• ອຸດົມໄຊ ຫາລືການເບີກຈ່າຍເງິນຊົດເຊີຍ ໂຄງການທາງລົດໄຟ ລາວ-ຈີນ

ໂດຍ: ສີເປື້ອນມື 24 ກັນຍາ 2019 (10.36 ນ.) Read : 181

ເມື່ອບໍ່ດົນມານີ້, ແຂວງອຸດົມໄຊ ຈັດກອງປະຊຸມປຶກສາຫາລື ກ່ຽວກັບການເບີກຈ່າຍເງິນ ຊົດເຊີຍ ຜົນກະທົບຈາກໂຄງການກໍ່ສ້າງເສັ້ນທາງລົດໄຟ ລາວ-ຈີນ ຊ່ວງຜ່ານແຂວງອຸດົມໄຊ ປະຈຳງວດທີ 2 ພາຍໃຕ້ການເປັນປະທານຂອງ ທ່ານ ສົມຈິດ ປັນຍາສັກ ຮອງເຈົ້າແຂວງອຸດົມໄຊ, ມິີຜູ້ຕາງໜ້າຂະແໜງການກ່ຽວຂ້ອງ ແລະ ພະນັກງານວິຊາການເຂົ້າຮ່ວມ ເຊິ່ງແຜນການເບີກຈ່າຍ ປະຈຳງວດທີ 2 ໂຄງການກໍ່ສ້າງເສັ້ນທາງລົດໄຟລາວ-ຈີນ ສະເພາະແຂວງອຸດົມໄຊ ມີທັງໝົດ 16 ບ້ານ, ໃນນັ້ນ ເມືອງນາໝໍ້ 5 ບ້ານ, ເມືອງໄຊ 5 ບ້ານ ແລະ ເມືອງງາ 6 ບ້ານ ລວມມູນຄ່າທັງໝົດ 47,4 ຕື້ກວ່າກີບ.
ໃນກອງປະຊຸມ ໄດ້ປະກອບຄໍາເຫັນ ຕໍ່ກັບການເບີກຈ່າຍເງິນດັ່ງກ່າວ ໃນໄລຍະຜ່ານມາ ລວມທັງແຜນການທີ່ຈະເບີກຈ່າຍງວດຕໍ່ໄປ ໂດຍສະເພາະແມ່ນ ຮູບແບບ, ວິທີ, ຂັ້ນຕອນຕ່າງໆ ແລະ ວັນເວລາ ເພື່ອເຮັດໃຫ້ການເບີກຈ່າຍມີຄວາມສະດວກ, ຖືກຕ້ອງ, ໂປ່ງໃສ ແລະ ວ່ອງໄວ, ເພື່ອຮັບປະກັນໃຫ້ ການເບີກຈ່າຍເງິນຄ່າຊົດເຊີຍ ຕໍ່ຜົນກະທົບຂອງໂຄງການກໍ່ສ້າງເສັ້ນທາງລົດໄຟ ລາວ-ຈີນ ຢູ່ແຂວງອຸດົມໄຊ ໃນງວດ 2 ໃຫ້ສໍາເລັດໂດຍໄວ, ຖືກຕ້ອງກັບຜົນກະທົບຕົວຈິງ ຮັບປະກັນບໍ່ໃຫ້ມີຫາງສຽງຈົ່ມວ່າຈາກສັງຄົມ.
ສຳລັບການເບີກຈ່າຍເງິນຊົດເຊີຍ ແລະ ເງິນຄ່າເຂົ້າ ໄລຍະຜ່ານມາ ໂດຍສະເພາະໃນປີ 2017 ຈຳນວນ 3 ເມືອງ ລວມເປັນເງິນ 1,7 ຕື້ກວ່າກີບ ແລະ ປີ 2018 ຈຳນວນ 2,2 ຕື້ກວ່າກີບ ໃນນັ້ນ ເມືອງນາໝໍ້ ມີຈຳນວນ 10 ບ້ານ 85 ຄອບຄົວ ຍັງຄ້າງຈ່າຍ 31 ຄອບຄົວ, ເມືອງໄຊ 13 ບ້ານ 296 ຄອບຄົວ ຍັງຄ້າງຈ່າຍ 17 ຄອບຄົວ, ເມືອງງາ 9 ບ້ານ 187 ຄອບຄົວ. ນອກນັ້ນ ຍັງໄດ້ຈ່າຍເງິນຊົດເຊີຍຜົນກະທົບ ປະຈຳງວດທີ 1 ໂດຍສະເພາະແມ່ນ ຄ່າທີ່ດິນ, ຜົນລະປູກ ຢູ່ເມືອງໄຊ ຈຳນວນ 13 ຄອບຄົວ ລວມມູນຄ່າ 4,6 ຕື້ ກວ່າກີບ, ຄ່າໂຮງຮຽນບ້ານຫ້ວຍຂຸມ 15 ຕື້ກວ່າກີບ.

ທີ່ມາ: ປະເທດລາວ Pathedlao
  • ຮູບພາບ

  • ແທັກທີ່ກ່ຽວຂ້ອງ