• ຫຼານເມົາຢາບ້າໃຊ້ອາວຸດທຳຮ້າຍຮ່າງກາຍລຸງຈົນເສຍຊີວິດ

ໂດຍ: Admin Mahason 25 ມິຖຸນາ 2019 (10.35 ນ.) Read : 250

     ຊາຍ ອາຍຸ 27 ປີ ເສບຢາບ້າ ເກີນຂະໜາດ ຈົນເກີດອາການປະສາດຫຼອນຄິດວ່າລຸງເປັນຜູ້ແຈ້ງຕໍາຫຼວດໃຫ້ມາຈັບຕົນ ຈຶ່ງຈັບເອົາມີດຢູ່ຂ້າງບ່ອນນອນແທງໃສ່ຂ້າງເບື້ອງຊ້າຍຂອງລຸງ ອາຍຸ 55 ປີທີ່ນອນຢູ່ນໍາກັນເທິງເຮືອບັກຈົນເສຍຊີວິດຄ່າທີ່ໃນວັນທີ 27 ພຶດສະພາ 2019 ຢູ່ບ້ານຕາລານ ເມືອງໄຊຍະບູລີ ແຂວງໄຊຍະບູລີ.

     ມາຮອດວັນທີ 11 ມິຖຸນາ 2019, ພະແນກຕໍາຫຼວດສືບສວນ-ສອບສວນຫ້ອງຕໍາຫຼວດ ປກສ ແຂວງໄຊຍະບູລີ ໄດ້ນໍາຈັບຕົວຜູ້ກໍເຫດໄດ້ ຊື່ທ້າວ ປາລີ ອາຍຸ 27 ປີ ບ້ານທົ່ງຈະເລີນ ເມືອງນານ ແຂວງຫຼວງພະບາງ ໄປເຮັດແຜນປະກອບຄໍາສາລະພາບຢູ່ສະຖານທີ່ເກດເຫດທີ່ທ່າເຮືອບ້ານຕານລານ ເພື່ອປະກອບໃສ່ສໍານວນຄະດີສົ່ງໄອຍະການປະຊາຊົນແຂວງ ສັ່ງຟ້ອງສານປະຊາຊົນຕັດສິນຕາມຂະບວນການຍຸຕິທໍາ.

     ເຈົ້າໜ້າທີ່ຕໍາຫຼວດ ປກສ ແຂວງໄຊຍະບູລີ ໃຫ້ຮູ້ວ່າ: ພາຍຫຼັງໄດ້ລາຍງານຈາກປະຊາຊົນວ່າ ມີເຫດການຄາດຕະກໍາຢູ່ເຮືອບັກທີ່ບ້ານຕານລານ ຈຶ່ງໄດ້ນໍາກໍາລັງຕໍາຫຼວດວິຊາສະເພາະໄປກວດກາສະຖານທີ່ເກີດເຫດພົບເຫັນ ທ້າວ ບົວໂຮມ ອາຍຸ 55 ປີ ປະຊາຊົນບ້ານຕາລານ ເມືອງໄຊຍະບູລີ ແຂວງໄຊຍະບູລີ ເສຍຊີວິດຢູ່ໃນເຮືອບັກຂອງຜູ້ກ່ຽວ ໂດຍຖືກແທງດ້ວຍຂອງມີຄົມເຂົ້າທີ່ຂ້າງຊ້າຍ 2 ຈຸດ, ບໍລິເວນໃກ້ຄຽງມີມີດ 1 ດວງ ແລະ ຍັງມີຄາບເລືອດຕິດຢູ່. ຜູ້ກໍ່ເຫດເຊິ່ງເປັນຫຼານຊາຍຂອງຜູ້ເສຍຊີວິດນັ້ນໄດ້ຖືກປະຊາຊົນເຂດພ້ອມກັນຈັບຕົວໄວ້. ຈາກນັ້ນ, ເຈົ້າໜ້າທີ່ຈຶ່ງນໍາຕົວຜູ້ກ່ຽວໄປສອບສວນຢູ່ກອງບັນຊາການ ປກສ ແຂວງໄຊຍະບູລີ.

     ຜ່ານການສອບສວນ, ທ້າວ ປາລີ ຮັບສາລະພາບວ່າ ໃນວັນທີ 26 ພຶດສະພາ 2019 ໄດ້ເສບຢາບ້າ 12 ເມັດ. ຈາກນັ້ນ, ກໍໄດ້ສືບຕໍ່ເຮັດວຽກຢູ່ນໍາ ທ້າວ ບົວໂຮມ ຜູ້ເປັນລຸງ (ອ້າຍຂອງນ້າເຂີຍ). ຈົນຮອດເວລາ 1:00 ໂມງຂອງຄືນວັນທີ 27 ພຶດສະພາ ຈຶ່ງພາກັນເຂົ້ານອນ. ຮອດເວລາ 4:00 ໂມງເຊົ້າຂອງວັນດຽວກັນ, ທ້າວ ປາລີ ກໍເກີດມີອາການເມົາຢາບ້າ ແລະ ນອນບໍ່ຫຼັບ ຈົນເກີດມີອາການປະສາດຫຼອນຄືກັບວ່າຈະມີຄົນມາຈັບຕົນເອງ ຈຶ່ງໄດ້ສົງໄສວ່າ ທ້າວ ບົວໂຮມ ທີ່ນອນຢູ່ທາງຂ້າງເປັນຜູ້ບອກເຈົ້າໜ້າທີ່ມາຈັບ.

     ດັ່ງນັ້ນ, ທ້າວ ປາລີ ຈຶ່ງຈັບເອົາມີດຢູ່ຂ້າງບ່ອນນອນ ແທງເຂົ້າທາງຂ້າງເບື້ອງຊ້າຍຂອງທ້າວ ບົວໂຮມ ຈໍານວນ 2 ບາດ ເຮັດໃຫ້ຜູ້ເປັນລຸງເສຍຊີວິດຄາທີ່. ຈາກນັ້ນ, ກໍຍ່າງໄປນັ່ງຢູ່ຮ້ານຂາຍເຄື່ອງໃກ້ທ່າເຮືອ. ເວລາຕໍ່ມາ, ຄອບ ຄົວຂອງຜູ້ເສຍຊີວິດໄດ້ມາພົບເຫັນ ທ້າວ ບົວໂຮມ ນອນເສຍຊີວິດຢູ່ເທິງເຮືອ ຈຶ່ງແຈ້ງຄວາມຕໍ່ ປກສ ກຸ່ມ ແລ້ວເຂົ້າຈັບຕົວ ທ້າວ ປາລີ ໃນຂະນະທີ່ຍັງມີອາການມືນເມົາຢາບ້າ.


ທີ່ມາ: ໜັງສືພິມຄວາມສະຫງົບ Lao Security News
  • ຮູບພາບ

  • ແທັກທີ່ກ່ຽວຂ້ອງ