• ຖືກສານຕັດສິນປະຫານຊີວິດ ຍ້ອນເງິນຄ່າຈ້າງ 20 ພັນບາດ

ໂດຍ: ສີເປື້ອນມື 26 ສິງຫາ 2019 (14.39 ນ.) Read : 1,580

ທ້າວ ຫຼຽນ ອາຊີບ ກໍມະກອນ ຢູ່ບ້ານ ຫາດຊາຍຄຳ ເມືອງ ປາກກະດິງ ແຂວງ ບໍລິຄຳໄຊ ໄດ້ຢືນຟັງຄຳ ຕັດສິນຄະດີຈາກຄະນະສານ ອາຍາຂອງແຂວງ ສະຫວັນນະເຂດ ໃນຄະດີຄ້າຂາຍຢາເສບ ຕິດ ເຊິ່ງແມ່ນທ້າວ ຫຼຽນ ເປັນຈຳເລີຍ ໃນຄະດີນີ້, ໂດຍໄດ້ເປີດປະຊຸມສານຂຶ້ນ ໃນວັນທີ 08 ສິງຫາ 2019, ເວລາ 09 ໂມງ 30 ນາທີ, ຢູ່ທີ່ຫ້ອງປະຊຸມສານ ຂອງສານປະຊາຊົນແຂວງສະຫວັນນະເຂດ.

