• ໄວໜຸ່ມອິນໂດ ປະທ້ວງກົດໝາຍ ຫ້າມມີເພດສໍາພັນກ່ອນແຕ່ງ

ໂດຍ: ສີເປື້ອນມື 30 ກັນຍາ 2019 (16.08 ນ.) Read : 181

ສະມາຊິກລັດຖະສະພານິຕິບັນຍັດສາຍອານຸລັກນິຍົມທີ່ເຄັ່ງຄັດສາສະໜາອິດສະລາມໃນອິນເນເຊຍພະຍາຍາມພັກດັນໃຫ້ສະພາແຫ່ງຊາດຂອງອິນໂດຮັບຮອງກົດໝາຍອາຍາ ຫ້າມມີເພດສຳພັນກ່ອນການແຕ່ງດອງ ແລະຫ້າມການມີເພດສຳພັນລະຫວ່າງຄົນເພດດຽວກັນ ເຮັດໃຫ້ເກີດມີການວິພາກວິຈານຈາກປະຊາຊົນຢ່າງກວ້າງຂວາງ ໂດຍສະເພາະແມ່ນໄວໜຸ່ມ ຈົນຕ້ອງໄດ້ເດີນຂະບວນປະທ້ອງພຸ້ນລະ!!!
ດ້ວຍຄວາມບໍ່ເຫັນດີເຫັນພ້ອມຕໍ່ກົດໝາຍດັ່ງກ່າວ ຊາວອິນໂດເນເຊຍຫຼາຍກວ່າ 500.000 ຄົນຕ້ອງລົງຄະແນນສຽງຄັດຄ້ານ ໂດຍອ້າງວ່າເປັນການລະເມີດເລື່ອງເທິງຕຽງຂອງປະຊາຊົນ ໂດຍສະເພາະໄວໜຸ່ມໄດ້ອອກມາຊຸມນຸມປະທ້ວງຢ່າງຫຼວງຫຼາຍໃນນະຄອນຫຼວງຈາກາຕາ ແລະມາຄັສເທິງເກາະສຸລາເວສີເປັນເວລາ 2 ວັນຕິດຕໍ່ກັນນັບແຕ່ວັນທີ 24-25 ກັນຍາ 2019 ເຮັດໃຫ້ທາງການຕ້ອງສົ່ງເຈົ້າໜ້າທີ່ລົງຄວບຄຸມສະຖານະການເຖິງ 5000 ຄົນ.
ມາຮອດວັນທີ 25 ກັນຍາ ເຈົ້າໜ້າທີ່ຕຳຫຼວດເຖິງຂັ້ນໃຊ້ແກັດນ້ຳຕາ ແລະສີດນ້ຳ ເພື່ອສະຫຼາຍການຊຸມນຸມປະທ້ວງ ອັນເນື່ອງມາຈາກກົດໝາຍໃໝ່ທີ່ຫ້າມບໍ່ໃຫ້ມີເພດສຳພັນກ່ອນແຕ່ງງານ ລວມເຖິງການລົງໂທດຄົນຄົບຊູ້ ຕະຫຼອດຮອດການຂົ່ມຂືນໃຫ້ລົງໂທດຈຳຄຸກ 4 ປີ ນອກນີ້ຍັງມີເນື້ອໃນທີ່ລະບຸກ່ຽວກັບການທຳແທ້ງອີກດ້ວຍ.
Nahdlatul Ulama ກຸ່ມມຸສລີມທີ່ໃຫຍ່ສຸດຂອງອິນໂດເນເຊຍ ເຊື່ອວ່າການຮັບຮອງ ແລະປະກາດນຳໃຊ້ກົດໝາຍອາຍາວ່າດ້ວຍການຫ້າມມີເພດສຳພັນກ່ອນແຕ່ງນັ້ນແມ່ນເປັນການສະທ້ອນໃຫ້ເຫັນເຖິງຄຸນລັກສະນະ ແລະບຸກຂະລິກກະພາບຂອງປະເທດອິນໂດເນເຊຍໂດຍແທ້.
ໂດຍຕາມກົດໝາຍໃໝ່ທີ່ວ່ານີ້ຜູ້ທີ່ມີເພດສຳພັນກ່ອນການແຕ່ງດອງຕ້ອງຖືກຈຳຄຸກ 6 ເດືອນຫາ 1 ປີບໍ່ລວມໂທດປັບໃໝ ນອກຈາກນີ້ຍັງລົງໂທດຜູ້ທີ່ສະແດງ ຫຼື ສະເໜີຄວາມຮູ້ເລື່ອງການຄຸມກຳເນີດແກ່ຜູ້ທີ່ມີອາຍຸຕ່ຳກວ່າ 18 ປີ ນັ້ນໝາຍເຖິງພໍ່ແມ່ບໍ່ສາມາດສອນລູກໆກ່ຽວກັບເພດສຳພັນ ແລະການຄຸມກຳເນີດໄດ້.
ຢ່າງໃດກໍ່ຕາມ ດ້ວຍສຽງຄັດຄ້ານຈາກປະຊາຊົນຈຳນວນຫຼາຍຄືດັ່ງກ່າວ ໃນວັນທີ 20 ກັນຍາ ຜ່ານມາປະທານາທິບໍດີ ໂຈໂກ ວິໂດໂດ ທີ່ຫາກໍ່ຊະນະການເລືອກຕັ້ງເມື່ອບໍ່ດົນມານີ້ກໍ່ໄດ້ອອກມາຖະແຫຼງແລ້ວວ່າ ໃຫ້ສະພາຜູ້ແທນລາດຊະດອນໂຈະການລົງມະຕິຮັບຮອງກົດໝາຍອາຍາສະບັບໃໝ່ທີ່ວ່ານີ້ກ່ອນ ໂດຍທ່ານໃຫ້ເຫດຜົນວ່າ ຮ່າງກົດໝາຍໃໝ່ມີຄວາມຈຳເປັນຕ້ອງໃຊ້ການພິຈາລະນາໃຫ້ຫຼາຍຂຶ້ນກວ່ານີ້.


ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