• ຍິງສາວ 16 ປີ ຂາຍຢາບ້າ ຖືກສານສັ່ງຈຳຄຸກ 2 ປີເຄິ່ງ

ໂດຍ: Admin Mahason 12 ສິງຫາ 2019 (11.48 ນ.) Read : 357

     ຄະນະສານອາຍາ ສານປະຊາຊົນຂັ້ນຕົ້ນ ແຂວງອຸດົມໄຊ ໄດ້ພິຈາລະນາຕັດສິນ ນາງ ມີຊົງ ( ຈຳເລີຍ ) ຢູ່ບ້ານກິ່ວສັງວັນ ເມືອງແບງ ແຂວງອຸດົມໄຊ ສະຖານຄ້າຂາຍຢາເສບຕິດ ແລະ ມີຢາເສບຕິດໄວ້ໃນຄອບຄອງ; ໂດຍ ຈຳເລີຍ ຖືກ ເຈົ້າໜ້າທີ່ຕໍາຫຼວດ ກັກຕົວ ພ້ອມຢາບ້າ 197 ເມັດ, ແຕ່ ຈໍາເລີຍ ອາຍຸພຽງ 16 ປີ ເຊິ່ງຍັງເປັນເດັກອາຍຸຕໍ່າກວ່າ 18 ປີ ຈຶ່ງເປັນສາເຫດທີ່ພາໃຫ້ມີການຫຼຸດຜ່ອນຄວາມຮັບຜິດຊອບທາງອາຍາ;

     ສະນັ້ນ, ສານ ຈຶ່ງເຫັນຄວນຕັດສິນ 2 ປີ 6 ເດືອນ ພ້ອມປັບໃໝ 5.000.000 ກີບ ໃນວັນທີ 5 ສິງຫາ 2019.ໄອຍະການປະຊາຊົນ ແຂວງອຸດົມໄຊ ໄດ້ຖະແຫຼງການກະທຳຜິດຂອງ ຈຳເລີຍ ໂດຍຜ່ານການຄົ້ນຄວ້າບັນດາຂໍ້ມູນຫຼັກຖານ ແລະ ເອກະສານຕ່າງໆ ທີ່ມີຢູ່ໃນສຳນວນຄະດີ ຢ່າງຖີ່ຖ້ວນ, ຮອບດ້ານ, ພາວະວິໄສ ແລະ ຈາກບົດບັນທຶກການກັກຕົວ ແລະ ຄຳໃຫ້ການຂອງ ນາງ ມີຊົງ ( ຈຳເລີຍ ສະຖານຄ້າຂາຍຢາເສບຕິດ ແລະ ມີຢາເສບຕິດໄວ້ໃນຄອບຄອງ ) ທີ່ສາລະພາບ ວ່າ:

     ໃນວັນທີ 1 ມີນາ 2018, ຈຳເລີຍ ໄດ້ເຂົ້າເປັນກໍາມະກອນຮັບຈ້າງ ຢູ່ສວນກ້ວຍຈີນ ເຂດບ້ານນາແມດ; ຈາກນັ້ນ, ມີຊາຍບໍ່ຮູ້ຊື່ ອາຍຸປະມານ 35 ປີ ເອົາຢາບ້າມາໃຫ້ຂາຍ ແລ້ວຈ່າຍເງິນຕາມຫຼັງ ຈຳເລີຍ ກໍຮັບເອົາຢາບ້າມາໄວ້ຂາຍໃຫ້ກຳມະກອນ ຢູ່ເຂດສວນກ້ວຍ ບ້ານນາແມດ.ມາວັນທີ 6 ມິຖຸນາ 2018, ໄດ້ເອົາຢາບ້າຈຳນວນດັ່ງກ່າວ ກຽມໄປຂາຍໃຫ້ກັບກຳມະກອນ ແຕ່ຖືກ ເຈົ້າໜ້າທີ່ ເຂົ້າກວດຄົ້ນພົບຂອງກາງຈຳນວນດັ່ງກ່າວ ຈຶ່ງຖືກກັກຕົວໄປດຳເນີນະຄະດີ.