      ໃນເນື້ອໃນມີຄື: ໃນເວລາປະມານ 12 ໂມງຂອງວັນທີ 08 ພະຈິກ 2018, ໄດ້ມີທ້າວ ພອນສັກ ເຊິ່ງເປັນຄົນບ້ານດຽວກັນ ໄດ້ໂທລະສັບມາຫາທ້າວ ຫຼຽນ ແລ້ວໄດ້ບອກວ່າ: ມີວຽກຈະໄປຫາຢູ່ເຮືອນ, ຫຼັງຈາກວາງໂທລະສັບແລ້ວ ບໍ່ດົນປານໃດຈຶ່ງເຫັນ ທ້າວ ພອນສັກ ຂັບຂີ່ລົດ ຍີ່ຫໍ້ວີໂກ້ແຊ້ມ ສີຂາວ, ປ້າຍທະບຽນ 9091 ມາຫາແລ້ວບອກວ່າ: ໄປສົ່ງເຄື່ອງ (ຢາບ້າ) ໃຫ້ແດ່ຈະໃຫ້ຄ່າຈ້າງເປັນເງິນຈໍານວນ 20.000 ບາດ, ແລ້ວຜູ້ກ່ຽວ ຈຶ່ງໄດ້ຖາມທ້າວ ພອນສັກ ວ່າ: ໄປສົ່ງໃຫ້ໃຜຢູ່ໃສ? ແລ້ວທ້າວ ພອນສັກ ຈຶ່ງໄດ້ຕອບວ່າ: ໄປສົ່ງຢູ່ແຂວງ ຄໍາມ່ວນ ແຕ່ຍັງບໍ່ຮູ້ຈຸດສົ່ງ. ຈາກນັ້ນ, ທ້າວຫຼຽນ ຈຶ່ງໄດ້ຂຶ້ນຂີ່ລົດນໍາທ້າວ ພອນສັກ ແລ້ວເຫັນຖົງຢາບ້າສີດໍາທີ່ວາງໄວ້ດ້ານຫຼັງ, ແລ້ວພວກກ່ຽວທັງສອງຄົນຈຶ່ງໄດ້ລົງມາແຂວງ ຄໍາມ່ວນ ມາຫາໝູ່ຂອງທ້າວ ພອນສັກ ຊື່ທ້າວ ໂລ (ບໍ່ຮູ້ບ້ານ), ມາຮອດເວລາປະມານ 18 ໂມງ ຂອງວັນດຽວ ກັນຈຶ່ງໄດ້ເອົາຖົງຢາບ້າຈໍານວນ 10 ແພັກ ເທົ່າກັບ 60.000 ເມັດ ໄປໄວ້ຢູ່ທີ່ເຮືອນຂອງທ້າວ ໂລ ແລະຜູ້ກ່ຽວໄດ້ນອນຄ້າງຄືນຢູ່ທີ່ນັ້ນເລີຍ. ສ່ວນທ້າວ ພອນສັກ ແມ່ນໄດ້ກັບເມືອ, ຕົກມາຮອດວັນທີ 09 ພະຈິກ 2018 ເວລາປະມານ 07 ໂມງ, ທ້າວ ພອນສັກ ຈຶ່ງໄດ້ໂທລະສັບມາຫາທ້າວ ໂລ ແລ້ວບອກໃຫ້ເອົາຢາບ້າໄປສົ່ງໃຫ້ລູກຄ້າ ຢູ່ແຂວງ ສະຫວັນນະເຂດ ແຖວເມືອງ ໄຊບູລີ, ໂດຍແມ່ນທ້າວ ຫຼຽນ ເປັນຄົນຖືຖົງຢາບ້າ, ສ່ວນທ້າວ ໂລ ແມ່ນເປັນຄົນໂທລະສັບພົວພັນກັບທ້າວ ພອນສັກ ແລະໂທລະສັບຫາລູກຄ້າຜູ້ທີ່ຈະມາຊື້ຢາບ້າ, ພໍມາຮອດເມືອງ ໄຊບູລີ ແຖວແຄມທາງເຂົ້າບ້ານ ເຄືອເຂົາກາດ ໃນເວລາທີ່ກໍາລັງກະກຽມຈະສົ່ງຢາບ້າໃຫ້ແກ່ລູກຄ້າ, ທ້າວ ຫຼຽນ ຈຶ່ງໄດ້ຖືກເຈົ້າໜ້າທີ່ກັກຕົວພ້ອມດ້ວຍຂອງກາງ (ຢາບ້າ) ຈໍານວນ 10 ແພັກ ເທົ່າກັບ 60.000 ເມັດ (ນໍ້າໜັກ 5.724 ກຼາມ) ມາດໍາເນີນຄະດີຕາມຂັ້ນຕອນຂອງ ກົດໝາຍ, ສ່ວນທ້າວ ໂລ ແມ່ນໄດ້ເອົາຕົວຫຼົບໜີ. ຕາມຄໍາໃຫ້ການຮັບສາລະພາບຂອງຈໍາເລີຍ ສະບັບລົງວັນທີ 09, 21 ພະຈິກ 2018, ບົດສະຫຼຸບຄະດີຂອງເຈົ້າໜ້າທີ່ຕໍາຫຼວດ ສະບັບເລກທີ 344/ປກສ.ສຂ, ລົງວັນທີ 08 ເມສາ 2019 ແລະຄໍາໃຫ້ການຮັບສາລະພາບຂອງຈໍາເລີຍໃນທີ່ປະຊຸມສານ, ເຊິ່ງການກະທຳດັ່ງກ່າວຂອງຈຳເລີຍ ແມ່ນເປັນການກະທຳ ທີ່ແຕະຕ້ອງເຖິງຄວາມເສຍຫາຍຕໍ່ລະບອບເສດຖະກິດ ຂອງຊາດ, ເຮັດໃຫ້ສັງຄົມບໍ່ມີຄວາມສະຫງົບສຸກເປັນການເບື່ອເມົາຊາວໜຸ່ມເຍົາວະຊົນ ແລະທັງເປັນການກະທຳຜິດຕໍ່ກົດໝາຍອາຍາໃນຂໍ້ຫາ: ຂົນສົ່ງຢາເສບຕິດ (ຢາບ້າ), ຕາມທີ່ໄດ້ກຳນົດໄວ້ໃນມາດຕາ 146 ຂໍ້ 2 ວັກທີ 4 ຂອງກົດໝາຍວ່າດ້ວຍການປັບປຸງ ມາດຕາ 146 ຂອງກົດໝາຍອາຍາສະບັບປັບປຸງປີ 2012 ເຊິ່ງໄດ້ລະບຸໄວ້ວ່າ: ບຸກຄົນຜູ້ໃດຫາກໄດ້ຜະລິດ, ປຸ່ງແຕ່ງ ຫຼືມີໄວ້ໃນຄອບຄອງ, ຄ້າຂາຍ, ຈໍາໜ່າຍ, ນໍາເຂົ້າ, ສົ່ງອອກ, ຂົນສົ່ງ ຫຼືນໍາຢາອີ, ຢາບ້າ, ຢາໄອສ໌ (ice) ຫຼືວັດຖຸອອກລິດຕໍ່ຈິດປະສາດ ຜ່ານ ສປປ ລາວ ເກີນກວ່າສາມ (3) ກິໂລກຼາມຂຶ້ນໄປ ຈະຖືກລົງໂທດປະຫານຊີວິດ ແລະຈະຖືກຮິບຊັບຕາມທີ່ໄດ້ ກໍານົດໄວ້ໃນມາດຕາ 34 ຂອງກົດໝາຍອາຍາສະບັບປັບປຸງ ປີ 2005. ດັ່ງນັ້ນ, ສານຈຶ່ງເຫັນ ຄວນລົງໂທດທ້າວ ຫຼຽນ (ຈໍາເລີຍ) ດ້ວຍການປະຫານຊີວິດ.


ທີ່ມາ: ສະຫວັນພັດທະນາ ຂ່າວ / Savanhphuttana News
  • ຮູບພາບ

  • ແທັກທີ່ກ່ຽວຂ້ອງ