• ແພດໝໍລົງປິ່ນປົວປະຊາຊົນຫຼັງນຳ້ຖ້ວມ

ໂດຍ: Admin Mahason 10 ກັນຍາ 2019 (10.17 ນ.) Read : 168

     ກະຊວງສາທາລະນະສຸກໄດ້ສົ່ງແພດໝໍສູນກາງລົງປະຈຳທ້ອງຖິ່ນ 6 ແຂວງພາກກາງແລະໃຕ້ເພື່ອຊ່ວຍຜູ້ປະສົບໄພນ້ຳຖ້ວມ ແລະ ປະເມີນບັນຫາສຸຂະພາບທີ່ອາດຈະຕາມມາ ພາຍຫຼັງນ້ຳບົກແຫ້ງລົງ. ພ້ອມກັນນີ້ ຍັງຈະໄດ້ມີການປະເມີນຄວາມເສຍຫາຍຂອງໂຮງໝໍເມືອງ ແລະ ສຸກສາລາຕ່າງໆ ທີ່ຖືກນຳ້ຖ້ວມ ເພື່ອຊອກຫາວິທີແກ້ໄຂ ໃຫ້ບັນດາສາຖານທີ່ບໍລິການສຸຂະພາບດັ່ງກ່າວ ສາມາດກັບມາບໍລິການສຸຂະພາບຂອງປະຊາຊົນໃຫ້ໄດ້ໂດຍໄວ. ນອກຈາກນີ້ ທີມງານວິຊາການຂອງກະຊວງສາທາລະນະສຸກ ຍັງໄດ້ນຳຢາທີ່ຈຳເປັນ ແລະ ມຸ້ງຍ້ອມຢາຈຳນວນໜຶ່ງ ໄປແຈກຢາຍ ໃຫ້ປະຊາຊົນ ເພື່ອປ້ອງກັນຍຸງກັດ ແລະ ຊ່ວຍຮັບໃຊ້ເຂົ້າໃນ ການບໍລິການ ສຸຂະພາບໃຫ້ແກ່ຜູ້ປະສົບໄພນ້ຳຖ້ວມໃນຄັ້ງນີ້.

     ໃນມື້ວານ 08/09/2019 ທີ່ຜ່ານມາ ທ່ານ ຮສ ດຣ. ບຸນກອງ ສີຫາວົງ ລັດຖະມົນຕີກະຊວງສາທາ ລະນະສຸກ ພ້ອມທັງ ທ່ານ ຮອງລັດຖະມົນຕີ ແລະ ຄະນະກົມ ໄດ້ສົ່ງທີມງານວິຊາການຂອງກະຊວງສາທາລະນະສຸກ ລົງໄປບັນດາແຂວງດັ່ງກ່າວທີ່ໄດ້ຮັບຜົນກະທົບຈາກໄພນ້ຳຖ້ວມໂດຍສະເພາະແມ່ນ ເມືອງຄົງເຊໂດນ ແຂວງສາລະວັນ ເພາະເປັນ ເມືອງທີ່ໄດ້ຮັບຜົນກະທົບໜັກກວ່າໝູ່ໃນບັນດາເມືອງທີ່ຖືກນຳ້ຖ້ວມ ຂອງແຂວງສາລະວັນ. ເປົ້າໝາຍຫຼັກຂອງທີມງານດັ່ງກ່າວແມ່ນ ຈະມີປະເມີນບັນຫາ ທີ່ຈະມີຜົນກະທົບຕໍ່ສຸຂະພາບຂອງປະຊາຊົນຢູ່ເຂດນຳ້ຖ້ວມ ເພື່ອຊອກຫາວິທີແກ້ໃຫ້ທ່ວງທັນເວລາ.

ຂ່າວ: ວຽງຈັນທາຍ | ຮູບ: ກະຊວງສາທາລະນະສຸກ | ທີ່ມາ: ໜັງສືພິມວຽງຈັນທາຍ


ທີ່ມາ: ຟັງຂ່າວ99
  • ແທັກທີ່ກ່ຽວຂ້ອງ