• ເນລະມິດຜິວງາມດ້ວຍ “ນໍ້າກ້ອນ”

ໂດຍ: Admin Mahason 21 ມັງກອນ 2020 (10.32 ນ.) Read : 184

     ຮູ້ບໍ່ວ່າ “ນໍ້າກ້ອນ” ມີປະໂຫຍດຫຼາກຫຼາຍ ນອກຈາກການບໍລິໂພກ ເຊິ່ງມັນຈະຊ່ວຍເສີມສ້າງຄວາມງາມໃຫ້ກັບຜິວພັນເຮົາບໍ່ໜ້ອຍກວ່າເຄື່ອງສໍາອາງເລີຍ. ຄຸນປະໂຫຍດ ແລະຄວາມງາມທີ່ໄດ້ຈາກນໍ້າກ້ອນມີຫຍັງແດ່ ລອງມາເບິ່ງນໍາກັນ.
1. ຊ່ວຍປັບຮູຂຸມຂົນໃຫ້ແຄບລົງ ແລະຫຼຸດໄຂມັນ.
     ຄວາມເຢັນຂອງນໍ້າກ້ອນ ມີສ່ວນຊ່ວຍປັບຮູຂຸມຂົນໃຫ້ແຄບລົງ ແລະຫຼຸດຄວາມມັນໄດ້ ໂດຍໃຫ້ນໍາເອົານໍ້າກ້ອນຫໍ່ໃສ່ຜ້າແພທີ່ສະອາດ ມາຖູໄປມາບໍລິເວນໃບໜ້າ ຈະເຮັດໃຫ້ຮູຂຸມຂົນເຮົາແຄບລົງທັນທີ, ເມື່ອຮູຂຸມຂົນແຄບລົງ ກໍຈະເຮັດໃຫ້ຄວາມມັນຂອງຜິວໜ້າຫຼຸດລົງໄປຕາມໆກັນ. ດັ່ງນັ້ນ, ສໍາລັບໃຜທີ່ມີບັນຫາຮູຂຸມຂົນກວ້າງ ແລະໃບໜ້າມັນ ໃຫ້ລອງໃຊ້ວິທີນີ້ເພື່ອປັບສະພາບຜິວໜ້າ.
2. ຫຼຸດອາການຕາບວມ ແລະການອັກເສບຂອງສິວ.
     ການອົດນອນ, ການພັກຜ່ອນບໍ່ພຽງພໍ ແລະເຮັດວຽກນັ່ງຢູ່ໜ້າຈໍຄອມພິວເຕີເປັນເວລາດົນ ຫຼືຮ້ອງໄຫ້ຫຼາຍເກີນໄປ ບັນຫາເຫຼົ່ານີ້ຈະເຮັດໃຫ້ເກີດອາການຕາບວມໄດ້. ບັນຫາຕາບວມຈະເຮັດໃຫ້ແຕ່ງໜ້າອອກມາບໍ່ງາມ ແລະສູນເສຍຄວາມໝັ້ນໃຈໄດ້. ສໍາລັບວິທີແກ້ໄຂ ໃຫ້ໃຊ້ນໍ້າກ້ອນຫໍ່ໃສ່ຜ້າແພບາງໆມາແປະໄວ້ບໍລິເວນດວງຕາ ຈະເຮັດໃຫ້ອາການບວມຂອງເປືອກຕາຫຼຸດລົງໄດ້ ແລະສົດໃສຍິ່ງຂຶ້ນ. ນອກນັ້ນ, ສໍາລັບຜູ້ທີ່ມີບັນຫາສິວອັກເສບ ຫຼືບວມແດງ ກໍສາມາດໃຊ້ວິທີນີ້ໄດ້ເຊັ່ນກັນ.
3. ປ້ອງກັນຮອຍຕີນກາເທິງໃບໜ້າ.
     ການເອົານໍ້າກ້ອນມາແປະໄວ້ບໍລິເວນໃບໜ້າ ຈະຊ່ວຍປ້ອງກັນຮອຍຕີນກາເທິງໃບໜ້າໄດ້ເປັນຢ່າງດີ ເພາະນໍ້າກ້ອນ ແລະຄວາມເຢັນຂອງມັນ ຈະຊ່ວຍກະຕຸ້ນການໄຫຼວຽນຂອງເລືອດເທິງໃບໜ້າໄດ້ດີ. ເມື່ອເລືອດໄຫຼວຽນດີ ສານອາຫານກໍມາຫຼໍ່ລ້ຽງຜິວພັນໄດ້ຢ່າງເຕັມທີ່ ແລະເຮັດໃຫ້ເຮົາມີສຸຂະພາບຜິວທີ່ດີຍິ່ງຂຶ້ນ ພ້ອມທັງລຶບຮອຍຕີນກາເທິງໃບໜ້າໄດ້ເປັນຢ່າງດີ.
4. ຊ່ວຍເຮັດໃຫ້ເຄື່ອງສໍາອາງຕິດດົນ.
     ນອກຈາກນໍ້າກ້ອນຈະຊ່ວຍປັບຮູຂຸມຂົນ ແລະຫຼຸດຄວາມມັນແລ້ວ ມັນຍັງເຮັດໃຫ້ເຄື່ອງສໍາອາງຕິດຢູ່ດົນໃບໜ້າເຮົາ ເມື່ອເວລາແຕ່ງໜ້າ. ລອງເອົານໍ້າກ້ອນມາຖູບໍລິເວນໃບໜ້າກ່ອນແຕ່ງໜ້າທຸກຄັ້ງ ຮັບຮອງວ່າເຄື່ອງສໍາອາງເຮົາຈະຕິດດົນໝົດມື້ ໂດຍທີ່ບໍ່ຕ້ອງຕື່ມຊໍ້າອີກ.
5. ຫຼຸດຜື່ນຄັນເທິງຜິວໜ້າ ແລະຜິວກາຍ.
     ປັດຈຸບັນອາກາດຮ້ອນ ແລະເຕັມໄປດ້ວຍມົນລະພິດຕ່າງໆ ຈຶ່ງເຮັດໃຫ້ບາງຄົນທີ່ຜິວບາງແພ້ງ່າຍ ເກີດບັນຫາຜື່ນຄັນ ຫຼືສິວເກີດຂຶ້ນເຕັມໃບໜ້າ ໃຫ້ໃຊ້ນໍ້າກ້ອນແປະໄວ້ ແລະຖູໄປມາໃຫ້ທົ່ວໃບໜ້າ ໃນຈຸດທີ່ມີສິວ ຫຼືມີຜື່ນຄັນ ຈະເຮັດໃຫ້ບັນເທົາອາການຄັນເຫຼົ່ານັ້ນລົງໄດ້.




ທີ່ມາ:
  • ແທັກທີ່ກ່ຽວຂ້ອງ