• ລາວ ເລີ່ມໃຫ້ບໍລິການເອີ້ນ ລົດຮັບສົ່ງໂດຍສານ ຜ່ານແອັບເທີງມືຖື

ໂດຍ: ສີເປື້ອນມື 30 ຕຸລາ 2019 (11.06 ນ.) Read : 187

ສະມາຄົມລົດຕູ້ນະຄອນຫລວງວຽງຈັນ ໄດ້ຮ່ວມມືກັບ ໂລກາ (LOCA) ເຊິ່ງເປັນບໍລິການເອີ້ນລົດຮັບສົ່ງໂດຍສານຜ່ານແອັບພລິເຄຊັນເທິງມືຖື (ດຳເນີນການພາຍໃຕ້ ບໍລິສັດ ບິສຈິຕອນ ຈຳກັດ) ເພື່ອຫັນການບໍລິການລົດຕູ້ໃນ ສປປ ລາວ ໃຫ້ເປັນທັນສະໄໝ, ເພີ່ມຄວາມສະດວກສະບາຍ ແລະ ມີຄວາມໂປ່ງໃສດ້ານລາຄາ ແລະ ໃຫ້ບໍລິການ 24 ຊົ່ວໂມງ.
ພິທີເຊັນສັນຍາໄດ້ຈັດຂຶ້ນທີ່ນະຄອນຫລວງວຽງຈັນ ໃນວັນທີ 28 ຕຸລາ 2019 ລະຫວ່າງ ທ່ານ ບຸນຄ້ຳ ລາດຊະວົງ ປະທານສະມາຄົມລົດຕູ້ນະຄອນຫລວງວຽງຈັນ ແລະ ທ່ານ ສຸລິໂຍ ວົງດາລາ ຜູ້ກໍ່ຕັ້ງ LOCA ແລະ ຜູ້ບໍລິຫານຝ່າຍເຕັກໂນໂລຊີຂອງ ບໍລິສັດ ບິສຈິຕອນ ຈໍາກັດ ໂດຍການເຂົ້າຮ່ວມເປັນສັກຂີພິຍານຂອງ ທ່ານ ດາວວອນ ພະຈັນທະວົງ ຮອງປະທານສະພາການຄ້າ ແລະ ອຸດສະຫະກຳແຫ່ງຊາດ, ພ້ອມດ້ວຍພະນັກງານຈາກພາກສ່ວນທີ່ກ່ຽວຂ້ອງ.
ການເຊັນສັນຍາໃນຄັ້ງນີ້, ມີເປົ້າໝາຍເພື່ອເຮັດໃຫ້ການບໍລິການລົດຕູ້ ມີຄວາມທັນຍຸກທັນສະໄໝຫລາຍຂຶ້ນ ຄຽງຄູ່ກັບການຫັນເປັນດີຈິຕອນ, ພ້ອມທັງເຮັດໃຫ້ການບໍລິການມີຄວາມສະດວກສະບາຍ, ມີລາຄາທີ່ຊັດເຈນ ແລະ ເຮັດໃຫ້ຜູ້ຂັບລົດຕູ້ບໍລິການມີລາຍໄດ້ເພີ່ມ. ການບໍລິການຈະຄິດໄລ່ເປັນແພັກເກັດຄື 3 ຊົ່ວໂມງ ໃນໄລຍະທາງ 80 ກິໂລແມັດ ແລະ ນັ່ງໄດ້ 8 ຄົນ ແມ່ນ 290.000 ກີບ.

ທີ່ມາ: ປະເທດລາວ Pathedlao
  • ແທັກທີ່ກ່ຽວຂ້ອງ