• ປະຫວັດປະຕູໄຊນະຄອນຫລວງວຽງຈັນ

ໂດຍ: ແມວດຳ 12 ທັນວາ 2017 (05.08 ນ.) Read : 1,314

ອານຸສາວະລີ ປະຕູໄຊ ເຊິ່ງບາງຄົນກໍ່ມັກຮຽກສັ້ນໆວ່າ ປະຕູໄຊ ຫຼື ບາງຄົນກໍ່ວ່າ ອານຸສາວະລີ. ແຕ່ຈະໃຫ້ຖືກແທ້ໆ ຕ້ອງເອີ້ນວ່າ: “ອານຸສາວະລີ ປະຕູໄຊ”, ສິ່ງກໍ່ສ້າງນີ້ສ້າງເພື່ອເປັນອານຸສອນສະຖານໃຫ້ ແກ່ໄຊຊະນະຂອງປະຊາຊົນລາວ, ປະຕູໄຊ ເລີ່ມການກໍ່ສ້າງໃນປີ 1957 ແລະ ສຳເລັດການກໍ່ສ້າງໃນປີ 1968 ເຊິ່ງມີການອອກແບບໂດຍ ທ່ານ ທຳ ໄຊຍະສິດເສນາ.


ຈາກຮູບແບບການກໍ່ສ້າງແລ້ວ ຮູບຊົງແມ່ນຄ້າຍກັບ Arc de Triomphe ຢູ່ປະເທດຝຣັງ ແລະ ຫຼາຍຄົນກະວ່າແມ່ນ ອ້າຍນ້ອງກັນ, ແມ່ນວ່າຈະມີຮູບຊົງໂຄງສ້າງຄ້າຍກັນ ແຕ່ໃນເລື່ອງລວດລາຍ ແລະ ສະຖາປັດຕະຍະກຳແລ້ວ ປະຕູໄຊ ແມ່ນແຕ້ມແຕ່ງ ດ້ວຍລວດລາຍຂອງລາວ ເຊັ່ນວ່າ : ຮູບນາງກິນນາລີ, ຮູບກົບກິນເດືອນ ແລະ ອື່ນໆ. ອານຸສາວະລີ ປະຕູໄຊ ແມ່ນຈະມີປະຕູໃຫຍ່ທັງສີ່ດ້ານ ແລະ ປະກອບມີ 7 ຊັ້ນ, ມີຂັ້ນໄດທາງຂຶ້ນ ສອງຂ້າງ, ໂດຍທາງດ້ານເທິງ ເປັນອາຄານ 5 ຍອດເຊິ່ງມີຄວາມໝາຍ ຕາມຫຼັກພຣະພຸດທະສາສະໜາ ໄດ້ແກ່ : ພັນທະມິດ, ການໃຫ້ອະໄພ, ຄວາມສື່ສັດ, ການໃຫ້ກຽດ ແລະ ຄວາມຈະເລີນຮຸ່ງເຮືອງ, ຖ້າຂຶ້ນໄປຮອດຍອດຂອງອານຸສາວະລີ ທ່ານກໍ່ຈະໄດ້ຊື່ມຊົມກັບທິວທັດຄວາມງົດງາມຂອງຕົວເມືອງວຽງຈັນ.

ປະຕູໄຊຖືກອ້ອມຮອບໄປດ້ວຍສວນສາທາລະນະ ແລະ ຫົນທາງສາຍຫຼັກທີ່ມີລັກສະນະເປັນວົງວຽນ ແລະ ຫົນທາງເສັ້ນໃຫຍ່, ທາງດ້ານໜ້າ ຂອງປະຕູໄຊມີນໍ້າພຸທີ່ສວຍງາມ, ມີສວນສາທາລະນະ ໃຫ້ພັກຜ່ອນຢ່ອນໃຈ, ເປັນບ່ອນທີ່ຊາວວຽງຈັນ ແລະ ນັກທ່ອງທ່ຽວທັງພາຍໃນ ແລະ ຕ່າງປະເທດ ມັກມາພັກຜ່ອນ, ສູດອາກາດບໍລິສຸດ ແລະ ອອກກຳລັງກາຍ.



ທີ່ມາ:
  • ຮູບພາບ

  • ແທັກທີ່ກ່ຽວຂ້ອງ