• ເມືອງ ເງິນ ແຂວງ ໄຊຍະບູລີ ຈັດງານແຂ່ງຂັນຊ່ວງເຮືອປະຈຳປີ 2019

ໂດຍ: ສີເປື້ອນມື 27 ພະຈິກ 2019 (23.05 ນ.) Read : 150

ເມືອງເງິນ ແຂວງໄຊຍະບູລີ ໄດ້ຈັດງານແຂ່ງຂັນຊ່ວງເຮືອ ປະຈຳປີ 2019 ໃນວັນທີ 23 ພະຈິກ 2019 ນີ້ ຢູທີ່ອ່າງເກັບນໍ້າຫ້ວຍນານ້ອຍ ເຂົ້າຮ່ວມເປັນກຽດ ມີທ່ານ ດວງຕາ ໄຊວຸດ ຄະນະປະຈຳພັກແຂວງ ຫົວໜ້າຄະນະຈັດຕັ້ງແຂວງໄຊຍະບູລີ, ມີທ່ານ ຄຳແພງ ຕັດສະຫວັດ ກຳມະການພັກແຂວງ ເລຂາພັກເມືອງ ເຈົ້າເມືອງ ເມືອງເງິນ, ມີຄະນະນຳຂອງແຂວງ, ຄະນະນຳຂອງເມືອງ, ບັນດາເມືອງອ້ອມຂ້າງ ມາຈາກແຂວງນ່ານ ປະເທດໄທ, ມີບັນດານັກທຸລະກິດ,ນັກສີພາຍ ແລະ ພໍ່ແມ່ປະຊາຊົນພາຍໃນເມືອງ, ຕ່າງເມືອງ, ຕ່າງແຂວງ ແລະຕ່າງປະເທດ ເຂົ້າຮ່ວມຢ່າງຄັບຄາໜາແໜ້ນ.
ທ່ານ ຄຳແພງ ຕັດສະຫວັດ ໃນນາມປະທານຈັດງານ ໄດ້ໃຫ້ກຽດຂື້ນກ່າວເປີດ ງານແຂ່ງຂັນຊ່ວງເຮືອປະຈຳປີ 2019 ຢ່າງເປັນທາງການ. ເຊິ່ງງານແຂ່ງຂັນຊ່ວງເຮືອປະຈຳປີ ໃນປີນີ້ມີເຮືອເຂົ້າຮ່ວມແຂ່ງຂັນທັງໝົດ 21 ລຳ, ເພດຍິງ 10 ລຳ, ເພດຊາຍ 11 ລຳ ໃຊ້ເວລາການ ແຂ່ງຂັນ 1 ວັນ ພິເສດໄດ້ມີການແຂ່ງຂັນເຮືອມິດຕະພາບ ລະຫວ່າງເມືອງຕໍ່ເມືອງອີກດ້ວຍ. ພາຍໃນງານ ຍັງມີຮ້ານວາງສະແດງສີນຄ້າຫັດຖະກຳທີ່ຜະລິດຈາກປະຊາຊົນພາຍໃນເມືອງເງິນ, ຜົນຜະລິດກະສິກຳ ແລະ ປະກວດອາຫານພື້ນເມືອງ.
ຜົນການແຂ່ງຂັນ ໃນປີນີ້ ທີ 1 ເພດຊາຍ ແມ່ນບໍລິສັດ ສັນຕິໄຊ ໄດ້ຮັບຂັນເງິນຂອງທ່ານເຈົ້າເມືອງ 1 ໜ່ວຍ, ເງິນສົດ 6 ລ້ານກີບ, ທີ 1 ເພດຍິງ ແມ່ນເຮືອບ້ານ ທອງ ໄດ້ຮັບຂັນເງິນ ຂອງທ່ານເຈົ້າເມືອງ 1 ໜ່ວຍ ເງິນສົດ 6 ລ້ານກີບ , ທີ 2 ເພດຊາຍ ບ້ານນາງົວ ໄດ້ຮັບເງິນສົດ 5 ລ້ານກີບ , ທີ 2 ເພດຍິງ ແມ່ນເຮືອບ້ານນາງົວ ໄດ້ຮັບເງິນສົດ 5 ລ້ານກີບ, ທີ 3 ເພດຊາຍ ແມ່ນບ້ານທອງ ໄດ້ຮັບເງິນສົດ 4.000.000 ກີບ ແລະທີ 3 ເພດຍິງ ແມ່ນເຮືອບ້ານນາຍາງຄຳ ໄດ້ຮັບເງິນສົດ 4.000.000 ກີບ ແລະຊະນະເລີດ ເຮືອມິດຕະພາບ ແມ່ນເມືອງຄອບ ໄດ້ຮັບຂັນເງິນ 1 ໜ່ວຍ ເງິນສົດ 2.500.000 ກີບ. ທີ 2 ແມ່ນເຮືອມິດຕະພາບ ເມືອງເງິນ ແລະ ທີ 3 ແມ່ນເຮືອມິດຕະພາບ ຈາກເມືອງຊຽງຮ່ອນ ໃຫ້ກຽດຂື້້ນມອບລາງວັນຊະນະເລີດເພດຊາຍ - ເພດຍິງ ໂດຍແມ່ນ ທ່ານ ດວງຕາ ໄຊວຸດ ຄະນະປະຈໍາພັກແຂວງ ຫົວໜ້າຄະນະຈັດຕັ້ງແຂວງ ໄຊຍະບູລີ.

ໂດຍ: ອິນແປງ ແຫວນຄຳ


ທີ່ມາ: ປະເທດລາວ Pathedlao
  • ຮູບພາບ

  • ແທັກທີ່ກ່ຽວຂ້ອງ