• ຕະຫຼາດນັດພົບແຮງງານ ທີ່ສູນການຄ້າ ລາວ-ໄອເຕັກ (ຕຶກເກົ່າ) ວັນທີ 16-20 ຕຸລາ 2019

ໂດຍ: ສີເປື້ອນມື 17 ຕຸລາ 2019 (13.58 ນ.) Read : 176

ພະແນກແຮງງານ ແລະ ສະຫວັດດີການສັງຄົມ ນະຄອນຫຼວງວຽງຈັນ ແລະບໍລິສັດ ລາວເວີນ ມະຫາຊົນ ຈໍາກັດ ຮ່ວມກັນຈັດງານຕະຫຼາດນັດພົບແຮງງານຂຶ້ນ ໃນລະຫວ່າງວັນທີ 16-20 ຕຸລາ 2019 ເຊິ່ງໃນວັນທີ 16 ຕຸລາ 2019 ທີ່ຜ່ານມາ ໄດ້ມີພິທີການເປີດງານ ຕະຫຼາດນັດພົບແຮງງານ (JOB Fair 2019) ຢ່າງເປັນທາງການ ທີ່ສູນງານວາງສະແດງສິນຄ້າ ລາວ-ໄອເຕັກ (ຕຶກເກົ່າ) ໃຫ້ກຽດເຂົ້າຮ່ວມໂດຍ: ທ່ານ ປອ. ຄໍາແພງ ໄຊສົມແພງ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ,​ ທ່ານ ສີຫຸນ ສິດທິລືໄຊ ຮອງເຈົ້າຄອງນະຄອນຫຼວງວຽງຈັນ, ທ່ານ ປານີ ທິລະສັກ ຮອງຫົວໜ້າພະແນກ ແຮງງານ ແລະ ສະຫວັດດີການສັງຄົມ ນະຄອນຫຼວງວຽງຈັນ, ທ່ານ ຄໍາແກ້ວ ມະຫາໄຊ ຮອງຫົວໜ້າພະແນກ ແຮງງານ ແລະ ສະຫວັດດີການສັງຄົມ ນະຄອນຫຼວງວຽງຈັນ ພ້ອມດ້ວຍບັນດາເຈົ້າເມືອງ-ຮອງເຈົ້າເມືອງ 9 ຕົວເມືອງ ແລະແຂກທີ່ຖືກເຊີນເຂົ້າຮ່ວມຢ່າງຫຼວງຫຼາຍ.

ງານຕະຫຼາດນັດແຮງງານ ໄດ້ຈັດຂຶ້ນເປັນປີທີ 3 ຈຸດປະສົງຂອງການຈັດງານແມ່ນ ເພື່ອສ້າງໂອກາດ ແລະອໍານວຍຄວາມສະດວກ ໃຫ້ຜູ້ຊອກວຽກເຮັດງານທໍາ ແລະບັນດາຫົວໜ່ວຍແຮງງານ ໄດ້ມີເວທີພົບປະກັນແລ້ວນໍາໄປສູ່ການຈ້າງງານ, ເພື່ອສ້າງເງື່ອນໄຂໃຫ້ຜູ້ອອກແຮງງານທີ່ຕ້ອງການພັດທະນາສີມືແຮງງານ ສາມາດເຂົ້າເຖິງສະຖາບັນການສຶກສາຕ່າງໆ ໄດ້ຮັບການຍົກລະດັບສີມືແຮງງານ ໃຫ້ແທດເໝາະກັບຄວາມຕ້ອງການຂອງຕະຫຼາດແຮງງານ,​ ເພື່ອໂຄສະນາຂໍ້ມູນຂ່າວສານຕະຫຼາດແຮງງານ ແລະແນວໂນ້ມຕະຫຼາດແຮງງານໃນອະນາຄົດ, ເພື່ອເປັນເວທີໃນການສົ່ງເສີມການຕະຫຼາດຂອງບັນດາຫົວໜ່ວຍແຮງງານ, ບັນດາໂຄງການ ແລະອົງການຈັດຕັ້ງສັງຄົມ ເຊັ່ນ: ຜະລິດຕະພັນ, ການບໍລິການ ລວມທັງເປີດຊ່ອງທາງໃຫ້ແຕ່ລະອົງກອນໄດ້ຊອກຫາຄູ່ຮ່ວມທຸລະກິດໃໝ່, ເພື່ອຫຼຸດຜ່ອນອັດຕາວ່າງງານ,​ ຫຼຸດຜ່ອນການເຄື່ອນຍ້າຍແຮງງານໄປເຮັດວຽກຢູ່ຕ່າງປະເທດແບບໍ່ຖືກຕ້ອງ ທັງເປັນການສົ່ງເສີມການເຮັດວຽກຢູ່ພາຍໃນປະເທດ, ເພື່ອປູກຈິດສໍານຶກໃຫ້ຜູ້ປະກອບການ ແລະຜູ້ຊອກວຽກເຮັດງານທໍາ ມີຄວາມຮັບຮູ້ ແລະເຂົ້າໃຈຕໍ່ແນວທາງນະໂຍບາຍປ່ຽນແປງໃໝ່ ແລະລະບຽບກົດໝາຍທີ່ກ່ຽວຂ້ອງກັບວຽກງານແຮງງານຫຼາຍຂຶ້ນ.

ພາຍໃນງານມີບັນດາອົງການຈັດຕັ້ງພາກລັດ, ​ພາກເອກະຊົນ, ຫົວໜ່ວຍແຮງງານ, ໂຄງການ, ເຂດເສດຖະກິດພິເສດ, ບໍລິສັດຈັດຫາງານ, ສະຖາບັນການສຶກສາ, ສູນຝຶກວິຊາຊີບ ແລະມີບັນດາຊາວຄ້າຂາຍເຂົ້າຮ່ວມຕັ້ງ ຈໍານວນ 300 ບູດ ໃນນີ້ມີ: ບູ໊ດຮັບສະໝັກງານ ຈໍານວນ 49 ບູ໊ດ, ບູ໊ດວາງສະແດງ ແລະໂຄສະນາສິນຄ້າ ຈໍານວນ 31 ບູ໊ດ ແລະບູ໊ດຂາຍສິນຄ້າທົ່ວໄປ (ຂາຍເຄື່ອງອຸປະໂພກ ແລະບໍລິໂພກ) ຈໍານວນ 220 ບູ໊ດ.


ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