທໍາອິດໃນ ສປປ ລາວ ທີ່ຫ້ອງຂາຍ ມິດຊຸບິຊິ ລາວ ເຕ 2. ໂດຍການເປັນປະທານຂອງທ່ານ ຊັດຊະວານ ເພີ່ມສຸກຈາຣຸຊັບ ຜູ້ອໍານວຍການໃຫຍ່ Mitsubishi Motors Laos ພ້ອມດ້ວຍສື່ມວນຊົນທຸກຂະແໜງການ.

ທ່ານ ຊັດຊະວານ ເພີ່ມສຸກຈາຣຸຊັບ ໄດ້ກ່າວວ່າ: “Mitsubishi Xpander 2019” ເປັນລົດເຄິ່ງເກັງ ແລະເຄິ່ງ SUV ຂະໜາດ 7 ບ່ອນນັ່ງ, ຄອນເຊັບການອອກແບບດ້ານໜ້າລົດເປັນເອກະລັກສະເພາະຂອງມິດຊຸບິຊິ ໃຫ້ວິໄສທັດກວ້າງໄກກວ່າເກົ່າ ເພື່ອໃຫ້ຄວາມປອດໄພທັງຜູ້ຂັບ, ຜູ້ໂດຍສານ ແລະຜູ້ໃຊ້ລົດໃຊ້ຖະໜົນ. ໄຟລີ່ທາງໜ້າແບບຄຣິດຕັນ LED, ກັນຊົນໜ້າມາພ້ອມໄຟຕັດໝອກ, ໄຟທ້າຍແບບ L-ILLUMINATION TUBE ພ້ອມກັບໄຟເບຼກແບບແຍກສ່ວນ, ສະປອຍເລີທາງຫຼັງມາພ້ອມກັບໄຟເບຼກດວງທີ 3 ແບບ LED, ກັນຊົນທ້າຍແບບສະທ້ອນແສງ ແລະລໍ້ລົດແບບອັນລອຍ ຂະໜາດ 16 ນິ້ວແບບທູໂທນ.

ພາຍໃນອອກແບບຕາມຫຼັກ OMOTENASHI, ມີຄວາມລຽບງ່າຍ, ທັນສະໄໝ ແຕ່ໃຫ້ປະໂຫຍດສູງສຸດ, ຫ້ອງໂດຍສານກວ້າງຂວາງ, ເກັບເຄື່ອງໄດ້ຈໍານວນຫຼວງຫຼາຍ ແລະສະດວກສະບາຍຫຼາຍຂຶ້ນ. ນອກນັ້ນ, ຍັງມີ Power Sockets (ບ່ອນສາກໂທລະສັບ) 3 ຕໍາແໜ່ງ ແລະລະບົບເຄື່ອງສຽງ ພ້ອມຈໍສະແດງຜົນລະບົບແອນດຼອຍ ສໍາຜັດໜ້າຈໍ ຂະໜາດ 9.2 ນິ້ວ (ພິເສດ ຕິດຕັ້ງສະເພາະລົດໃນ ສປປ ລາວເທົ່ານັ້ນ). ໄລຍະຄວາມສູງໃຕ້ກ້ອງລົດ ສູງເຖິງ 205 ມິລີແມັດ, ມີເຊັນເຊີ ແລະກ້ອງດ້ານຫຼັງ ພ້ອມຄວາມປອດໄພຄົບຄັນ.

Mitsubishi Xpander 2019 ມາພ້ອມເຄື່ອງຈັກແອັດຊັງ DOHC MIVEC 1.5 ລິດ, ໃຫ້ກໍາລັງສູງສຸດ 105 ແຮງມ້າ ແລະແຮງບິດສູງສຸດ 141 ນິວຕັນ ພ້ອມລະບົບວາວແປຜັນດ້ານໄອດີ MIVEC ຊ່ວຍໃຫ້ເຄື່ອງຈັກມີອັດຕາເລັ່ງໄດ້ດີ ແລະປະຢັດນໍ້າມັນ. ລົດ Mitsubishi Xpander 2019 ມີໃຫ້ເລືອກ 4 ສີ ຄື: ສີດໍາ, ສີເທົາ, ສີເງິນ ແລະສີຂາວ ມາພ້ອມກັບລາຄາເລີ່ມຕົ້ນ 269,100,000 ກີບ ຫຼື 29,900 ໂດລາ. ພິເສດ! ຖ້າຫາກສັ່ງຈອງ ຫຼືຊື້ລົດພາຍໃນເດືອນນີ້ ຮັບຟຣີທັນທີຊຸດແຕ່ງສະເກິດ ຫຼືຫຸ້ມເບາະຟຣີທັນທີ.


ທີ່ມາ:
  • ຮູບພາບ