• ເຄັດລັບເພີ່ມສະເໜ່ໃຫ້ຕົນເອງ ຈົນໃຜໆກໍຢາກຢູ່ໃກ້

ໂດຍ: Admin Mahason 06 ມີນາ 2020 (09.56 ນ.) Read : 414

ເຖິງແມ່ນວ່າເຮົາຈະເປັນຄົນອັດທະຍາໄສດີ, ເຂົ້າກັບຄົນໄດ້ງ່າຍ ແລະໜ້າຕາດີກໍຕາມ ແຕ່ຖ້າຫາກເຮົາວາງຕົວບໍ່ເໝາະສົມ ກໍບໍ່ມີພຽງຢາກເຂົ້າມາຫາເຮົາ. ດັ່ງນັ້ນ, ລອງມາປັບສະເໜ່ໃນຕົວຂອງເຮົາກັນໃໝ່ຕາມຄໍາແນະນໍາລຸ່ມນີ້ ເພື່ອເຮັດໃຫ້ເຮົາເບິ່ງເປັນຄົນທີ່ໜ້າສົນໃຈຫຼາຍຂຶ້ນ ຈົນໃຜໆກໍຢາກເຂົ້າຫາ.

1. ຜູ້ຍິງທີ່ດີ ບໍ່ນິນທາຄົນອື່ນ: ເລີ່ມຈາກເລື່ອງເລັກໆນ້ອຍໆໃນສັງຄົມ ຜູ້ຍິງສ່ວນຫຼາຍແມ່ນມັກຕັ້ງກຸ່ມລົມກັນ ເຊິ່ງໃນບາງຄັ້ງອາດຈະມີການນິນທາຄົນອື່ນ. ລັກສະນະການວາງຕົວແບບນີ້ຈະເຮັດໃຫ້ຄົນອື່ນເບິ່ງເຮົາໃນແງ່ລົບ, ບໍ່ໜ້າຄົບຫາ ແລະເຊື່ອໃຈບໍ່ໄດ້. ດັ່ງນັ້ນ, ຈຶ່ງຢາກແນະນໍາໃຫ້ຫຼີກເວັ້ນກັບກຸ່ມຄົນທີ່ມັກຕັ້ງກຸ່ມນິນທາຄົນອື່ນ, ບໍ່ຄວນໄປຫຍຸ້ງກ່ຽວ ຫຼືຖ້າເຂົາກໍາລັງຕັ້ງກຸ່ມ ກໍໃຫ້ຮີບຍ່າງອອກມາຈາກບ່ອນນັ້ນທັນທີ.

2. ຕ້ອງມີມາລະຍາດ ແລະຮູ້ກາລະເທສະ: ສໍາລັບຂໍ້ນີ້ເປັນລັກສະນະທົ່ວໄປທີ່ທຸກຄົນຕ້ອງຍຶດຖື ແລະປະຕິບັດຕາມ. ເນື່ອງຈາກໃນທຸກສັງຄົມລ້ວນແຕ່ມີວັດທະນະທໍາ ແລະມາລະຍາດຂັ້ນພື້ນຖານທີ່ຕ້ອງໄດ້ເຮັດຢູ່ແລ້ວ ຢ່າງໜ້ອຍກໍໃຫ້ເອົາໃຈໃສ່ເລື່ອງການເວົ້າຈາໃຫ້ອ່ອນນ້ອມຖ່ອມຕົນຈະເຮັດໃຫ້ຕົນເອງມີຄ່າຂຶ້ນ ໂດຍສະເພາະແມ່ນຮູ້ຈັກໃຊ້ຄໍາວ່າ: ຂອບໃຈ ແລະຂໍໂທດໃຫ້ລື້ງປາກ ເຊື່ອວ່າຄົນທີ່ໄດ້ຍິນຈະຮູ້ສຶກດີ ແລະເຮົາຈະເປັນຄົນທີ່ໜ້າສົນໃຈ ຫຼືມີຄວາມໜ້າຮັກໄປໃນຕົວ.

3. ຢ່າເວົ້າທຸກຢ່າງຕາມທີ່ຄິດ ແລະສິ່ງໃດທີ່ບໍ່ດີກໍຄວນເກັບໄວ້: ເລື່ອງນີ້ນອກຈາກຈະເປັນມາລະຍາດທີ່ດີທາງສັງຄົມແລ້ວ ຍັງເຮັດໃຫ້ເຮົາເບິ່ງມີສະເໜ່ ແລະໜ້າເຊື່ອຖືຍິ່ງຂຶ້ນ ເພາະບາງເທື່ອເຮົາອາດຈະບໍ່ສາມາດຄວບຄຸມທຸກຢ່າງໄດ້ຕາມທີ່ຄິດໄວ້ ແຕ່ກ່ອນຈະເວົ້າຫຍັງອອກມານັ້ນຄວນຄິດຕຶກຕອງໃຫ້ດີເສຍກ່ອນ ເພາະບາງຄໍາເວົ້າອາດຈະໄປກະທົບຈິດໃຈຂອງຄົນຟັງໄດ້. ບໍ່ແມ່ນວ່າບໍ່ໃຫ້ເຮົາອອກຄວາມຄິດເຫັນ ເພາະຖ້າເປັນແບບນັ້ນມັນກໍອາດຈະເຮັດໃຫ້ເຮົາຮູ້ສຶກອຶດອັດໃຈໄດ້.

