• ຄໍາເພົ້າ ສັ່ງໄດ້ ຂະຫຍາຍສາຂາ ສູ່ບ້ານເກີດແຂວງ ຊຽງຂວາງ

ໂດຍ: ສີເປື້ອນມື 17 ກັນຍາ 2019 (11.19 ນ.) Read : 961

ໃນຕອນຄໍ່າຂອງວັນທີ 14 ກັນຍາ 2019 ຜ່ານມາ ໄດ້ມີການຈັດພິທີເປີດຮ້ານຕັດຫຍິບ ຄໍາເພົ້າ ສັ່ງໄດ້ ສາຂາແຂວງ ຊຽງຂວາງ ຢ່າງເປັນທາງການ ຢູ່ທີ່ ພັດຕະຄານ ລາວສໍາພັນ ເມືອງ ແປກ ແຂວງ ຊຽງຂວາງ. ໃຫ້ກຽດເຂົ້າຮ່ວມງານດັ່ງກ່າວ ໄດ້ແກ່: ທ່ານ ບົວເງິນ ຫຸມໄຊຍະພົມ ຫົວໜ້າພະແນກແຜນການ ແລະ ການລົງທຶນ ແຂວງ ຊຽງຂວາງ, ທ່ານ ຄໍາເພົ້າ ບົວພັນ ນັກອອກແບບ ແລະເຈົ້າຂອງຮ້ານຕັດຫຍິບ ຄໍາເພົ້າ ສັ່ງໄດ້, ທ່ານ ວິກສໍາພັນ ຈັນມະວົງ ປະທານບໍລິສັດ Lao Service Korea (LSK) ຈໍາກັດ ພ້ອມທັງເປັນຫຸ້ນສ່ວນຂອງຮ້ານຕັດຫຍິບ ຄໍາເພົ້າ ສັ່ງໄດ້  ສາຂາແຂວງ ຊຽງຂວາງ, ນາຍແບບ-ນາງແບບ, ສິລະປິນຈາກນະຄອນຫຼວງວຽງຈັນ ແລະມວນຊົນພາຍໃນແຂວງ ຊຽງຂວາງ ເຂົ້າຮ່ວມຢ່າງຫຼວງຫຼາຍ. ງານດັ່ງກ່າວ ໄດ້ຮັບການສະໜັບສະໜູນໂດຍ: ຈັດງານໂດຍ ບໍລິສັດ ກ້າວໜ້າລາວ ເອັນເຕີເທັນເມັນ ຈໍາກັດ, ຮ້ານຕັດຫຍິບ ຄໍາເພົ້າ ສັ່ງໄດ້, ບໍລິສັດ Lao Service Korea (LSK) ຈໍາກັດ, ພັດຕະຄານ ລາວສໍາພັນ, ຫ້ອງເສື້ອ ເອກໂພໄຊ ຜ້າໄໝ, ບໍລິສັດ ຄໍາສົນ ພັດທະນາ ກໍ່ສ້າງ ຈໍາກັດ ແລະກຸ່ມໂຮງແຮມ ວັນຊະນະ.

ຮ້ານຕັດຫຍິບ ຄໍາເພົ້າ ສັ່ງໄດ້ ເປັນຮ້ານຕັດຫຍິບໜຶ່ງທີ່ມີຊື່ສຽງໂດ່ງດັງໃນປະເທດ ແລະເປັນທີ່ຮູ້ຈັກຂອງບັນດາ ສິລະປິນ, ນັກສະແດງ, ນາຍແບບ-ນາງແບບ, ນັກທຸລະກິດ ແລະບຸກຄົນທົ່ວໄປ.

