• ຫວຽດນາມ ບັນລຸຂໍ້ຕົກລົງການຄ້າເສລີຄັ້ງສຳຄັນ ກັບສະຫະພາບຢູໂຣບ

ໂດຍ: Admin Mahason 02 ກໍລະກົດ 2019 (13.44 ນ.) Read : 168

     ສຳນັກຂ່າວຕ່າງປະເທດລາຍງານ ເມື່ອວັນທີ່ 30 ມິຖຸນາ 2019 ວ່າ ສະຫະພາບຢູໂຣບ (ອີຢູ) ໄດ້ລົງນາມການຄ້າເສລີຄັ້ງສຳຄັນກັບປະເທດຫວຽດນາມໂດຍລະບຸວ່າເປັນຂໍ້ຕົກລົງການຄ້າເສລີທີ່ມີເປົ້າຫມາຍຍິ່ງໃຫ່ຍທີ່ສຸດທີ່ເຄີຍລົງນາມກັບປະເທດກຳລັງພັດທະນາຊື່ງໃຊ້ເວລາການເຈລະຈາມາດົນກວ່າ 3 ປີ 6 ເດືອນ

     ລາຍລະອຽດຂອງຂໍ້ຕົກລົງຈະຍົກເລີກການຕັ້ງກຳແພງພາສີ 99 ເປີເຊັນ ທີ່ມີຕໍ່ສິນຄ້າປະເພດຕ່າງໆຈາກຫວຽດນາມ ແຕ່ຈະມີສິນຄ້າບາງປະເພດທີ່ທະຍອຍຫລຸດກຳແພງພາສີໃນຮອບໄລຍະເວລາ 10 ປີ ເຊັ່ນດຽວກັບສິນຄ້າດ້ານການກະເສດທີ່ຈະມີການກຳນົດຍົກເວັ້ນພາສີເປັນແບບໂຄຕ້າການລົງນາມຂໍ້ຕົກລົງການຄ້າເສລີມີຂື້ນທີ່ນະຄອນຮ່າໂນຍລະຫວ່າງທ່ານນາງຊິຊີເລຍ ມາລມົສຕຣອມ ໂຕແທນຄະນະກຳມະທິການການຄ້າສະຫະພາບຢູໂຣບກັບທ່ານຈັງ ຕວນ ອັນ ລັດຖະມົນຕີອຸດສາຫະກຳ ແລະການຄ້າ ຢ່າງໃດກໍ່ຕາມ ຂໍ້ຕົກລົງສະບັບນີ້ຈະຕ້ອງໄດ້ຮັບການຮັບຮອງຈາກສະຫະພາບຢູໂຣບ ຊື່ງມີກະແສທັກທ້ວງຈາກສະມາຊິກສະຫະພາບຢູໂຣບບາງສ່ວນ ທີ່ສະແດງຄວາມກັງວົນຕໍ່ບັນຫາສິດທິມະນຸດຊະຍະຊົນໃນຫວຽດນາມ

     ຕໍ່ມາທາງການຄ້າຫວຽດນາມເຜີຍວ່າ ຂໍ້ຕົກລົງການຄ້າເສລີ ອີຢູ-ຫວຽດນາມ ຫຼືອີວີເອຟທີເອ ເຊື່ອວ່າຈະຊ່ວຍກະຕຸ້ນການສົ່ງອອກຂອງຢູໂຣບມາຍັງຫວຽດນາມ 15.28 ເປີເຊັນ ແລະຈະກະຕຸ້ນຈາກສົ່ງອອກສິນຄ້າຫວຽດນາມໄປຍັງຢູໂຣບ 20 ເປີເຊັນ ພາຍໃນປີ 2020 ທັງຈະຍັງເພີ່ມມວນລວມຜະລິດຕະພັນພາຍໃນປະເທດຫຼືຈີດີພີ 2.18 ເຖິງ 3.25 ເປີເຊັນຕໍ່ປີ ພາຍໃນປີ 2023 ແລະເພີ່ມເປັນ 4.57 ເຖິງ 5.3 ເປີເຊັນພາຍໃນຊ່ວງປີ 2021-2028
ທັງນີ້ ສະຫະພາບຢູໂຣບຖືເປັນຕະຫຼາດສົ່ງອອກສຳລັບຫວຽດນາມຫລາຍທີ່ສຸດເປັນອັນດັບ 2 ຮອງຈາກອາເມຣິກາ

     ໂດຍມີສິນຄ້າສົ່ງອອກຫລັກຄືເຄື່ອງນຸ່ງຫົ່ມ ແລະເກີບ ຊື່ງຂໍ້ຕົກລົງອີວີເອຟທີເອອາດເປັນການເປີດທາງເພີ່ມເຕີມໃຫ້ທຸລະກິດດ້ານໄປສະນີ ທະນາຄານ ແລະດ້ານສິນຄ້າທາງທະເລຂອງຫວຽດນາມ ກ່ອນຫນ້ານີ້ ເມື່ອວັນທີ່ 28 ມິຖຸນາ ສະຫະພາບຢູໂຣບຍັງລົງນາມຂໍ້ຕົກລົງການຄ້າກັບກຸ່ມປະເທດອາເມຣິກາໃຕ້ປະກອບດ້ວຍ ອາເຈນຕິນ່າ ບຣາຊິລ ອຸຣຸກກວຍ ແລະປາຣາກວຍ ເພື່ອຫລຸດຫຼືຍົກເລີກກຳແພງພາສີ ກະຕຸ້ນການສົ່ງອອກ ແລະເຮັດໃຫ້ສິນຄ້ານຳເຂົ້າມີລາຄາຖືກລົງ ໂດຍສະຫະພາບຢູໂຣບລະບຸວ່າເປັນຂໍ້ຕົກລົງຄັ້ງປະຫວັດສາດທີ່ໃຊ້ເວລາເຈລະຈາມາດົນເຖິງ 20 ປີ


ທີ່ມາ: ABC Laos News
  • ແທັກທີ່ກ່ຽວຂ້ອງ