• ຢຶດຢາໄອສ໌ 99 ກິໂລ ຢູ່ທາງຕັດໃໝ່ ໜອງພະຍາ

ໂດຍ: Admin Mahason 26 ກໍລະກົດ 2019 (14.38 ນ.) Read : 874

     ກົມຕໍາຫຼວດສະກັດກັ້ນ ແລະ ຕ້ານຢາເສບຕິດ ກົມໃຫຍ່ຕໍາຫຼວດ ກະຊວງ ປກສ ໄດ້ນໍາກໍາລັງເຂົ້າຈັບ ກຸ່ມແກ້ງຄ້າຂາຍຢາເສບຕິດລາຍໃຫຍ່ ປະເພດຢາໄອສ໌ ພ້ອມຢຶດຂອງກາງຈໍານວນ  99 ກິໂລກຼາມ ຢູ່ເສັ້ນທາງຕັດໃໝ່ ໄປໂຮງໝໍແມ່ ແລະ ເດັກ, ເຂດບ້ານໜອງພະຍາ ເມືອງໄຊທານີ ນະຄອນຫຼວງວຽງຈັນ ພາຍຫຼັງຕິດຕາມມາໄດ້ເດືອນກວ່າ.

ເຈົ້າໜ້າທີ່ ກົມຕໍາຫຼວດສະກັດກັ້ນ ແລະ ຕ້ານຢາເສບຕິດ ໃຫ້ຮູ້ວ່າ:ຄະດີດັ່ງກ່າວ ແມ່ນໄດ້ຕິດຕາມມາໄດ້ເດືອນກວ່າແລ້ວ, ເຊິ່ງໄດ້ຮັບລາຍງານຈາກແຫຼ່ງຂ່າວ ແຕ່ວັນທີ 20 ມິຖຸນາ 2019 ວ່າ ຈະມີກຸ່ມຄົນຈໍານວນໜຶ່ງ ນັດຊື້ – ຂາຍຢາເສບຕິດຈໍານວນຫຼາຍ ຢູ່ເສັ້ນທາງເຂດບ້ານໜອງພະຍາ.

     ຈາກນັ້ນ, ຈຶ່ງຈັດ ກໍາລັງຕໍາຫຼວດວິຊາສະເພາະ ຕິດຕາມກຸ່ມເປົ້າໝາຍດັ່ງກ່າວ. ຜ່ານການຕິດຕາມ, ຮອດວັນທີ 24 ກໍລະກົດ 2019, ຈຶ່ງພົບເຫັນ ກຸ່ມເປົ້າໝາຍ ຂັບຂີ່ລົດໃຫຍ່ 2 ຄັນ ໄປຈອດຢູ່ເສັ້ນທາງຕັດໃໝ່ ໄປໂຮງໝໍແມ່ ແລະ ເດັກ ເຂດບ້ານໜອງພະຍາ ຈຶ່ງກະຈາຍກໍາລັງອ້ອມຈັບ ພ້ອມທັງກວດຄົ້ນພົບເຫັນ ຢາໄອສ໌ ຈຳນວນ 99 ຖົງ ນ້ຳໜັກ 99 ກິໂລກຼາມ, ໂທລະສັບ 7 ເຄື່ອງ, ລົດໃຫຍ່ 2 ຄັນ ແລະ ປືນສັ້ນ 1 ກະບອກ ພ້ອມລູກກະສຸນຈໍານວນໜຶ່ງ ແລະ ກັກຕົວຜູ້ຖືກຫາທັງ 4 ຄົນ.

ຜູ້ຖືກຫາທັງ 4 ຄົນນັ້ນ ເປັນຄົນ 3 ຄົນ ອາໄສຢູ່ໃນ ນະຄອນຫຼວງວຽງຈັນ ແລະ ອີກຄົນໜຶ່ງ ເປັນຄົນໄທ ເຊິ່ງມີລາຍຊື່ດັ່ງນີ້:

ທ້າວ ພອນໄຊ ອາຍຸ 22 ປີ ຢູ່ ບ້ານນາໄຊ ເມືອງໄຊເສດຖາ

ທ້າວ ວັນທອງເຮີ ອາຍຸ 27 ປີ ຢູ່ບ້ານໜອງສອງຫ້ອງ ເມືອງໄຊທານີ

ທ້າວ ລຸລາທໍ ອາຍຸ 22 ປີ ເຊົ່າຫ້ອງແຖວ ຢູ່ເຂດບ້ານຕານມີໄຊ ເມືອງໄຊທານີ

ທ້າວ ອາດຸມ ຫຼື ຕູທໍ່ ອາຍຸ 40 ປີ ເຊື້ອຊາດ ແລະ ສັນຊາດໄທ, ປັດຈຸບັນ ຢູ່ບ້ານຫ້ວຍແລ້ງ ເມືອງວຽງແກ່ນ ຈັງຫວັດຊຽງລາຍ

     ຜ່ານການສອບສວນເບື້ອງຕົ້ນ, ພວກກ່ຽວຮັບສາລະພາບ ວ່າ:ຢາເສບຕິດຈຳນວນດັ່ງກ່າວ ແມ່ນຂອງພວກກ່ຽວແທ້ ເຊິ່ງໄດ້ຊື້ມາຈາກ ກຸ່ມແກ້ງຮ່ວມຂະບວນການດຽວກັນ  ເພື່ອຈະເອົາໄປສົ່ງໃຫ້ຜູ້ສັ່ງຊື້ ເຊິ່ງນັດກັນຢູ່ແຄມທາງ ບ້ານໜອງພະຍາ ແລະ ພໍໄປຮອດ ກໍຖືກເຈົ້າໜ້າທີ່ ຈັບຕົວກ່ອນ ພ້ອມຂອງກາງຢາໄອສ໌ ຈຳນວນດັ່ງກ່າວ.

ຂອບໃຈຂໍ້ມູນຈາກ: ປ້ອງກັນຄວາມສະຫງົບລາຍວັນ


ທີ່ມາ: ABC Laos News
  • ແທັກທີ່ກ່ຽວຂ້ອງ