ທ່ານ ຄໍາເພົ້າ ບົວພັນ ເຈົ້າຂອງຮ້ານຕັດຫຍິບ ຄໍາເພົ້າ ສັ່ງໄດ້ ໄດ້ກ່າວວ່າ: ຈຸດປະສົງຂອງການເປີດສາຂາຢູ່ແຂວງ ຊຽງຂວາງ ແມ່ນເພີ່ມຄວາມສະດວກສະບາຍໃຫ້ລູກຄ້າຢູ່ ຊຽງຂວາງ. ເນື່ອງຈາກເຂົາເຈົ້າບໍ່ຄ່ອຍມີເວລາທີ່ຈະເດີນທາງມາ ນະຄອນຫຼວງວຽງຈັນ ພ້ອມນັ້ນ, ແຂວງ ຊຽງຂວາງ ຍັງເປັນບ້ານເກີດຂອງຂ້າພະເຈົ້າອີກດ້ວຍ ຈຶ່ງຢາກນໍາວົງການແຟຊັ່ນໄປພັດທະນາບ້ານຕົນເອງ. ນອກນັ້ນ, ຮູ້ສຶກປະທັບໃຈ ທີ່ຊາວແຂວງ ຊຽງຂວາງ ກະຕືລືລົ້ນ ແລະໃຫ້ຄວາມສົນໃຈກັບວົງການແຟຊັ່ນ.

ນອກນັ້ນ, ພາຍໃນງານຍັງມີການເດີນແບບ ຈາກນາຍແບບ-ນາງແບບ ທີ່ມີຊື່ສຽງຈາກເວທີການປະກວດລະດັບປະເທດ ໃນນະຄອນຫຼວງວຽງຈັນ ແລະບັນດານາຍແບບ-ນາງແບບ ທີ່ໄດ້ຄັດເລືອກພາຍໃນແຂວງ ຊຽງຂວາງຈໍານວນໜຶ່ງ ພາຍໃຕ້ງານ “Xiengkhouang International Fashion Week” ທັງໝົດ 45 ຄົນ.

ແລະເພື່ອຕໍ່ຍອດຄວາມສໍາເລັດໄປອີກລະດັບໜຶ່ງ ໃນອະນາຄົດ ທາງຮ້ານຕັດຫຍິບ ຄໍາເພົ້າ ສັ່ງໄດ້ ມີແຜນທີ່ຈະຂະຫຍາຍສາຂາໄປທີ່ ນະຄອນປາກເຊ ແຂວງ ຈໍາປາສັກ. ເນື່ອງຈາກມີຖານລູກຄ້າຢູ່ນະຄອນປາກເຊຫຼາຍສົມຄວນ ຈຶ່ງຢາກໄປເປີດສາຂາຢູ່ບ່ອນນັ້ນ ເພື່ອເພີ່ມຄວາມສະດວກສະບາຍໃຫ້ແກ່ລູກຄ້າ.

ຂອບໃຈລູກຄ້າທີ່ເຊື່ອໝັ້ນ ແລະໄວ້ວາງໃຈ ໃຫ້ຮ້ານຄໍາເພົ້າ ສັ່ງໄດ້ ໄດ້ເປັນສ່ວນໜຶ່ງຂອງງານສໍາຄັນຕະຫຼອດມາ ແລະພວກເຮົາຈະພະຍາຍາມພັດທະນາສີມືຂຶ້ນໄປເລື້ອຍໆ ເພື່ອໃຫ້ລູກຄ້າໄດ້ຮັບການບໍລິການທີ່ປະທັບໃຈທີ່ສຸດ.

ຮ້ານຕັດຫຍິບ ຄໍາເພົ້າ ສັ່ງໄດ້ ສາຂາແຂວງ ຊຽງຂວາງ ຕັ້ງຢູ່ບ້ານ ໂພນສະຫວັນ (ຕໍ່ໜ້າທະນາຄານແຂວງ ຊຽງຂວາງ ໃຫ້ກັບຕະຫຼາດພູຄໍາ) ເມືອງ ແປກ ແຂວງ ຊຽງຂວາງ. ເບີໂທລະສັບ 020 5663 1663.


ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