• ດ່ານພາສີສາກົນຂົວມິດຕະພາບ 3 ເກັບລາຍຮັບໄດ້ເກືອບ 140 ຕື້ກີບ ລື່ນແຜນ 13 ຕື້ກ່ວາກີບ

ໂດຍ: Admin Mahason 12 ກໍລະກົດ 2019 (11.26 ນ.) Read : 214

     ວັນທີ 10 ກໍລະກົດ 2019 ທ່ານ ສົມຫວັງ ສົມຈິນດາ ຫົວໜ້າດ່ານພາສີສາກົນຂົວມິດຕະພາບ 3 ໄດ້ໃຫ້ສໍາພາດຕໍ່ຜູ້ສື່ຂ່າວທ້ອງຖິ່ນແຂວງຄໍາມ່ວນວ່າ : ໃນປີ 2019ນີ້ ດ່ານພາສີສາກົນຂົວມິດຕະພາບ 3 ໄດ້ຮັບມອບໝາຍຕົວເລກແຜນການປະຕິບັດລາຍຮັບເຂົ້າງົບປະມານຈາກກະຊວງການເງິນຈໍານວນ 252,700 ຕື້ກີບ ຖ້າທຽບໃສ່ການປະຕິບັດຕົວເລກແຜນການປີ 2018 ແມ່ນເພີ້ມຂຶ້ນ 5,73 % , ກວມເອົາອັດຕາສ່ວນ 21% ຂອງລາຍຮັບ. ສະເພາະຢູ່ແຂວງຄໍາມ່ວນຈະກວມລາຍຮັບຢູ່ 63,54% . ສ່ວນວ່າແຜນການລາຍຮັບ 6 ເດືອນຕົ້ນປີຂອງດ່ານພາສີສາກົນຂົວມິດຕະພາບ 3 ແມ່ນໄດ້ແບ່ງອອກເປັນ 50% ຂອງແຜນການປີ ເຊິ່ງເທົ່າກັບ 126,350 ຕື້ກີບ ຜ່ານການຈັດຕັ້ງປະຕິບັດ 6 ເດືອນຕົ້ນປີໄດ້ 139,554 ຕື້ກີບ ເທົ່າກັບ 110,50% ຫຼື ລື່ນເປັນເງິນຢູ່ປະມານ 13,2 ຕື້ກີບ ຖ້າທຽບໃສ່ແຜນການປີປະຕິບັດໄດ້ 55,23 % , ຖ້າທຽບໃສ່ໄລຍະດຽວກັນຂອງສົກປີກ່ອນ ( 2018 ) ປະຕິບັດໄດ້ 109,66 %.

     ສໍາລັບແຜນການຄາດຄະເນ 06 ເດືອນທ້າຍປີຈະໃຫ້ໄດ້ 270 ຕື້ກີບ ຫຼື ເທົ່າກັບ 107 % ຂອງແຜນການປີ 2019 ທ່ານ ສົມຫວັງໄດ້ກ່າວຕື່ມວ່າ: ດ້ານລາຍຮັບສ່ວນຫຼາຍແມ່ນໄດ້ມາຈາກນໍ້າມັນເຊື້ອໄຟກວມອັດຕາສ່ວນ 18 %, ສິນຄ້ານໍາເຂົ້າ-ສົ່ງອອກກວມອັດຕາສ່ວນ 54 %, ສິນຄ້າຊົມໃຊ້ພາຍໃນກວມອັດຕາສ່ວນ 8 %, ທໍານຽມພາຫະນະເຂົ້າ-ອອກດ່ານ 7 %, ທໍານຽມຜ່ານແດນສາກົນ 6 % ແລະ ທໍານຽມຄັງແຮ 3 %. ຢູ່ດ່ານພາສີສາກົນຂົວມິດຕະ ພາບ 3 ປະກອບມີພະນັກງານພາສີທັງໝົດ 40 ສະຫາຍ ໃນນັ້ນພະນັກງານເພດຍິງ 10 ສະຫາຍ ແລະ ພະນັກງານຊ່ວຍວຽກອີກຈໍານວນໜຶ່ງ.

