• ລາວ ໂທລະຄົມ ທົດລອງນໍາໃຊ້ຄວາມແຮງ ລະບົບ 5G

ໂດຍ: ສີເປື້ອນມື 08 ຕຸລາ 2019 (13.49 ນ.) Read : 229

ໃນວັນທີ 08 ຕຸລາ 2019 ທາງບໍລິສັດ ລາວ ໂທລະຄົມມະນາຄົມ ມະຫາຊົນ ໄດ້ເປີດທົດລອງນໍາໃຊ້ ລະບົບ 5G ເປັນຄັ້ງທໍາອິດໃນ ສປປ ລາວ ທີ່ຕຶກລາວໂທລະຄົມ ສໍານັກງານໃຫຍ່ ສາຍລົມ . ໃຫ້ກຽດເຂົ້າຮ່ວມໃນງານມີ: ທ່ານ ສຸພົນ ຈັນທະວີໄຊ ຕາງໜ້າຜູ້ອໍານວຍການໃຫຍ່ ທັງເປັນຮອງຜູ້ອໍານວຍການໃຫຍ່ ຂະແໜງເຕັກນິກຂອງບໍລິສັດ ລາວ ໂທລະຄົມມະນາຄົມ, ທ່ານ ທັນສະໄໝ ຊາມຸນຕີ ຫົວໜ້າຄະນະພັດທະນາຄຸນນະພາບການບໍລິການ ແລະບັນດາທ່ານຕາງໜ້າຈາກບັນດາກະຊວງ ໄປສະນີ ໂທລະຄົມມະນາຄົມ ແລະ ການສື່ສານ, ຄະນະບໍລິຫານ-ພະນັກງານ ລາວ ໂທລະຄົມ ແລະສື່ມວນຊົນຢ່າງຫຼວງຫຼາຍ.

ເຕັກໂນໂລຊີ ຫຼືການສື່ສານ 5G ໃນຍຸກທີ 5 (Fifth Generation) ຖືກພັດທະນາຂຶ້ນໃຫ້ມີປະສິດທິພາບສູງກວ່າ 4G ເພື່ອໃຫ້ສາມາດຕອບສະໜອງຕາມຄວາມຮຽກຮ້ອງຕ້ອງການຂອງຜູ້ຊົມໃຊ້ທີ່ປ່ຽນແປງໄປເລື້ອຍໆ. ສໍາລັບຄຸນນະສົມບັດພິເສດຫຼັກໆຂອງເຕັກໂນໂລຊີ 5G ມີ ຄື: ຄວາມໄວ ໃນການຮັບ-ສົ່ງຂໍ້ມູນທີ່ໄວກວ່າ 4G ເຖິງ 20 ເທົ່າ. ຍົກຕົວຢ່າງ: ເມື່ອດາວໂຫຼດຮູບເງົາທີ່ມີຄວາມຍາວ 2 ຊົ່ວໂມງ 4G ຈະໃຊ້ເວລາປະມານ 6-7 ນາທີ ໃນຂະນະທີ່ 5G ຈະໃຊ້ເວລາພຽງ 3-4 ວິນາທີ, ການເບິ່ງຮູບເງົາ ມີຄວາມລະອຽດສູງລະດັບ HD 4K ຈະເປັນອຸປະສັກອີກຕໍ່ໄປ, ສາມາດປົດລ໋ອກຄຸນນະສົມບັດສູງສຸດຂອງ AR (Augmented Reality) ແລະ VR (Virtual Reality) ກັບປະສົບການທີ່ສົມຈິງທີ່ເກີດຈາກການໃຊ້ຂໍ້ມູນຈໍານວນຫຼາຍໃນການປະມວນຜົນ ເຊິ່ງ 5G ຈະຕອບໂຈດໃນການສື່ສານຜ່ານ AR ແລະ VR ໄດ້ຢ່າງສົມບູນແບບ.

ຄວາມສາມາດໃນການຮອງຮັບການເຊື່ອມຕໍ່ ເຊິ່ງສາມາດຮອງຮັບອຸປະກອນໄດ້ຫຼາຍກວ່າ 4G ເຖິງ 10 ເທົ່າ ຫຼືເທົ່າກັບ 1 ລ້ານ ອຸປະກອນ/sq.km ດ້ວຍລະບົບ 5G ຈະໄດ້ເປີດໂລກ IOT (Internet of Things) ໄດ້ຢ່າງແທ້ຈິງ ແລະຈະເປັນພື້ນຖານຮອງຮັບ ການພັດທະນາເຕັກໂນໂລຊີ Smart Home, Smart City, Smart Transportation, Smart life, Smart Health ແລະອື່ນໆ ໂດຍສັ່ງການຜ່ານໂທລະສັບມືຖືຂອງຄົນເຮົາໄດ້ ຫຼືອຸປະກອນແຕ່ລະຊະນິດສາມາດສື່ສານກັນເອງໄດ້, ຄວບຄຸມກັນໄດ້ ແລະເຮັດວຽກປະສານກັນໄດ້ຢ່າງອັດຕະໂນມັດ.

ເວລາໃນການຕອບສະໜອງ-ໂຕ້ຕອບ ສັ້ນລົງເຖິງ 1 ມິລລີວິນາທີ (1ms) ດ້ວຍຄຸນນະສົມບັດພິເສດດັ່ງກ່າວ 5G ຈະສາມາດຕອບໂຈດ ໃນສ່ວນຂອງກຸ່ມຄົນທີ່ມັກຫຼິ້ນເກມ ເຊິ່ງຕ້ອງການຄວາມໄວໃນການໂຕ້ຕອບສູງ ຫຼືເວົ້າອີກຢ່າງໜຶ່ງຄື ຖ້າ Latency ຍິ່ງຕໍ່າແມ່ນຍິ່ງດີ, ຕອບໂຈດໃນການຂັບຂີ່ແບບບໍ່ມີຄົນຂັບທີ່ມີຄວາມປອດໄພສູງ ແລະນໍາໃຊ້ໃນທາງການແພດ ເຊັ່ນ: ການຜ່າຕັດທາງໄກ ແລະອື່ນໆ.

ການເປີດທົດລອງນໍາໃຊ້ 5G ໃນຄັ້ງນີ້ ຖືໄດ້ວ່າເປັນອີກບາດກ້າວໜຶ່ງໃນຄວາມພະຍາຍາມຂອງ ລາວ ໂທລະຄົມ ໃນການນໍາເອົາເຕັກນິກວິທະຍາສາດ ເຕັກໂນໂລຊີໃໝ່ທີ່ກ້າວໜ້າ ແລະທັນສະໄໝ ໄດ້ມາດຕະຖານທຽບເທົ່າສາກົນ ຕອບສະໜອງຄວາມຕ້ອງການຂອງສັງຄົມ ເພື່ອເຮັດໃຫ້ສັງຄົມລາວກ້າວໄປສູ່ສັງຄົມທີ່ທັນຍຸກທັນສະໄໝ ໃນຍຸກແຫ່ງ Digital Life ເທື່ອລະກ້າວ ພ້ອມດຽວກັນກໍເປັນການ ສົ່ງເສີມພັດທະນາທຸລະກິດ ໂທລະຄົມມະນາຄົມ ໃຫ້ທຽບທັນ ແລະສາມາດເຊື່ອມໂຍງກັບບັນດາປະເທດໃນຂົງເຂດພາກພື້ນ ແລະສາກົນ.


ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ

  • #LaoTelecom