• ກົດຫມາຍ ວ່າດ້ວຍການປະກັນສັງຄົມ(ສະບັບປັບປຸງ)

ໂດຍ: ສີເປື້ອນມື 27 ພະຈິກ 2019 (22.34 ນ.) Read : 525

ກົດຫມາຍ ວ່າດ້ວຍການປະກັນສັງຄົມ(ສະບັບປັບປຸງ) ໄດ້ຖຶກຮັບຮອງໂດຍມະຕິຕົກລົງຂອງສະພາແຫ່ງຊາດ ສະບັບເລກທີ095/ສພຊ, ລົງວັນທີ 27 ມິຖຸນາ 2018; ລັດຖະດຳລັດຂອງປະທານປະເທດແຫ່ງ ສປປ ລາວ ກ່ຽວກັບການປະກາດໃຊ້ກົດໝາຍດັ່ງກ່າວ ສະບັບເລກທີ 213/ປປທ, ລົງວັນທີ 13 ສິງຫາ 2018 ແລະ ໄດ້ລົງທະບຽນເຜີຍແຜ່ລົງຈົດໝາຍເຫດທາງລັດຖະການໃນວັນທີ 25 ທັນວ່າ 2018; ກະຊວງ ຮສສ ໄດ້ອອກຄໍາແນະນໍາວ່າດ້ວຍການຈັດຕັ້ງປະຕິບັດກົດຫມາຍ ສະບັບເລກທີ 1206/ຮສສ, ລົງວັນທີ 23 ເມສາ 2019, ເພື່ອເຮັດໃຫ້ການຈັດຕັ້ງປະຕິບັດຢ່າງຖຶກຕ້ອງ ແລະ ເປັນເອກະພາບໃນຂອບເຂດທົ່ວປະເທດ ໃນວັນທີ 25 ທັນວາ 2018; ກົມປະກັນສັງຄົມຮ່ວມກັບຫ້ອງການກອງທຶນປະກັນສັງຄົມແຫ່ງຊາດ, ກະຊວງ ຮສສ ໄດ້ຈັດກອງປະຊຸມເຜີຍແຜ່ກົດຫມາຍ ວ່າດ້ວຍການປະກັນສັງຄົມ(ສະບັບປັບປຸງ)ຂຶ້ນ, ໃນວັນທີ 2 ພຶດສະພາ 2019 ທີ່ຫ້ອງປະຊຸມໃຫຍ່ກະຊວງ, ໂດຍການເປັນປະທານຂອງ ທ່ານ ນາງໃບຄຳ ຂັດທິຍະ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ, ມີບັນດາທ່ານຫົວໜ້າກົມ-ຮອງກົມ, ຫົວໜ້າພະແນກ-ຮອງພະແນກ ແລະ ພະນັກງານວິຊາການອ້ອມຂ້າງກະຊວງ ຮສສ ເຂົ້າຮ່ວມ.
ກອງປະຊຸມເຜີຍແຜ່ໃນຄັ້ງນີ້ ບັນດາທ່ານຜູ້ເຂົ້າຮ່ວມກອງປະຊຸມໄດ້ຮັບຟັງການນຳສະເໜີກ່ຽວກັບກົດໝາຍວ່າດ້ວຍການປະກັນສັງຄົມ(ສະບັບປັບປຸງໃໝ່) ລວມ: ມີ 12 ພາກ, 25 ໝວດ, 123 ມາດຕາ ແລະ ໃນນີ້ໄດ້ປັບປຸງ 85 ມາດຕາ, ເພີ່ມເຂົ້າໃຫມ່ 19 ມາດຕາ ແລະ ຮັກສາເນື້ອໃນເດີມ 19 ມາດຕາ. ໂດຍສະເພາະຫລັການປະກັນສັງຄົມ, ການກໍານົດເງື່ອນໄຂຕ່າງໆກ່ຽວກັບການປະກັນສັງຄົມ, ການອຸດໜູນປະກັນສັງຄົມປະເພດຕ່າງໆ ຕິດພັນກັບບັນຫາດ້ານການເງິນ ແລະ ການຄຸ້ມຄອງບໍລິຫານວຽກງານປະກັນສັງຄົມ ລວມທັງບັນຫາຕ່າງໆທີ່ກ່ຽວຂ້ອງກັບການຈັດຕັ້ງປະຕິບັດວຽກງານປະກັນສັງຄົມຕະຫລອດໃນໄລຍະຜ່ານມາ ໂດຍເຫັນວ່າກອງປະຊຸມເຜີຍແຜ່ກົດຫມາຍ ວ່າດ້ວຍການປະກັນສັງຄົມ(ສະບັບປັບປຸງໃໝ່)ໃນຄັ້ງນີ້ ຈະເຮັດໃຫ້ບັນດາທ່ານຜູ້ເຂົ້າຮ່ວມໄດ້ຍົກລະດັບຄວາມຮູ້, ຄວາມເຂົ້າໃຈ ແລະ ເອົາໃຈໃສ່ຈັດຕັ້ງປະຕິບັດນະໂຍບາຍຕໍ່ກັບວຽກງານປະກັນສັງຄົມ ເພື່ອພ້ອມກັນນໍາໄປຈັດຕັ້ງປະຕິບັດຄວາມເປັນເອກະພາບ, ຖຶກຕ້ອງ ສອດຄອ່ງໃນການຈັດຕັ້ງປະຕິບັດມີປະສິດທິຜົນ; ກົດຫມາຍ ວ່າດ້ວຍການປະກັນສັງຄົມ(ສະບັບປັບປຸງໃໝ່) ແມ່ນໄດ້ຈັດຕັ້ງປະຕິບັດເລີ່ມນໍາໃຊ້ ໃນວັນທີ 01 ພືດສະພາ 2019 ຢ່າງເປັນທາງການ.

(ພາບ+ຂ່າວ: ຄຳເມິງ )


ທີ່ມາ: ຂ່າວສານ ແຮງງານ ແລະ ສະຫວັດດີການສັງຄົມ
  • ຮູບພາບ

  • ແທັກທີ່ກ່ຽວຂ້ອງ