      ດ້ານຂໍ້ສະດວກ ແລະ ຂໍ້ຫຍຸ້ງຍາກໃນການຈັດເກັບລາຍຮັບໄດ້ລື່ນແຜນການໃນຄັ້ງນີ້ໂດຍສະເພາະຂໍ້ສະດວກແມ່ນໄດ້ຮັບການຊີ້ນໍາຈາກການນໍາຂອງກົມພາສີ , ກອງຄຸ້ມຄອງພາສີ 6 ຂອງກອງກວດກາ , ອໍານາດການປົກຄອງທ້ອງຖິ່ນແຂວງຄໍາມ່ວນຕະຫຼອດເຖິງຂະແໜງສາຍຕັ້ງທີ່ມາຊຸກຍູ້ແຫຼ່ງລາຍຮັບເຊິ່ງພວກເຮົາກໍ່ໄດ້ມີນິຕິກໍາ ແລະ ກົດໝາຍເພື່ອປະຕິບັດໃຫ້ໄປຕາມລະບຽບການຕ່າງໆ . ສະເພາະຄວາມຫຍຸ້ງຍາກແມ່ນມີເປັນບາງຄັ້ງຄາວໂດຍສະເພາະແມ່ນການນໍາໃຊ້ເສັ້ນທາງເລກທີ 12 ຊ່ວງ 15 ກິໂລແມັດຢູ່ດ່ານນາເພົ້າເປັນບັນຫາທີ່ມີຄວາມຫຍຸ້ງຍາກເປັນເຫດໃຫ້ການຈັດເກັບລາຍຮັບຈາກຜູ້ປະກອບການຂົນສົ່ງ ຫຼື ການເດີນລົດຍັງມີຄວາມສັບສົນຢູ່ໃນປະຈຸບັນ ສ່ວນວ່າສະພາບອື່ນໆການຈັດເກັບລາຍຮັບກໍ່ຄ່ອຍໆດີຂຶ້ນ.

     ກ່ຽວກັບການລະບາດຂອງພະຍາດສັດ ( ອະຫິວາໝູ ) ນັບແຕ່ໄດ້ມີການອອກແຈ້ງການຈາກທາງການທາງດ່ານສາກົນຂົວມິດຕະພາບ 3 ກໍ່ໄດ້ມີການປະຕິບັດຕາມລະບຽບການຢ່າງເຂັ້ມງວດເປັນຕົ້ນແມ່ນຫ້າມມີການນໍາເຂົ້າໝູ , ຜະລິດຕະພັນໝູ , ສິນສ່ວນຈາກໝູແມ່ນມີການຕັດການນໍາເຂົ້າຢ່າງຂາດຕົວທັງນີ້ກໍ່ເພື່ອເປັນການສະກັດກັ້ນ ແລະ ເຝົ້າລະວັງພະຍາດຊະນິດນີ້ບໍ່ໃຫ້ມີການແຜ່ລະບາດ ຫຼື ແຜ່ລາມໄປສູ່ເຂດອື່ນ , ສ່ວນໄລຍະເວລາໃນການໃຫ້ບໍລິການຂອງດ່ານພາສີສາກົນຂົວມິດຕະພາບແມ່ນປະຕິບັດເວລາປົກກະຕິນັບແຕ່ 6 ໂມງເຊົ້າຫາ 10 ໂມງກາງຄືນ. ດ້ານການປະຕິບັດກົນໄກເສຍພາສີແມ່ນໄດ້ດໍາເນີນການໄປຕາມລະບຽບການເສຍພາສີ 100 %, ນອກຈາກນັ້ນແມ່ນໄດ້ປະຕິ ບັດການຮ່ວມຊີວິດການເມືອງຂອງພະນັກງານພາສີພາຍໃນດ່ານເພື່ອເປັນການເຕົ້າໂຮມຄວາມສາມັກຄີຫຼີກເວັ້ນປະກົດການຫຍໍ້ທໍ້ຕ່າງໆທີ່ຈະເກີດຂຶ້ນ. ພາບ-ຂ່າວ: ແຂວງຄຳມ່ວນ


ທີ່ມາ: ABC Laos News
  • ຮູບພາບ

  • ແທັກທີ່ກ່ຽວຂ້ອງ