• ສສຊ ແຂວງ ຈໍາປາສັກ ມອບເຄື່ອງບັນເທົາທຸກ ໃຫ້ຜູ້ປະສົບໄພນ້ຳຖ້ວມ ຢູ່ເມືອງໂຂງ

ໂດຍ: ສີເປື້ອນມື 13 ກັນຍາ 2019 (11.12 ນ.) Read : 223

ໃນວັນທີ 11 ກັນຍາ 2019 ນີ້, ທ່ານ ສົມໄຊ ສີຫາຈັກ ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 15 ແຂວງຈຳປາສັກ ສົມທົບກັບສະມາຊິກສະພາປະຊາຊົນແຂວງຈຳປາສັກ ປະຈຳເຂດເລືອກຕັ້ງເມືອງໂຂງ ແລະ ພາກສ່ວນທີ່ກ່ຽວຂ້ອງ ນຳເອົາເຄື່ອງອຸປະໂພກ ແລະ ບໍລິໂພກ ເປັນຕົ້ນ ເຂົ້າສານ, ເຄື່ອງນຸ່ງຫົ່ມ, ນ້ຳດື່ມ ແລະ ອາຫານແຫ້ງຈຳນວນໜຶ່ງ ໄປມອບໃຫ້ປະຊາຊົນທີ່ໄດ້ຮັບຜົນກະທົບຈາກໄພນ້ຳຖ້ວມ ຢູ່ວັດບ້ານຫ້ວຍໄຮ ທີ່ຂຶ້ນກັບກຸ່ມນາຝັ່ງ ເມືອງໂຂງ ແລ້ວນຳໄປແຈກຢາຍຕໍ່ໃຫ້ແຕ່ລະຄອບຄົວ ເຊິ່ງເຄື່ອງຊ່ວຍເຫລືອດັ່ງກ່າວ ແມ່ນໄດ້ມາຈາກການລະດົມຈາກນັກທຸລະກິດ, ພໍ່ຄ້າຊາວຂ່າຍ ແລະ ພໍ່ແມ່ປະຊາຊົນບັນດາເຜົ່າ.
ທ່ານ ນາງ ຄຳພູ ລິດທິສັກ ສະມາຊິກສະພາປະຊາຊົນແຂວງຈຳປາສັກ ປະຈຳເຂດເລືອກຕັ້ງເມືອງໂຂງ ໄດ້ໃຫ້ຮູ້ວ່າ: ເມືອງໂຂງ ມີທັງໝົດ 114 ບ້ານ, ໃນນີ້ມີບ້ານທີ່ໄດ້ຮັບຜົນກະທົບ 99 ບ້ານ, 4.386 ຄອບຄົວ, ປະຊາຊົນໄດ້ຮັບຄວາມເດືອນຮ້ອນ 21.059 ຄົນ, ຍິງ 11.375 ຄົນ, ມີເນື້ອທີ່ທຳການຜະລິດຖືກຖ້ວມ 3.568 ກວ່າເຮັກຕາ, ໂຮງຮຽນຖືກນ້ຳຖ້ວມບໍ່ສາມາດເປີດຮຽນໄດ້ມີ 40 ແຫ່ງ, ເສັ້ນທາງຖືກຖ້ວມ 12 ເສັ້ນ, ໃນນັ້ນເປ່ເພເສຍຫາຍໜັກບໍ່ສາມາດສັນຈອນໄດ້ມີ 1 ເສັ້ນ (ຈຸດທາງເຂົ້າບ້ານນາຝັ່ງ) ແລະ ໃນຈຳນວນ 99 ບ້ານທີ່ໄດ້ຮັບຜົນກະທົບນັ້ນ ມີບ້ານທີ່ໄດ້ຮັບຜົນກະທົບໜັກຈຳນວນ 6 ບ້ານຄື: ບ້ານຫາງສັນ, ທ່າໂພເໜືອ, ບຸ່ນນ້ອຍ, ນາລານ, ຫ້ວຍໄຮ ແລະ ບ້ານລົມພັດ, ປະຊາຊົນ2.403 ຄົນ ໄດ້ຮັບການອົບພະຍົບໄປສະຖານທີ່ປອດໄພ ແລະ ມາຮອດປັດຈຸບັນ ນ້ຳໄດ້ຄ່ອຍຫລຸດລົງ ປະຊາຊົນບາງຄອບຄົວກໍໄດ້ທະຍອຍເຂົ້າມາເຮືອນຂອງຕົນ ເພື່ອທຳການອະນາໄມ ແລະ ຂົນວັດຖຸສິ່ງຂອງເຄື່ອງໃຊ້ຈຳເປັນເຂົ້າມາເຮືອນ.
ຂ່າວ: ພຸດທະສິນ ວົງວິໄລທອງ

ທີ່ມາ: ປະເທດລາວ Pathedlao
  • ຮູບພາບ

  • ແທັກທີ່ກ່ຽວຂ້ອງ