4. ເວົ້າກົງໆໄດ້ ແຕ່ຕ້ອງບໍ່ທໍາຮ້າຍຈິດໃຈຄົນອື່ນ: ຫຼາຍຄົນອາດຈະເຂົ້າໃຈຜິດວ່າ ຈະເຮັດໃຫ້ຕົນເອງໃຫ້ມີຄ່າຕ້ອງເປັນຄົນຮຽບຮ້ອຍຄືຜ້າພັບໄວ້ ແຕ່ໃນຄວາມເປັນຈິງແລ້ວ ຜູ້ຍິງທີ່ມີຄ່າ ຄືຜູ້ຍິງທີ່ຮູ້ຈັກນໍາໃຊ້ຄໍາເວົ້າທີ່ເໝາະສົມ, ເວົ້າກົງໆ ແລະບໍ່ເວົ້າອ້ອມໃຫ້ເສຍເວລາໃນການສື່ສານກັບຄົນອື່ນ ແຕ່ກໍຕ້ອງຄໍານຶງເຖິງສະຖານະການ ແລະສະພາບຈິດໃຈຂອງຜູ້ຟັງໄປນໍາ.

5. ມີຄວາມໝັ້ນໃຈ ແລະເປັນຕົວຂອງຕົວເອງ: ຜູ້ຍິງທີ່ມີບຸກຄະລິກທີ່ດີ ຄືຜູ້ຍິງທີ່ມີຄວາມໝັ້ນໃຈໃນຕົວເອງ ເພາະມັນຈະເຮັດໃຫ້ເຮົາມີຈຸດຢືນເປັນຂອງຕົວເອງ ແລະເປັນຄົນທີ່ໜ້າເຂົ້າຫາ. ຄວາມໝັ້ນໃຈນີ້ອາດຈະສະແດງອອກຜ່ານທ່າທາງ, ການນັ່ງ, ຢືນ, ຍ່າງ ຫຼືການເວົ້າຈາ ເຊິ່ງບຸກຄະລິກກະພາບເຫຼົ່ານີ້ ສາມາດເຝິກຝົນໄດ້.

6. ເປັນຄົນຈິດໃຈດີ,​ ມີເມດຕາ ແລະໃຫ້ກຽດຄົນອື່ນ: ຜູ້ຍິງບາງຄົນອາດຈະມີຄວາມໝັ້ນໃຈຫຼາຍເກີນໄປ ຈົນເຮັດໃຫ້ຄົນອື່ນສັງເກດເຫັນວ່າຍິ່ງເກີນໄປ ແລະບໍ່ໜ້າຄົບຫາ. ດັ່ງນັ້ນ, ໃຫ້ລອງຫຼຸດຄວາມເຫັນແກ່ຕົວລົງໜ້ອຍໜຶ່ງ ແລ້ວເພີ່ມຄວາມໃຈດີ ແລະເພີ່ມຄວາມເຫັນໃຈຄົນອື່ນເຂົ້າໄປນໍາຈະເຮັດໃຫ້ເຮົາໜ້າຄົບຫາ. ແຕ່ຖ້າຫາກເຮົາບໍ່ໃຫ້ກຽດຄົນອື່ນ ນອກຈາກຄົນອື່ນຈະບໍ່ໃຫ້ກຽດເຮົາແລ້ວ ຍັງເຮັດໃຫ້ຄົນອື່ນເບິ່ງເຮົາເປັນຄົນບໍ່ດີນໍາອີກ.

ຖ້າຢາກເປັນຄົນງາມ ແລະມີສະເໜ່ ບໍ່ຈໍາເປັນທີ່ຈະຕ້ອງຊື້ເຄື່ອງນຸ່ງ ຫຼືເຄື່ອງປະດັບແພງໆມາໃຊ້ ພຽງແຕ່ເຮົາປັບປ່ຽນບຸກຄະລິກກະພາບ ແລະເຂົ້າຫາຄົນອື່ນດ້ວຍວິທີການວາງຕົວຢ່າງເໝາະສົມ ພຽງເທົ່ານີ້ກໍເຮັດໃຫ້ເຮົາງາມ ແລະມີສະເໜ່ໄດ້ແລ້ວ. 

 




ທີ່ມາ:
  • ແທັກທີ່ກ່ຽວຂ້ອງ