• BYD ເປີດໂຕລົດໃຫຍ່ຮຸ່ນໃໝ່ ທີ່ໃຊ້ພະລັງງານໄຟຟ້າ

ໂດຍ: ສີເປື້ອນມື 21 ຕຸລາ 2019 (14.42 ນ.) Read : 253

ໃນວັນທີ 19 ຕຸລາ 2019 ທີ່ຜ່ານມາ ທາງບໍລິສັດຜະລິດລົດ ໄດ້ຈັດພິທີເປີດໂຕຫ້ອງວາງສະແດງລົດໃໝ່ ແລະລົດໃຫຍ່ຮຸ່ນໃໝ່ ທີ່ໃຊ້ພະລັງງານໄຟຟ້າ ຢ່າງເປັນທາງການ ຢູ່ທີ່ບ້ານ ໂພນພະເນົາ ເມືອງ ໄຊເສດຖາ ນະຄອນຫຼວງວຽງຈັນ (ຂ້າງປໍ້ານໍ້າມັນ ປຕທ). ໃຫ້ກຽດເຂົ້າຮ່ວມມີ: ທ່ານ ສຸລິຍົນ ພິລະວົງ ຫົວໜ້າກົມນໍາເຂົ້າ-ສົ່ງອອກ ກະຊວງອຸດສາຫະກໍາ ແລະ ການຄ້າ, ທ່ານ Marco Mok ປະທານຕົວແທນໃຫຍ່ BYD ປະຈໍາລາວ, ທ່ານ Liu Xueliang ປະທານຝ່າຍຂາຍຂອງ BYD ປະຈໍາພາກພື້ນ ອາຊີ-ປາຊີຟິກ, ທ່ານ ໄຊຊະນະ ໄຊຍະກອນ ຫົວໜ້າກົມນະໂຍບາຍ ການຄ້າລະຫວ່າງປະເທດ ກະຊວງອຸດສາຫະກໍາ ແລະ ການຄ້າ, ທ່ານ Henry Yip ຜູ້ອໍານວຍການອາວຸດໂສ ຝ່າຍຂາຍຂອງ BYD ປະຈໍາພາກພື້ນປາຊີຟິກ, ທ່ານ ນາງ Mango Wan ຜູ້ອໍານວຍການ BYD ລາວ ພ້ອມດ້ວຍພາກສ່ວນທີ່ກ່ຽວຂ້ອງທັງພາກລັດ ແລະເອກະຊົນ ແລະບັນດາບໍລິສັດຕ່າງໆ.

ຈຸດປະສົງຂອງການເປີດຫ້ອງວາງສະແດງຂາຍລົດຄັ້ງນີ້ ແມ່ນເພື່ອໃຊ້ເປັນສູນບໍລິການຂາຍລົດຍີ່ຫໍ້ BYD ແລະຂະຫຍາຍຕະຫຼາດຢູ່ໃນລາວ ພ້ອມທັງເປັນການເປີດໂຕລົດຮຸ່ນໃໝ່ຂອງ BYD ມີຊື່ວ່າ: “Tang EV” ທີ່ໃຊ້ການຂັບເຄື່ອນດ້ວຍພະລັງງານໄຟຟ້າ ສາມາດເດີນທາງໄດ້ 500-520 ກິໂລແມັດ.

ບໍລິສັດ BYD ເປັນຜູ້ນໍາດ້ານລົດໄຟຟ້າ ແລະເນື່ອງຈາກບັນຫາພາວະໂລກຮ້ອນໃນປັດຈຸບັນ ເຊິ່ງເປົ້າໝາຍຂອງບໍລິສັດ BYD ແມ່ນການສ້າງພາຫະນະທີ່ຕອບໂຈດຕໍ່ກັບບັນຫາດັ່ງກ່າວ ໂດຍມີເປົ້າໝາຍໃຫ້ຜູ້ຄົນຫັນມາຊົມໃຊ້ລົດໄຟຟ້າແທນລົດນໍ້າມັນ. ນະວັດຕະກໍາລົດໄຟຟ້ານີ້ ຈະຊ່ວຍໃນການປະຢັດຄ່າໃຊ້ຈ່າຍ ແລະເປັນມິດຕໍ່ສິ່ງແວດລ້ອມ.

ບໍລິສັດ BYD ມີແຜນທີ່ຂະຫຍາຍຕະຫຼາດການຂາຍໃນປະເທດລາວ 4 ສາຂາ ຄື: ນະຄອນຫຼວງວຽງຈັນ,​ແຂວງ ສະຫວັນນະເຂດ, ຫຼວງພະບາງ ແລະຈໍາປາສັກ ລວມທັງຕົວແທນຈໍາໜ່າຍ 20 ແຫ່ງ ທົ່ວປະເທດ.


ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ

  • BYD Tang EV