• ໜຸ່ມ-ສາວຖືກ​ຈັບ​ໄດ້​ທີ່​ ​ສະ​ຫວັນ​ນະ​ເຂດ ຂໍ້ຫາຢາເສບຕິດ

ໂດຍ: ສີເປື້ອນມື 24 ມິຖຸນາ 2019 (14.20 ນ.) Read : 378

ໃນວັນທີ 4 ມິຖຸນາ 2019 ຜ່ານມານີ້, ເຈົ້າໜ້າທີ່ພະແນກ ຕຳຫຼວດສະກັດກັ້ນ ແລະຕ້ານຢາເສບຕິດ ປກສ ແຂວງ ສະຫວັນນະເຂດກັກຕົວພວກຄ້າຂາຍຢາເສບຕິດໄດ້ 04 ຄົນ ຄື: ທ້າວ ເລັ່ງຫາ ອາຍຸ 40 ປີ, ຄ້າຂາຍ ຢູ່ບ້ານນ້ຳພາວ ເມືອງ ຄຳເກີດ ແຂວງ ບໍລິຄຳໄຊ, ທ້າວ ປໍຊົງ ຫຼື (ຈົວ)ອາຍຸ 24 ປີ ອາ​ຊີບເຮັດນາ ບ້ານ ນາແສນຄຳ ເມືອງ ໄຊ ແຂວງ ອຸດົມໄຊ, ນາງ ລີຈ້າງ ອາຍຸ 16 ປີ ແລະນາງ ຊົວວ່າງ ອາຍຸ 16 ປີ ທັງສອງ ຢູ່ບ້ານ ທ່າດິນແດງ ເມືອງ ໄຊທານີ ນະຄອນຫຼວງວຽງຈັນ ພ້ອມຂອງກາງຢາບ້າ 09 ມັດ ຫຼື 18.185 ເມັດ, ຢາໄອສ໌ 05 ຖົງ, ເທົ່າກັບ 5 ກິໂລກະລາມ ລົດໃຫຍ່ຍີ່ຫໍ້ຮຸ່ນໃດ ຄຼີຕ້າ ສີດຳ ບໍ່ຕິດປ້າຍທະບຽນ, ໂທລະສັບ 9 ໜ່ວຍ, ກ້ອງຖ່າຍຮູບ 1 ໜ່ວຍ ແລະເງິນຈຳນວນ 400.000 ກີບ.
ເຈົ້າໜ້າທີ່ໃຫ້ຮູ້ວ່າ: ໃນເວລາ 10ໂມງ 30 ນາທີ ຂອງວັນທີ 4 ມິຖຸນາ 2019 ທາງເຈົ້າໜ້າທີ່ຕຳຫຼວດຢູ່ຈຸດກວດກາດ່ານເຊບັ້ງຫຽງ ເມືອງ ສອງຄອນ ແຂວງ ສະຫວັນນະເຂດ ໄດ້ລັດລົດຍີ້ຫໍ້ຮຸນໃດຄຼີຕ້າສີດຳ ບໍ່ມີປ້າຍທະບຽນທີ່ແລ່ນມາຕາມເສັ້ນທາງເລກທີ 13 ໃຕ້ ເພື່ອເດີນທາງລົງນະຄອນປາກເຊ ຈາກນັ້ນທາງເຈົ້າຫນ້າທີ່ຈຶ່ງໄດ້ກັກລົດຄັນດັ່ງກ່າວ ເພື່ອກວດກາເອກະສານລົດແຕ່ ເຫັນວ່າ: ບຸກຄົນທ່ີຂັບຂີ່ລົດດັ່ງກ່າວມີພິລຸດສົງໄສ ເຈົ້າໜ້າທີ່ຈຶ່ງຂໍກວດຄົ້ນລົດຄັນດັ່ງກ່າວ ຜ່ານການກວດຄົ້ນຈຶ່ງພົບເຫັນ ຢາເສບຕິດປະເພດ ຢາໄອສຈຳ ນວນ 5 ຖົງເທົ່າກັບ 5 ກິໂລ ແລະຢາບ້າ 9 ມັດ, ກັບ 1 ຖົງ, ເທົ່າກັບ 18.185 ເມັດ ຊຸກເຊື່ອງໄວ້ຢູ່ບ່ອນເກັບເຄື່ອງທ້າຍລົດ ຈຶ່ງໄດ້ກັກຕົວພວກກ່ຽວຈຳນວນ 4 ຄົນ ທີ່ມານຳລົດດັ່ງກ່າວ ຈາກນັ້ນຈຶ່ງປະສານສົມທົບກັບເຈົ້າໜ້າທີ່ສະກັດກັ້ນ-ຕ້ານຢາເສບຕິດແຂວງ ສະຫວັນນະເຂດ ເພື່ອນຳຕົວພວກກ່ຽວມາດຳເນີນການສືບສວນ-ສອບສວນ
ຜ່ານການສືບສວນ-ສອບ ສວນໃນເບື້ອງຕົ້ນພວກກ່ຽວໃຫ້ຮູ້ວ່າ: ຢາໄອສ໌ ແລະຢາບ້າ ຈຳນວນດັ່ງກ່າວແມ່ນເປັນຂອງທ້າວ ເລັ່ງຫາ ແມ່ນຊື້ມາຈາກນຳຜູ້ຮ່ວມຂະບວນການຢູ່ແຂວງ ບໍລິຄຳໄຊ, ສ່ວນທ້າວ ປໍຊົງ ຫຼື (ຈົວ) ເປັນຜູ້ຕິດ ຕໍ່ຊື້-ຂາຍ ກັບລູກຄ້າ ເຊິ່ງຊື້ ຢາໄອສ໌ 1 ກິໂລ ໃນລາຄາ 100.000 ບາດ ໄປຂາຍຕໍ່ໃຫ້ລູກຄ້າ 1 ກິໂລລາຄາ 120.000 ບາດ, ສ່ວນຢາບ້າຊື້ໃນລາຄາມັດ ລະ 10.000 ບາດ, ມາຂາຍ ຕໍ່ໃຫ້ລູກຄ້າໃນລາຄາມັດລະ 15.000 ບາດແຕ່ຖືກເຈົ້າໜ້າທີ່ກັກຕົວກ່ອນ. ສ່ວນພວກຮ່ວມຂະບວນການທາງເຈົ້າໜ້າທີ່ຍັງສືບຕໍ່ນຳຈັບຕົວມາດຳເນີນຄະດີຕາມລະບຽບກົດໝາຍຕໍ່ໄປ.

ທີ່ມາ: ສະຫວັນພັດທະນາ ຂ່າວ / Savanhphuttana News
  • ຮູບພາບ

  • ແທັກທີ່ກ່ຽວຂ້ອງ