• ຖົງຢາງອະນາໄມ ຮູບໂສມໃໝ່ 4 ກິ່ນ 4 ອາລົມ

ໂດຍ: ສີເປື້ອນມື 10 ກັນຍາ 2019 (16.15 ນ.) Read : 584

ໃນວັນທີ 08 ກັນຍາ 2019 ທີ່ຜ່ານມາ ໄດ້ມີການຈັດງານເປີດໂຕຜະລິດຕະພັນ ຖົງຢາງອະນາໄມຮູບໂສມໃໝ່ ຢ່າງເປັນທາງການ ທີ່ສູນການຄ້າ ວຽງຈັນເຊັນເຕີ. ໃຫ້ກຽດເຂົ້າຮ່ວມໃນພິທີດັ່ງກ່າວມີ: ທ່ານ ດຣ. ສີສະຫວາດ ສຸດທາລະນິໄຊ ຮອງຫົວໜ້າກົມຄວບຄຸມພະຍາດຕິດຕໍ່ທາງເພດສໍາພັນ ກະຊວງສາທາລະນະສຸກ, ທ່ານ ດຣ. ພູທອນ ສຸດທາລັກ ຫົວໜ້າສູນຕ້ານເອດ ແລະ ພຕພ, ທ່ານ ອີລິກ ຊິດສເຕດ ຫົວໜ້າປະຈໍາພາກພື້ນຂອງອົງການ PSI, ທ່ານ ຊຸດດາອາດ ຂັນຕິວົງ ປະທານບໍລິສັດ ໃສສະອາດ ການຢາ, ທ່ານ ນາງ ລັດຕະນາ ສິນລາດຊະວົງ ຫົວໜ້າຝ່າຍການຕະຫຼາດ ແລະການສື່ສານ ຂອງອົງການ PSI Laos ແລະບັນດາຮ້ານຄ້າຕ່າງໆເຂົ້າຮ່ວມ.

ສູນຕ້ານເອດ ໄດ້ໃຫ້ອົງການ PSI Laos ເຂົ້າມາມີສ່ວນຮ່ວມໃນການຕ້ານເອດ (ພຕພ) ໂດຍໄດ້ນໍາເອົາ ຖົງຢາອະນາໄມ Number One ເຂົ້າມາ ເຊິ່ງເປັນຍີ່ຫໍ້ທໍາອິດທີ່ໄດ້ຈົດທະບຽນໃນ ສປປ ລາວ ປີ 1999 ພາຍໃຕ້ການສະໜັບສະໜູນຂອງກະຊວງສາທາລະນະສຸກ, ສູນຕ້ານເອດ ນໍາເຂົ້າໂດຍ PSI Laos, ງົບປະມານ Global Fund & USAID.

ຕະຫຼອດໄລຍະເວລາ 20 ປີຜ່ານມາ Number One ໃຊ້ຮູບແບບການຕະຫຼາດໃນການສົ່ງເສີມ ການປ່ຽນແປງພຶດຕິກໍາຂອງປະຊາຊົນລາວ ໃຫ້ຮູ້ຈັກນໍາໃຊ້ ຖົງຢາງອະນາໄມໃນການປ້ອງກັນພະຍາດຕິດຕໍ່ທາງເພດສໍາພັນ ລວມໄປເຖິງການປ້ອງການກັນຖືພາ ແລະຮັບປະກັນໃຫ້ມີຖົງຢາງຄຸນນະພາບ ຈໍລະຈອນແຈກຢາຍໃນຕະຫຼາດຢ່າງທົ່ວເຖິງ ໃນລາຄາທີ່ປະຊາຊົນທຸກກຸ່ມຄົນສາມາດຊື້ໄດ້.

ເພື່ອຮັບປະກັນຜະລິດຕະພັນ Number One ໄດ້ຄຸນນະພາບ ແລະຖືກຕ້ອງກັບຄວາມຕ້ອງການຂອງຕະຫຼາດ ເນື່ອງໃນໂອກາດຄົບຮອບ 20 ປີ ຖົງຢາງອະນາໄມ Number One ຈຶ່ງໄດ້ຮ່ວມມືກັບອົງການ PSI Laos ແລະບໍລິສັດ ໃສສະອາດ ການຢາ ເປີດໂຕຖົງຢາງອະນາໄມ Number One ສີ່ກິ່ນ 4 ແບບ ທີ່ມີຄຸນນະພາບສູງ ນໍາເຂົ້າຈາກຕ່າງປະເທດ ໄດ້ແກ່: ກິ່ນໝາກ້ຽງ Orange ນ້ອງໃໝ່ ເໝາະກັບໄວໜຸ່ມ ທີ່ມັກມ່ວນ, ສົດຊື່ນ, ຄວາມຕື່ນເຕັ້ນ... ທ້າໃຫ້ລອງ, ກິ່ນກຸຫຼາບ Rose ຮູບໂສມໃໝ່ມາພ້ອມກັບຄວາມຫວານໂລແມນຕິກ ໜ້າຈັບຈອງເປັນເຈົ້າຂອງ, ກິ່ນສະຕໍເບີລີ່ Strawberry ຮູບໂສມໃໝ່ທີ່ມີສະເໜ່, ເຈົ້າຊູ້ຈົນສາວໆຂອງທ່ານຕ້ອງໃຈລະລາຍ ແລະລຸ້ນພິເສດ Super Thin ຫຼູຫຼາ, ທັນສະໄໝ, ບາງເບົາເປັນພິເສດ ທີ່ສຸພາບບູລຸດມີລະດັບເລືອກໃຊ້. ສາມາດຫາຊື້ໄດ້ຕາມຮ້ານຂາຍຢາ ໃສສະອາດ ການຢາ ທຸກສາຂາ ແລະຮ້ານຂາຍຢາທົ່ວໄປ.


ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ

  • PSI Laos