     ຄະນະສານອາຍາ ສານປະຊາຊົນຂັ້ນຕົ້ນ ແຂວງອຸດົມໄຊ ໄດ້ວິນິໃສ ຈຳເລີຍ ສະຖານຄ້າຂາຍຢາເສບຕິດ ວ່າ:ການກະທໍາຂອງ ນາງ ມີຊົງ ເປັນການກະທໍາຜິດທີ່ແຕະຕ້ອງຕໍ່ ກົດໝາຍອາຍາ ໃນໝວດທີ 7 ວ່າດ້ວຍ ການກະທໍາຜິດຕໍ່ເສດຖະກິດ ແລະ ຜິດຕໍ່ກົດໝາຍ ວ່າດ້ວຍ ການປັບປຸງ ມາດຕາ 146 ຂອງ ກົດໝາຍອາຍາ ແລະ ມາດຕາ 75, 76 ຂອງ ກົດໝາຍ ວ່າດ້ວຍ ຢາເສບຕິດ ມາດຕາ 2 ຂໍ້ 2 ວັກ 1 ໃນການຄ້າຂາຍຢາເສບຕິດ ແລະ ມີຢາເສບຕິດໄວ້ໃນຄອບຄອງ.ເຊິ່ງ ກົດໝາຍ ກໍໄດ້ກໍານົດໄວ້ ວ່າ:

     ບຸກຄົນຜູ້ໃດ ຫາກຜະລິດ, ປຸງແຕ່ງ ຫຼື ມີໄວ້ໃນຄອບຄອງ, ຄ້າຂາຍ, ຈໍາໜ່າຍ, ນໍາເຂົ້າ, ສົ່ງອອກ, ຂົນສົ່ງ ຫຼື ນໍາຢາອີ, ຢາບ້າ, ຢາໄອສ໌ ຫຼື ວັດຖຸອອກລິດຕໍ່ ຈິດປະສາດ ຜ່ານ ສປປ ລາວ ເກີນກວ່າ 0,3 – 100 ກຼາມ ຈະຖືກລົງໂທດຕັດອິດສະລະພາບ ແຕ່ 5 – 10 ປີ ແລະ ຈະຖືກປັບໃໝ ແຕ່ 10.000.000 – 100.000.000 ກີບ ແລະ ຈະຖືກຮິບຊັບ ຕາມທີ່ໄດ້ກໍານົດໄວ້ ໃນມາດຕາ 34 ຂອງ ກົດໝາຍອາຍາ.ສະນັ້ນ, ຈຶ່ງເຫັນວ່າ:

     ນາງ ມີຊົງ ເປັນບຸກຄົນທີ່ມີ ສະຕິສໍາປະຊັນຍະ ສົມບູນດີ ແລະ ຮູ້ໄດ້ວ່າ ຢາເສບຕິດ ເປັນທາດເຄມີທີ່ເປັນໄພອັນຕະລາຍຕໍ່ ລະບົບປະສາດຂອງຄົນ ເຊິ່ງກົດໝາຍໄດ້ເກືອດຫ້າມ, ບຸກຄົນຜູ້ໃດ ຫາກຄ້າຂາຍ, ຈໍາໝ່າຍ ຫຼື ມີຢາເສບຕິດໄວ້ໃນຄອບຄອງ ແມ່ນມີໂທດທາງອາຍາ, ແຕ່ ຈໍາເລີຍ ກໍຍັງກະທໍາຜິດ ໂດຍເຈດຕະນາ ເຊິ່ງເປັນການກະທໍາທີ່ບໍ່ເຄົາລົບຕໍ່ ລະບຽບກົດໝາຍ;

     ເຊິ່ງມັນສະແດງອອກຢູ່ທີ່ ຈໍາເລີຍ ໄດ້ຊື້ຢາບ້າຈໍານວນດັ່ງກ່າວໄວ້ຂາຍຕໍ່ໃຫ້ພາກສ່ວນເສບ ເພື່ອຫວັງຜົນປະໂຫຍດ ໂດຍບໍ່ຖືກຕ້ອງຕາມກົດໝາຍ.ເຫັນວ່າ: ໃນເວລາ ຈຳເລີຍ ກະທໍາຜິດ ມີອາຍຸພຽງແຕ່ 16 ປີ ເຊິ່ງຍັງເປັນເດັກອາຍຸຕໍ່າກວ່າ 18 ປີ ຈຶ່ງເປັນສາເຫດທີ່ພາໃຫ້ມີການຫຼຸດຜ່ອນຄວາມຮັບຜິດຊອບທາງອາຍາ ຕາມກົດໝາຍອາຍາ ມາດຕາ 40 ຂໍ້ 1; ສະນັ້ນ, ຈຶ່ງຕັດສິນຈຳຄຸກ 2 ປີ 6 ເດືອນ ແລະ ປັບໃໝ 5.000.000 ກີບ ສະຖານຄ້າຂາຍຢາເສບຕິດ ແລະ ມີຢາເສບຕິດໄວ້ໃນຄອບຄອງ.


ທີ່ມາ: onenewslaos
  • ແທັກທີ່ກ່ຽວຂ້ອງ