• ຝົນຕົກຍ່າງກັບບ້ານແຕ່ນ້ຳຖ້ວມທາງ ຕົກນ້ຳເສຍຊີວິດ

ໂດຍ: ສີເປື້ອນມື 05 ກັນຍາ 2019 (10.39 ນ.) Read : 258

ອີງຕາມການລາຍງານຂອງເຈົ້າໜ້າທີ່ໜ່ວຍງານຄະດີອາຍາ ກອງບັນຊາການ ປກສ ເມືອງອາດສະພອນວ່າ: ເມື່ອເວລາ 15 ໂມງຂອງວັນທີ 30 ສິງຫາ 2019 ເຈົ້າໜ້າທີ່ໄດ້ຮັບລາຍງານທາງໂທລະສັບຈາກຄອບຄົວຜູ້ກ່ຽວວ່າ: ເກີດເຫດມີຄົນຕົກນ້ຳ ຢູ່ເຂດບ້ານດົງນາຂາມ ເມືອງ ອາດສະພັງທອງ ແຂວງ ສະຫວັນນະເຂດ ເຊິ່ງເປັນຊາຍແດນເຊື່ອມຕໍ່ລະຫວ່າງເມືອງອາດສະພັງທອງ ແລະເມືອງອາດສະພອນ, ຊາບຊື່ທ້າວ ດອກດາລາ ທຳມະວົງ ອາຍຸ 20 ປີ, ເປັນປະຊາຊົນບ້ານທາດດອກແກ້ວ ເມືອງ ອາດສະພອນ; ດັ່ງນັ້ນ, ເຈົ້າໜ້າທີ່ຈຶ່ງໄດ້ສົມທົບກັບອຳນາດການປົກຄອງບ້ານ ແລະໄວໜຸ່ມອາສາສະໝັກ ອອກຄົ້ນຫາ ແຕ່ກໍ່ບໍ່ພົບເນື່ອງຈາກຈຸດເກີດເຫດຍັງມີປະ ລິມານນ້ຳຖ້ວມຂັງຫຼາຍ, ຈາກການສອບສວນຂອງເຈົ້າໜ້າທີ່ຊາບວ່າ: ທ້າວ ກ(ບໍ່ປະສົງອອກນາມ) ເຊິ່ງເປັນໝູ່ຂອງທ້າວ ດອກກາລາ ຜູ້ກ່ຽວແມ່ນຮຽນຢູ່ວິທະຍາໄລແຫ່ງໜຶ່ງ ທີ່ນະຄອນໄກສອນພົມວິຫານ ແຂວງສະຫວັນນະເຂດ, ຫຼັງຈາກເລີກຮຽນຜູ້ກ່ຽວກໍ່ເດີນທາງມາບ້ານພ້ອມໝູ່ ດ້ວຍລົດໂດຍສານ, ພໍມາຮອດຂົວຫ້ວຍພະນອມ ບ້ານດົງນາຂາມ ເມືອງອາດສະພັງທອງ ໄດ້ມີນ້ຳຖ້ວມທາງ ໂດຍສານບໍ່ສາມາດແລ່ນຜ່ານໄດ້ຍ້ອນຝົນຕົກໜັກ, ຈາກນັ້ນ, ພວກກ່ຽວທັງສອງ ກໍ່ໄດ້ລົງຈາກລົດໂດຍສານ ແລ້ວຍ່າງຕາມທາງຂ້າມຫ້ວຍພະນອ, ແລ້ວໄດ້ພົບກັບອາຈານທ່ານໜຶ່ງ(ບໍ່ປະສົງອອກນາມ) ສອນຢູ່ວິທະຍາໄລທີ່ຜູ້ກ່ຽວຮຽ, ອາຈານຈຶ່ງໄດ້ຖາມທ້າວ ດອກກາລາວ່າ ບໍ່ຂີ່ເຮືອບໍ່? ຜູ້ກ່ຽວຕອບວ່າ: ບໍ່, ຊິຍ່າງເອົາ, ເມື່ອເວົ້າແລ້ວພວກກ່ຽວທັງສອງກໍ່ໄດ້ພາກັນຍ່າງຕາມທາງ ໂດຍ ທ້າວ ກ ແມ່ນຍ່າງເບື້ອງຊ້າຍມື, ທ້າວດອກກາລາ ແມ່ນຍ່າງເບື້ອງຂວາມື, ອາຈານກໍ່ໄດ້ຍ່າງຕາມຫຼັງຫ່າງປະມານ 2 ແມັດ, ເມື່ອຍ່າງມາໃກ້ຈະຮອດຂົວນ້ອຍ ທ້າວດອກກາລາ ກໍ່ໄດ້ຕົກຂຸມເລິກປະມານພຽງເອິກ ເຮັດໃຫ້ເສຍຫຼັກລົ້ມ ແລະຖືກກະແສນ້ຳພັດໄປ, ຜູ້ກ່ຽວກໍ່ໄດ້ພະຍາຍາມລອຍຂຶ້ນມາແຕ່ກໍ່ບໍ່ສາມາດຂຶ້ນມາໄດ້ ເພາະຜູ້ກ່ຽວໃສ່ສົ້ງຢີນຂາຍາວ, ເສື້ອວອມແຂນຍາວມີໝວກ ແລະພາຍກະເປົານ້ອຍສີດຳຕິດຕົວ ເຮັດໃຫ້ຜູ້ກ່ຽວລອຍຜ່ານກະແສນ້ຳບໍ່ໄຫວຈຶ່ງຈົມລົງ, ເມື່ອເປັນແນວນັ້ນ, ທ້າວ ກ ກໍ່ໄດ້ປະກະເປົ໋າໄວ້ນຳອາຈານ ແລ້ວລອຍໄປຊ່ວຍແຕ່ບໍ່ສາມາດຊ່ວຍໄດ້ ເນື່ອງຈາກກະແສນ້ຳພັດແຮງ ແລະເລິກ, ຈາກນັ້ນ ທ້າວ ກ ກໍ່ໄດ້ບອກປະຊາຊາຊົນທີ່ຮູ້ຈັກ ໂທລະສັບຫາຄອບຄົວ ທ້າວດອກດາລາ.
      ຕໍ່ມາ, ເຈົ້າໜ້າທີ່ ປກສ ເມືອງອາດສະພອນ ພ້ອມດ້ວຍພໍ່ແມ່ປະຊາຊົນ ໄດ້ລະດົມກັນອອກຄົ້ນຫາ, ຈົນຮອດເວລາ 06 ໂມງ ຂອງວັນ 1 ກັນຍາ 2019 ຈຶ່ງໄດ້ພົບຊາກສົບຂອງທ້າວດອກດາລາ ຈົມຢູ່ກາງໄຮ່ນາ ຫ່າງຈາກຈຸດເກີດເຫດປະມານ 50 ແມັດ, ເມື່ອເຫັນຊາກສົບແລ້ວ ຄອບຄົວ ແລະ ອຳນາດການປົກຄອງບ້ານ ຈຶ່ງໄດ້ນຳເອົາມາທຳພິທີທາງສາສະໜາ ຢູ່ປ່າຊ້າບ້ານທາດດອກແກ້ວ ເມືອງອາດສະພອນ.


ທີ່ມາ: ສະຫວັນພັດທະນາ ຂ່າວ / Savanhphuttana News
  • ຮູບພາບ

  • ແທັກທີ່ກ່ຽວຂ້ອງ