• ຄວາມເສຍຫາຍຈາກນໍ້າຖ້ວມໜັກ ເສຍຊີວິດແລ້ວ 14 ຄົນ

ໂດຍ: ສີເປື້ອນມື 09 ກັນຍາ 2019 (13.52 ນ.) Read : 131

ຈາກການລາຍງານຂອງ ກອງເລຂາຄະນະກຳມະການປ້ອງກັນ ແລະຄວບຄຸມໄພພິບັດແຫ່ງຊາດ ໃນວັນທີ 08 ກັນຍາ 2019 ທີ່ນະຄອນຫລວງວຽງຈັນ ຜ່ານມາ ໃຫ້ຮູ້ວ່າ: ມີຜູ້ເສຍຊີວິດຈາກໄພນໍ້າຖ້ວມຢູ່ບັນດາແຂວງພາກກາງ ແລະພາກໃຕ້ ເພີ່ມຂຶ້ນເປັນ 14 ຄົນ, ໃນຈຳນວນດັ່ງກ່າວ ແມ່ນມີຜູ້ເສຍຊີວິດ 2 ຄົນ ຢູ່ແຂວງ ສະຫວັນນະເຂດ, 3 ຄົນ ຢູ່ສາລະວັນ, 5 ຄົນ ຢູ່ຈຳປາສັກ ແລະ4 ຄົນຢູ່ແຂວງ ອັດຕະປື.
      ທ່ານ ວິໄລພົງ ສີສົມຫວັງ ວ່າການແທນຫົວໜ້າກົມສັງຄົມສົງເຄາະ, ກະຊວງແຮງງານ ແລະສະຫວັດດີການສັງຄົມ ທັງເປັນກອງ ເລຂາຄະນະກຳມະການປ້ອງກັນ ແລະຄວບຄຸມໄພພິບັດແຫ່ງຊາດ ໄດ້ກ່າວວ່າ: ໃນທ້າຍເດືອນສິງຫາ ຫາ ຕົ້ນເດືອນ ກັນຍາ 2019 ສປປ ລາວ ໄດ້ຮັບຜົນກະທົບຈາກ ລົມພະຍຸໝຸນເຂດຮ້ອນຫຼາຍຫ່າເຮັດໃຫ້ມີຝົນຕົກໜັກ ແລະເກີດນໍ້າຖ້ວມ ຢູ່ 6 ແຂວງຄື: ແຂວງ ຄຳມ່ວນ, ສະຫວັນນະເຂດ, ສາລະວັນ, ຈຳປາສັກ, ເຊກອງ ແລະອັດຕະປື. ໄພພິບັດທຳມະຊາດນີ້ ໄດ້ເຮັດປະຊາຊົນທີ່ອາໄສຢູ່ບັນດາແຂວງເຫລົ່ານີ້ ມີການສູນເສຍຊີວິດເຖິງ 14 ຄົນ, ປະຊາຊົນໄດ້ຮັບຜົນກະທົບ 224.604 ຄົນ ຈາກ 122.892 ຄອບຄົວ.

ທ່ານ ວິໄລພົງໄດ້ອະທີ່ບາຍຕື່ມອີກວ່າ: ປັດຈຸບັນໄດ້ມີການຍົກຍ້າຍ 7.559 ກວ່າຄອບຄົວ (64.022 ກວ່າຄົນ), ບ້ານເຮືອນຂອງປະຊາຊົນຈໍານວນຫລາຍຖືກນໍ້າຖ້ວມ, ພື້ນທີ່ການຜະລິດກະສິກໍາ ເຊັ່ນ: ເນື້ອທີ່ນາ 139.829 ກວ່າເຮັກຕາ, ເນື້ອທີ່ສວນ 251 ເຮັກຕາ, ໜອງປາ 1.922 ໜອງ, ສັດລ້ຽງຫລາຍ ກວ່າ 300 ໂຕ ຖືກຍ້າຍໄປຢູ່ບ່ອນທີ່ປອດໄພ, ຊົນລະປະທານ 33 ແຫ່ງ, ອ່າງເກັບນໍ້າ 43 ແຫ່ງ, ຄອງເໝືອງ 64.025 ແມັດ, ເສັ້ນທາງຄົມມະນາຄົມຖືກຕັດຂາດຍ້ອນນໍ້າຖ້ວມ ໃນນີ້ມີຫລາຍກວ່າ 252 ກມ, ຂົວ 12 ແຫ່ງ ຖືກນໍ້າຖ້ວມ, ໂຮງຮຽນ 215 ແຫ່ງ, ໂຮງໝໍ ແລະສຸກສາລາ 10 ແຫ່ງ.
ຄວາມຕ້ອງການຮີບດ່ວນ ລວມມີເຄື່ອງອຸປະໂພກ-ບໍລິໂພກ ເປັນຕົ້ນແມ່ນ ອາຫານ, ນໍ້າດື່ມ, ເຄື່ອງໃຊ້ຄົວເຮືອນ, ເຄື່ອງນອນ, ເຮືອພ້ອມຄົນຂັບ, ງົບປະມານຮັບໃຊ້ ແລະອື່ນໆ.

ປັດຈຸບັນທາງພາກລັດ, ທະຫານ, ຕຳຫລວດ ແລະເຈົ້າໜ້າທີ່ກູ້ໄພ ພ້ອມດ້ວຍອາສາສະໝັກຕ່າງໆໄດ້ຊ່ວຍເຫລືອປະຊາຊົນທີ່ຖືກຜົນກະທົບອອກມາໄດ້ຈຳນວນໜຶ່ງ ແລະນຳໄປພັກຢູ່ສະຖານທີ່ພັກຊົ່ວຄາວແລ້ວ ແລະສາມາດນຳເອົາເຄື່ອງຊ່ວຍເຫລືອບັນເທົາທຸກເບື້ອງຕົ້ນເຂົ້າໄປໃຫ້ຜູ້ທີ່ໄດ້ຮັບຜົນກະທົບຢູ່ໃນເຂດທີ່ພາຫະນະບໍ່ສາມາດເຂົ້າໄປເຖິງໄດ້ຫລາຍບ່ອນ.

ທ່ານ ວິໄລພົງ ໄດ້ກ່າວຕື່ມວ່າ: ຈະສືບຕໍ່ຕິດຕາມສະພາບຜົນກະທົບ ແລະເຮັດການປະເມີນຄວາມເສຍຫາຍ ແລະຄວາມຕ້ອງການ ເພື່ອວາງແຜນຟື້ນຟູຫລັງໄພພິບັດ ທັງໄລຍະສັ້ນ ແລະຍາວ. ສືບຕໍ່ລະດົມວັດຖຸແລະປັດໄຈຕ່າງໆຈາກສັງຄົມ ເພື່ອໃຫ້ການຊ່ວຍເຫລືອສຸກເສີນຕໍ່ຜູ້ປະສົບໄພພິບັດ ຢູ່ບັນດາແຂວງທີ່ໄດ້ຮັບຜົນກະທົບຈາກໄພພິບັດນໍ້າຖ້ວມໃນຄັ້ງນີ້.


ທີ່ມາ: ປະເທດລາວ Pathedlao
  • ຮູບພາບ

  • ແທັກທີ່ກ່ຽວຂ້ອງ