• ສໍາເລັດການເຊື່ອມຈອດ ຂົວທາງລົດໄຟ ລາວ-ຈີນ

ໂດຍ: Admin Mahason 29 ກໍລະກົດ 2019 (09.29 ນ.) Read : 247

     ຕາມຂ່າວ CRI: ວັນທີ 28 ກໍລະກົດທີ່ນະຄອນຫຼວງພະບາງ, ໄດ້ຈັດພິທີຊົມສະເຫລີມສະຫລອງຜົນສຳເລັດການເຊື່ອມຈອດຂົວຂ້າມນຳ້ຂອງແຂວງຫຼວງພະບາງຂອງໂຄງການກໍ່ສ້າງທາງລົດໄຟລາວ-ຈີນ ໂດຍເປັນກຽດເຂົ້າຮ່ວມຂອງທ່ານ ບົວທອງ ແພງສະຫວັນ ຮອງເລຂາພັກແຂວງ, ປະທານກວດກາ ຫົວໜ້າຄະນະຊີ້ນຳໂຄງການທາງລົດໄຟລາວ-ຈີນປະຈຳແຂວງຫຼວງພະບາງ, ທ່ານ ຫຼີ້ຈື້ຈຸ່ງ ກົງສູນໃຫຍ່ ສປ ຈີນປະຈໍາ ຫຼວງ ພະບາງ ແລະຜູ້ຕາງໜ້າພາກສ່ວນທີ່ກ່ຽວຂ້ອງຂອງໂຄງການກໍ່ສ້າງທາງລົດໄຟລາວ-ຈີນ ເຂົ້າຮ່ວມພິທີດັ່ງກ່າວ.

     ຂ່າວແຈ້ງຕື່ມວ່າ, ພາຍຫຼັງການສູ້ຊົນພະຍາຍາມເປັນເວລາ 2ປີ 1 ເດືອນ, ໃນຕອນເຊົ້າ 2 ໂມງ 8 ນາທີຂອງວັນດຽວກັນ, ຂົວຂ້າມແມ່ນໍ້າຂອງແຂວງຫຼວງພະບາງໄດ້ສໍາເລັດການເຊື່ອມຈອດ, ເຊິ່ງໄດ້ສໍາເລັດການເຊື່ອມຈອດກ່ອນເວລາກໍານົດ 7 ເດືອນ. ຂົວຂ້າມແມ່ນໍ້າຂອງ ແຂວງຫຼວງພະບາງມີຄວາມຍາວ 1458.9m, ມີທັງໝົດ34 ເສົາ, ມີເສົາຫຼັກ 5 ເສົາຕັ້ງຢູ່ໃຈກາງແມ່ນໍ້າຂອງ.

     ໂອກາດນີ້, ທ່ານ ແທ່ນຄຳ ທອງບົນ ຫົວໜ້າຄະນະຄຸ້ມຄອງໂຄງການທາງລົດໄຟລາວ-ຈີນ ໄດ້ຕາງໜ້າກະຊວງໂຍທາທິການ ແລະ ຂົນສົ່ງ ສະແດງຄວາມຊົມເຊີຍມາຍັງພາກສ່ວນ ຕ່າງໆທີ່ໄດ້ທຸ່ມເທກຳລັງເຫື່ອແຮງເພື່ອປະກອບສ່ວນ ເຂົ້າໃນການກໍ່ສ້າງທາງລົດໄຟ ລາວ-ຈີນ. ທ່ານກ່າວວ່າ, ຜົນສຳເລັດດັ່ງກ່າວບໍ່ພຽງແຕ່ເປັນຂີດໝາຍສຳຄັນໜຶ່ງສຳລັບໂຄງ ການທາງລົດໄຟລາວ-ຈີນເທົ່ານັ້ນ, ແຕ່ຍັງເປັນວັນເວລາທີ່ເປັນປະຫວັດສາດສຳລັບປະຊາຊົນ ລາວ ເຊິ່ງລັດຖະບານລາວຈະສືບຕໍ່ໃຫ້ການສະໜັບສະໜູນຢ່າງເຂັ້ມແຂງຕໍ່ໂຄງການທາງລົດ ໄຟລາວ-ຈີນ ເພື່ອສ້າງໂຄງການດັ່ງກ່າວໃຫ້ກາຍເປັນສັນຍາລັກແຫ່ງມິດຕະພາບລະຫວ່າງສອງປະເທດລາວ-ຈີນ.

     ທ່ານ ຫຼີ້ຈື້ຈຸ່ງ ກົງສູນໃຫຍ່ ສປ ຈີນ ປະຈໍາ ຫຼວງພະບາງ ກ່າວວ່າ, ຜົນສຳເລັດໃນຄັ້ງນີ້ເປັນຂີດໝາຍສຳຄັນໜຶ່ງ ແລະມີຄວາມໝາຍສຳຄັນຍິ່ງຕໍ່ການກໍ່ສ້າງທາງລົດໄຟລາວ-ຈີນ, ຫວັງວ່າພາກສ່ວນທີ່ກ່ຽວຂ້ອງຈະສືບຕໍ່ຊຸກຍູ້ການກໍ່ສ້າງທາງລົດໄຟລາວ-ຈີນໃຫ້ປອດໄພ ແລະມີຄຸນນະພາບ ເພື່ອສ້າງເປັນໂຄງການທີ່ເປັນຕົວຢ່າງແຫ່ງ ມິດຕະພາບລາວ-ຈີນກໍ່ຄືການສ້າງ “ໜຶ່ງ ແລວ ໜຶ່ງເສັ້ນທາງ”.


      ການກໍ່ສ້າງທາງລົດໄຟລາວ-ຈີນ ເປັນໜຶ່ງຂອງຄວາມມຸ້ງໝັ້ນຕັ້ງໃຈຂອງລັດຖະບານ ເຂົ້າໃນ ການເຊື່ອມຈອດຍຸດທະສາດຫັນປະເທດທີ່ບໍ່ມີຊາຍແດນຕິດກັບທະເລໃຫ້ກາຍເປັນປະເທດ ເຊື່ອມຈອດເຊື່ອມໂຍງ ກັບພາກພື້ນ ແລະ ສາກົນ ຂອງ ສປປ ລາວ ກັບຂໍ້ລິເລີ່ມ “ໜຶ່ງແລວ ໜຶ່ງເສັ້ນທາງ” ຂອງ ສປ ຈີນ, ທິດເໜືອ ເລີ່ມຈາກດ່ານບໍ່ເຕັນ ແລະມາສຸດທີ່ນະຄອນຫລວງວຽງ ຈັນ, ມີຄວາມຍາວທັງໝົດ 414 ກິໂລແມັດ, ສຳລັບ ທາງລົດໄຟເສັ້ນນີ້ແມ່ນໄດ້ນໍາໃຊ້ມາດຕະຖານ ສປ ຈີນ ແລະ ມາດຕະຖານສາກົນ ໃນການກໍ່ສ້າງ, ສາມາດແລ່ນລົດໄດ້ 160 ກິໂລແມັດຕໍ່ຊົ່ວໂມງ, ໂດຍໃຊ້ລະບົບຂັບເຄື່ອນດ້ວຍໄຟຟ້າ.

ຂ່າວ ແລະ ພາບ: ຍາວ


ທີ່ມາ: onenewslaos
  • ແທັກທີ່ກ່ຽວຂ້ອງ