• ເຈົ້າແຂວງຫລວງນໍ້າທາ ລົງຢ້ຽມຢາມຊຸກຍູ້ ໂຄງການທາງລົດໄຟລາວ-ຈີນ ເຂດນາເຕີຍ

ໂດຍ: ສີເປື້ອນມື 10 ຕຸລາ 2019 (11.59 ນ.) Read : 179

ໃນວັນທີ 7 ຕຸລາ 2019 ຜ່ານມາ, ທ່ານ ເພັດຖາວອນ ພິລະວັນ ເຈົ້າແຂວງຫລວງນ້ຳທາ ພ້ອມດ້ວຍທ່ານຮອງເຈົ້າແຂວງ ແລະ ຄະນະໄດ້ລົງຢ້ຽມຢາມໂຄງການກໍ່ສ້າງທາງລົດໄຟລາວ-ຈີນ ແລະ ພົບປະໂອ້ລົມປະຊາຊົນບ້ານນາເຕີຍ ຜູ້ທີ່ໄດ້ຮັບຜົນກະທົບຈາກໂຄງການກໍ່ສ້າງເສັ້ນທາງລົດໄຟລາວ-ຈີນ.
ທ່ານ ທອງແດງ ສີດທິສົນ ສະມາຊິກສະພາປະຊາຊົນແຂວງ, ທັງເປັນຫົວໜ້າຄະນະກໍາມະການໄກ່ເກ່ຍ ແລະ ເບີກຈ່າຍຄ່າຊົດເຊີຍ ຜູ້ທີ່ໄດ້ຮັບຜົນກະທົບໂຄງການກໍ່ສ້າງເສັ້ນທາງລົດໄຟລາວ-ຈີນ ໄດ້ໃຫ້ຮູ້ວ່າ: ການຈັດຕັ້ງປະຕິບັດໂຄງການກໍ່ສ້າງທາງລົດໄຟລາວ-ຈີນ ແມ່ນໄດ້ເລີ່ມແຕ່ບໍເຕ່ນຊາຍແດນລາວ-ຈີນ ຫານະຄອນຫລວງວຽງຈັນ ມີຄວາມຍາວທັງໝົດ 409 ກິໂລແມັດ, ແລວທາງລົດໄຟໄດ້ຜ່ານແຂວງຫລວງນໍ້າທາ ມີ 16,9 ກິໂລແມັດ, ປະກອບມີ 2 ສະຖານີຄື: ສະຖານີບໍ່ເຕ່ນ ເປັນສະຖານີສຳລັບຜູ້ໂດຍສານ ແລະ ສະຖານີນາເຕີຍ ເປັນສະຖານີໃຫຍ່ ສຳລັບຜູ້ໂດຍສານ ແລະ ຄ່ຽນຖ່າຍສິນຄ້າ, ໃນການກໍ່ສ້າງດັ່ງກ່າວແມ່ນໄດ້ສ້າງຂົວໃຫຍ່ຈໍານວນ 7 ແຫ່ງ ແລະ ເຈາະອຸໂມງ 3 ແຫ່ງຄື: ອຸໂມງມິດຕະພາບລາວ-ຈີນ, ອຸໂມງບໍ່ເຕນ ແລະ ອຸໂມງຕີນຕົກ ເຊິ່ງມີຄວາມຍາວທັງໝົດ 10.051 ແມັດ, ປະຕິບັດໄດ້ 9.056 ແມັດເທົ່າກັບ 90,1% ໂດຍແມ່ນບໍລິສັດ ກໍ່ສ້າງທາງລົດໄຟເລກ 5 ແລະ ບໍລິສັດກໍ່ສ້າງທາງລົດໄຟເລກ 2 ເປັນຜູ້ຮັບເໝົາກໍ່ສ້າງຈາກ ສປ ຈີນ. ສຳລັບວຽກງານກໍ່ສ້າງເສົາຂົວ, ກໍ່ສ້າງຂ້າງຂົວ, ກໍ່ສ້າງກັນເຈື່ອນ, ກໍ່ສ້າງຄັນຄູທາງ ແລະ ອື່ນໆ ມາເຖິງປັດຈຸບັນໄດ້ສຳເລັດແລ້ວ 80% ແລະ ຄາດວ່າຈະໃຫ້ສຳເລັດໃນທ້າຍປີ 2019, ພ້ອມນີ້ ຍັງຈະໄດ້ຕິດຕັ້ງລະບົບລາງລົດໄຟ ແລະ ລະບົບໄຟຟ້າ ເພື່ອສະໜອງໄຟຟ້າໃຫ້ແກ່ຂະບວນລົດໄຟ ໃຫ້ສຳເລັດໃນທ້າຍປີ 2021 ຕາມແຜນການຂອງສອງລັດຖະບານລາວ-ຈີນ ໄດ້ກຳນົດໄວ້.
ໂອກາດນີ້, ທ່ານ ຄໍາໄຫລ ສີປະເສີດ ຮອງເຈົ້າແຂວງຫລວງນໍ້າທາ ກໍໄດ້ໂອ້ລົມປະຊາຊົນບ້ານນາເຕີຍ ທີ່ໄດ້ຮັບຜົນກະທົບຈາກໂຄງການກໍ່ສ້າງເສັ້ນທາງລົດໄຟ ລາວ-ຈີນ ລວມມີທັງໜົດ 4 ບ້ານຄຶຶ: ບ້ານນາເຕ່ນ, ບ້ານບໍ່ປຽດ, ບ້ານຕີນຕົກ ແລະ ບ້ານນາເຕີຍ, ມີຜູ້ຮັບຜົນກະທົບທັງໜົດ 331 ຄອບຄົວ, ມາເຖິງປັດຈຸບັນແຂວງຫລວງນ້ຳທາ ໄດ້ຮັບເງິນຊົດເຊີຍສິ່ງກີດຂວາງຈາກໂຄງການກໍ່ສ້າງເສັ້ນທາງລົດໄຟລາວ-ຈີນ ແລ້ວຈຳນວນ 5 ງວດ, ມີ 92 ຕື້ກວ່າກີບ ແລະ ໄດ້ເບີກຈ່າຍໃຫ້ຜູ້ທີ່ໄດ້ຮັບຜົນກະທົບໄປ ແລ້ວຈຳນວນ 171 ຄອບຄົວ, ຍັງບໍ່ທັນໄດ້ເບີກຈ່າຍ 160 ຄອບຄົວ, ລວມເປັນເງີນ 89,4 ຕື້ກວ່າກີບ ແລະ ຈະໄດ້ສືບຕໍ່ຈັດຕັ້ງປະຕິບັດ ແຜນການຊົດເຊີຍງວດທີ 6 ໃຫ້ແກ່ປະຊາຊົນຜູ້ທີ່ໄດ້ຮັບຜົນກະທົບຈຳນວນ 40 ຄອບຄົວ, ຢູ່ບ້ານນາເຕີຍໃນມູນຄ່າ 26,4 ຕື້ກວ່າກີບ. ສໍາລັບການຍົກຍ້າຍ-ຈັດສັນຜູ້ທີ່ໄດ້ຮັບຜົນກະທົບ ລັດຖະບານຈີນຈະໃຫ້ເງິນຊ່ວຍເຫລືອລ້າແກ່ລັດຖະບານລາວຈຳນວນ 250 ລ້ານຢວນ ຫລືປະມານ 325 ຕື້ກີບ ເພື່ອມາຈັດສັນບ້ານໃໝ່ຈຳນວນ 4 ບ້ານ 3 ແຂວງຄື: ແຂວງຫລວງນ້ຳທາ, ອຸດົມໄຊ ແລະ ແຂວງຫລວງພະບາງ.
ຂ່າວ: ມຸນຕີ

ທີ່ມາ: ປະເທດລາວ Pathedlao
  • ຮູບພາບ

  • ແທັກທີ່ກ່ຽວຂ້ອງ