• ກວດພະຍາດຕາ ແລະແຈກແວ່ນຕາຟຣີ

ໂດຍ: ສີເປື້ອນມື 15 ຕຸລາ 2019 (10.54 ນ.) Read : 192

ສາທາລະນະສຸກແຂວງ ສະຫວັນນະເຂດ ຮ່ວມກັບຂະແໜງປິ່ນປົວ ແລະຮັກສາສຸຂະພາບຕາ ໄດ້ຈັດກິດຈະກໍາສະເຫລີມສະຫລອງວັນສາຍຕາໂລກ ຄົບຮອບ 106 ປີ (10/10/1913-10/10/ 2019) ຂຶ້ນໃນວັນທີ 11/10/ 2019 ທີ່ຫ້ອງການຂະແໜງດັ່ງກ່າວໂດຍມີທ່ານນາງ ບຸນ ເຍື້ອນ ທິດພຸດທະວົງ ກໍາມະການປະຈໍາພັກແຂວງ ປະທານກວດກາພັກ-ລັດແຂວງ, ທ່ານ​ນາງ ດຣ ຈັນດອນ ມະນີພູໃສ ຮອງ ຫົວໜ້າພະແນກ ສາທາລະນະສຸກແຂວງ, ມີຂະແໜງການຕ່າງໆອ້ອມຂ້າງແຂວງ ນະຄອນໄກສອນ ພົມວິຫານ ອໍານາດການປົກຄອງທ້ອງຖິ່ນ ແລະພໍ່ແມ່ປະຊາຊົນເຂົ້າຮ່ວມ ດ້ວຍການກວດເຊັກສຸຂະພາບ-ວັດແທກສາຍຕາ ແລະແຈກ ແວ່ນຕາຟ​ຣີ.
ການສະເຫລີມສະຫລອງວັນສາຍຕາໂລກປີນີ້ ແມ່ນເປັນການນໍາສະເໜີຜົນງານການຈັດຕັ້ງປະຕິບັດໂຄງການ ແລະວິໄສທັດປີ 2020 ທັງເປັນການປຸກລະດົມໃຫ້ທຸກພາກສ່ວນໄດ້ເຂົ້າຮ່ວມໃນຂະບວນການປ້ອງກັນ ແລະປິ່ນປົວການເປັນຕາບອດ ຊຶ່ງການເປັນຕາບອດສາມາດຫລີກລ້ຽງໄດ້ ເຖິງ 80% ໃນນີ້ 20% ແມ່ນຈາການປ້ອງກັນການເປັນຕາບອດແຕ່ຫົວທີ ແລະ60% ແມ່ນໄດ້ຈາກການປິ່ນປົວການເປັນຕາບອດ ເຮັດໃຫ້ຄົນເຈັບສາມາດກັບມາເບິ່ງເຫັນເປັນປົກກະຕິ.
ຈາກສະຖິຕິໂລກໃຫ້ຮູ້ວ່າ: ທຸກໆວິນາທີໃດຈະມີຄົນເປັນຕາບອດ 1 ຄົນ, ສໍາລັບເດັກນ້ອຍ ທຸກໆ 1 ນາທີ ໃດຈະມີເດັກເປັນຕາບອດ 1 ກໍລະນີ ໃນນີ້ 90% ຂອງຕາບອດແມ່ນພົບເຫັນໃນປະເທດກໍາລົງພັດທະນາ ແຕ່ເຖິງຢ່າງໃດກໍດີ ຖ້າຫາກທຸກພາກສ່ວນໃຫ້ຄວາມສໍາຄັນ ໃນການປ້ອງກັນແຕ່ຫົວທີ ເຊັ່ນ: ການປ້ອງກັນການເປັນພະຍາດຕາ, ການໃຫ້ຢາ vit A ແກ່ເດັກໃນໄວອັນຄວນ, ການຕອບສະໜອງແວ່ນຕາໃຫ້ຄົນທີ່ມີບັນຫາທາງສາຍຕາຕະຫລອດເຖິງການປິ່ນປົວພະຍາດຊຶມເຊື້ອຂອງຕາ, ການຜ່າຕັດພະຍາດແກ່ນຕາຂຸ້ນ ເພື່ອໃສ່ແກ່ນຕາທຽມ ແລະອື່ນໆ ພວກເຮົາກໍສາມາດແກ້ໄຂບັນຫາການເປັນຕາບອດໄດ້.
ຊຶ່ງກະຊວງສາທາລະນະສຸກ ກໍໄດ້ຖືວຽກງານປ້ອງກັນ ແລະປິ່ນປົວຄົນເຈັບທີ່ມີບັນຫາສາຍຕາບົກຜ່ອງເປັນໜຶ່ງ ໃນບັນດາວຽກທີ່ເປັນບູລິມະສິດ ເພື່ອປ້ອງກັນ ແລະປິ່ນປົວ ໃຫ້ແກ່ຄົນເຈັບທີ່ມີບັນຫາທາງສາຍຕາແລະສູ້ຊົນໃຫ້ບັນລຸເປົ້າໝາຍໃນການກວດຄົນເຈັບນອກ ແລະນອນປິ່ນປົວ ໂດຍສະເພາະສູ້ຊົນໃຫ້ໄດ້ຜ່າຕັດແກ່ນຕາຂຸ້ນໃນຈຸດຄົງທີ່ ແລະເຄື່ອນທີ່. ແຂວງສະຫວັນນະເຂດ ກໍໄດ້ເອົາໃຈໃສ່ບໍລິການຄົນເຈັບເຂດນອກ ຊຶ່ງໃນ 8 ເດືອນປີ 2019 ໄດ້ 4.230 ຄົນ, ປິ່ນປົວໄດ້ 320 ກໍລະນີ, ຜ່າຕັດແກ່ນຕາຂຸ້ນໄດ້ 854 ກໍລະນີ,ໃນນີ້ຜ່າຕັດໃຫຍ່ 287 ກໍລະນີ, ຜ່າຕັດກາງ ແລະນ້ອຍ 287, ບໍລິການຕັດແວ່ນຕາ ແລະຂອບໄດ້ 668 ອັນ.ຊຶ່ງຂະແໜງປິ່ນປົວ ແລະຮັກສາສຸຂະພາບຕາມີພະນັກງານ ແພດໝໍ 24 ຄົນ, ຍິງ 14 ຄົນ, ພະນັກງານຕາມສັນຍາ 3 ຄົນ, ຍິງ 2 ຄົນ, ພະນັກງານຝຶກງານ 3 ຄົນ, ຍິງ 1 ຄົນ ໃນນີ້ເປັນຊ່ຽວຊານຈັກຂຸວິທະຍາ 2 ຄົນ, ປະລິນຍາຕີການຢາ 4 ຄົນ, ແພດ ຊັ້ງສູງ 6 ຄົນ, ກາງ 4 ຄົນ, ຕົ້ນ 3 ຄົນ. ຈາກນັ້ນມີພະນັກງານການເງິນ, ແມ່ບ້ານ, ອະນາໄມ.

ທີ່ມາ: ສະຫວັນພັດທະນາ ຂ່າວ / Savanhphuttana News
  • ຮູບພາບ

  • ແທັກທີ່ກ່ຽວຂ້ອງ