• ກຸງສີ ເປີດໂຕນະວັດຕະກໍາໃໝ່ ໂອນເງິນຂ້າມປະເທດ ໄດ້ໄວໃຊ້ເວລາບໍ່ເຖິງນາທີ

ໂດຍ: ສີເປື້ອນມື 29 ຕຸລາ 2019 (16.15 ນ.) Read : 252

ທະນາຄານ ກຸງສີອະຍຸດທະຍາ ຈໍາກັດ (ມະຫາຊົນ) ໄດ້ເປີດໃຫ້ບໍລິການ Krungsri Blockchian Interledger ເປັນການບໍລິການ ໂອນເງິນຜ່ານເຕັກໂນໂລຊີ ບລັອກເຊນ ຢ່າງວ່ອງໄວ ຈາກ ສປປ ລາວ ໄປຫາ ປະເທດໄທ ໂດຍການໃຊ້ເວລາບໍ່ເຖິງນາທີ ເຊິ່ງຮອງຮັບທັງສະກຸນເງິນບາດ ແລະໂດລາສະຫະລັດ ເພື່ອຊ່ວຍສະໜັບສະໜູນທຸລະກິດການຄ້າລະຫວ່າງ ລາວ-ໄທ ໃຫ້ການເຮັດທຸລະກິດມີຄວາມສະດວກສະບາຍ ແບບໄຮ້ພົມແດນ. ພິທີການເປີດໂຕງານດັ່ງກ່າວ ໄດ້ຈັດຂຶ້ນໃນວັນທີ 28 ຕຸລາ 2019 ຜ່ານມາ ທີ່ໂຮງແຮມ ຄລາວ ພລາຊ່າ ນະຄອນຫຼວງວຽງຈັນ ໂດຍມີຕາງໜ້າຈາກທະນາຄານແຫ່ງ ສປປ ລາວ ແລະຕາງໜ້າຈາກທະນາຄານກຸງສີອາຍຸດທະຍາ ເຂົ້າຮ່ວມ.

ທ່ານ ແດນ ຮາໂຊໂນ່ ປະທານກຸ່ມທຸລະກິດລູກຄ້າຍ່ອຍ ແລະລູກຄ້າບຸກຄົນ ທະນາຄານ ກຸງສີອະຍຸດທະຍາ ຈໍາກັດ (ມະຫາຊົນ) ໄດ້ກ່າວວ່າ: ການຄ້າ ແລະການລົງທຶນ ລະຫວ່າງໄທ ແລະລາວ ເຕີບໃຫຍ່ ແລະມີມູນຄ່າເພີ່ມຂຶ້ນຢ່າງຕໍ່ເນື່ອງ. ດັ່ງນັ້ນ, ທາງກຸງສີ ຈຶ່ງນໍາເອົານະວັດຕະກໍາທາງການເງິນມາໃຊ້ ເພື່ອສະໜັບສະໜູນທຸລະກິດການຄ້າລະຫວ່າງສອງປະເທດ ໂດຍທະນາຄານ ໄດເປີດຕົວ Krungsri Blockchian Interledger ທີ່ຈະອໍານວຍຄວາມສະດວກໃຫ້ແກ່ຜູ້ປະກອບການທາງໄທ ແລະ ສປປ ລາວ ໃຫ້ສາມາດໂອນເງິນຂ້າມປະເທດໃຫ້ສໍາເລັດ ໃນເວລາບໍ່ເຖິງນາທີ ແລະນະວັດຕະກໍາດັ່ງກ່າວ ຍັງຮອງຮັບທັງສະກຸນເງິນບາດ ແລະໂດລາສະຫະລັດອີກດ້ວຍ.

ນອກນັ້ນ, ກຸງສີ ມີຄວາມເຊື່ອໝັ້ນໃນສັກກະຍະພາບການເຕີບໃຫຍ່ຂອງເສດຖະກິດໃນ ສປປ ລາວ ພົບວ່າ ມີນັກລົງທຶນຈາກປະເທດໄທ ເຂົ້າມາລົງທຶນໃນ ສປປ ລາວ ເປັນຈໍານວນຫຼວງຫຼາຍ. ດັ່ງນັ້ນ, ການເປີດໂຕນະວັດຕະກໍາ Krungsri Blockchian Interledger ຈະຊ່ວຍຂັບເຄື່ອນຫົວໜ່ວຍທຸລະກິດທາງໄທ ແລະລາວ ໃຫ້ຂະຫຍາຍຕົວ ແລະເຕີບໃຫຍ່ໄດ້ຢ່າງວ່ອງໄວຫຼາຍຂຶ້ນ.

ປັດຈຸບັນ ທະນາຄານ ກຸງສີອະຍຸດທະຍາ ມີ 2 ສາຂາ ໃນປະເທດລາວ ຄື: ນະຄອນຫຼວງວຽງຈັນ ແລະແຂວງ ສະຫວັນນະເຂດ. ນອກນັ້ນ, ກຸງສີ ຍັງດໍາເນີນທຸລະກິດການເຊົ່າສິນເຊື່ອ ພາຍໃຕ້ຊື່ ກຸງສີ ລິດຊິ່ງ ເຊິ່ງມີອັດຕາການເຕີບໃຫຍ່ຢ່າງຕໍ່ເນື່ອງ ໃນໄລຍະ 5 ປີ ຜ່ານມາ.

ນະວັດຕະກໍາ Krungsri Blockchian Interledger ຂອງກຸງສີ ໄດ້ສ້າງການປ່ຽນແປງຄັ້ງສໍາຄັນ ໃນລະບົບການຮັບ-ຈ່າຍເງິນ ສໍາລັບທຸລະກິດ. ຈາກຄວາມສໍາເລັດໃນການໂອນເງິນລະຫວ່າງປະເທດແບບຮຽວທ່າມ ເປັນຄັ້ງທໍາອິດໃນການຊື້-ຂາຍນໍ້າມັນເຊື້ອໄຟ ລະຫວ່າງ ໄອອາພີຊີ ແລະບໍລິສັດ ບົວສະຫວັນ ຈໍາກັດ. ຕໍ່ມາທາງກຸງສີກໍໄດ້ຮັບຄວາມໄວ້ວາງໃຈຈາກກຸ່ມລູກຄ້າອົງກອນແຖວໜ້າຂອງປະເທດໄທ ແລະຕ່າງປະເທດ ທີ່ຮ່ວມໃຊ້ນະວັດຕະກໍາ Krungsri Blockchian Interledger ພາຍໃຕ້ຫົວຂໍ້ BOT Regulatory Sandbox ແລະເຮັດໃຫ້ກຸງສີ ເປັນທະນາຄານທໍາອິດ ທີ່ໄດ້ຮັບອະນຸມັດຈາກທະນາຄານແຫ່ງປະເທດໄທ ໃນການພັດທະນານະວັດຕະກໍາ ທີ່ນໍາເຕັກໂນໂລຊີ ດັ່ງກ່າວລະຫວ່າງໄທ ແລະ ສປປ ລາວ.


ທີ່ມາ:
  • ຮູບພາບ