• ຜິວງາມແບບທໍາມະຊາດ ໂດຍບໍ່ຕ້ອງເພິ່ງສັນຍະກໍາ

ໂດຍ: Admin Mahason 17 ທັນວາ 2019 (09.34 ນ.) Read : 855

     ກິດຈະກໍາຂອງແຕ່ລະຄົນອາດຈະແຕກຕ່າງກັນໄປໃນແຕ່ລະວັນ, ເຊື່ອວ່າຄົນສ່ວນຫຼາຍອາດຈະທຸ້ມເທ ແລະເອົາໃຈໃສ່ເລື່ອງຂອງວຽກງານເປັນຫຼັກ ຈົນລືມເບິ່ງແຍງສຸຂະພາບ ຫຼືຜິວພັນຂອງຕົນເອງ. ດັ່ງນັ້ນ, ເຮົາຕ້ອງມີທັງສອງຢ່າງຄວບຄຸມໄປຄູ່ກັນ ບໍ່ດັ່ງນັ້ນເຮົາຈະຄິດເສຍດາຍພາຍຫຼັງ. ສະບັບນີ້ ເຮົາມີເຄັດລັບງ່າຍໆ ສໍາລັບຜູ້ທີ່ຈະເລີ່ມຕົ້ນເບິ່ງແຍງຜິວພັນຂອງຕົນເອງ.
1. ນອນຫຼັບພັກຜ່ອນໃຫ້ພຽງພໍ: ເປັນວິທີການພັກຟື້ນຜິວທີ່ໄດ້ຜົນດີທີ່ສຸດ ເພາະຈະເຮັດໃຫ້ລະບົບກົນໄກການເຮັດວຽກຂອງຮ່າງກາຍມີປະສິດທິພາບ ແລະມີຄວາມສົມດຸນ ເຮັດໃຫ້ຜິວຜ່ອນຄາຍຈາກຄວາມເມື່ອຍລ້າທີ່ສະສົມມາໝົດມື້ ລວມທັງຊ່ວຍໃນການສ້າງ ແລະຜັດປ່ຽນເຊລ໌ຜິວອີກດ້ວຍ.
2. ໝັ່ນອອກກໍາລັງກາຍ: ນອກຈາກຈະເຮັດໃຫ້ຮ່າງກາຍແຂງແຮງ ແລະສຸຂະພາບດີແລ້ວ ຍັງຊ່ວຍເຮັດໃຫ້ຜ່ອນຄາຍທັງຮ່າງກາຍ ແລະອາລົມຈາກຄວາມຕຶງຄຽດ. ການເຄື່ອນໄຫວຈາກການອອກກໍາລັງກາຍ ເຮັດໃຫ້ມີການຂັບຖ່າຍສິ່ງເປິເປື້ອນຂອງຮ່າງກາຍອອກທາງເຫື່ອ ສົ່ງຜົນເຮັດໃຫ້ມີຜິວພັນທີ່ດີຕາມມາ.
3. ດື່ມນໍ້າຫຼາຍໆ: ການດື່ມນໍ້າຫຼາຍ ຈະເຮັດໃຫ້ຮ່າງກາຍສົດຊື່ນ, ຜິວພັນຊຸ່ມຊື່ນ, ເປັ່ງປັງສົດໃສ ແລະມີຊີວິດຊີວາຢູ່ສະເໝີ. ການດື່ມນໍ້າເປັນການບໍາລຸງ ແລະຕື່ມຄວາມຊຸ່ມຊື່ນໃຫ້ແກ່ຜິວ.
4. ກິນອາຫານທີ່ມີປະໂຫຍດໃຫ້ຄົບ 5 ໝູ່: ເຮັດໃຫ້ຮ່າງກາຍໄດ້ຮັບສານອາຫານທີ່ຈໍາເປັນຄົບຖ້ວນ, ອາຫານທີ່ມີປະໂຫຍດຈະເຮັດໃຫ້ຮ່າງກາຍແຂງແຮງ ແລະມີພາວະສົມດຸນ ສົ່ງຜົນເຮັດໃຫ້ຜິວພັນດີໄປນໍາ ໂດຍສະເພາະຖ້າກິນຜັກ ແລະໝາກໄມ້ ທີ່ອຸດົມໄປດ້ວຍວິຕາມິນເອ, ບີ, ຊີ, ດີ, ອີ  ແລະສານຕໍ່ຕ້ານອະນຸມູນອິດສະຫຼະເປັນປະຈໍາ ຈະຊ່ວຍບໍາລຸງ ແລະຟື້ນຟູສະພາບຜິວໃຫ້ມີສຸຂະພາບທີ່ດີຍິ່ງຂຶ້ນ ເຊັ່ນ: ໝາກກ້ຽງ, ໝາກໂມ, ສະຕໍເບີລີ່, ໝາກເລັ່ນ, ໝາກແຕງ ແລະດອກຜັກ ບັອກໂຄລີ່ ເຫຼົ່ານີ້ເປັນຕົ້ນ.
5. ຫຼີກຫຼ່ຽງການສູບຢາ ແລະດື່ມເຄື່ອງດື່ມປະສົມທາດເຫຼົ້າຫຼາຍເກີນໄປ: ເພາະຈະເຮັດໃຫ້ການໄຫຼວຽນຂອງເລືອດເຮັດວຽກໄດ້ບໍ່ເຕັມທີ່, ເຮັດໃຫ້ຮ່າງກາຍເສື່ອມສະພາບ ແລະມີຜົນເຮັດໃຫ້ຜິວພັນແຫ່ວຍານອີກດ້ວຍ.
6. ເລືອກໃຊ້ຜະລິດຕະພັນບໍາລຸງຜິວທີ່ເໝາະສົມ: ຄວນໃສ່ໃຈໃນການເລືອກຜະລິດຕະພັນບໍາລຸງ ແລະຟື້ນຟູສະພາບຜິວທີ່ເໝາະກັບຜິວຂອງເຮົາ ເພາະເປັນອີກວິທີໜຶ່ງທີ່ຈະຊ່ວຍບໍາລຸງ, ສ້ອມແຊມເຊລ໌ຜິວ ແລະຊະລໍຄວາມເຊື່ອມສະພາບຂອງຜິວກ່ອນໄວໄດ້.
7. ຫຼີກລ່ຽງແສງແດດ ແລະທາຄຼີມກັນແດດ: ເພາະລັງສີຢູວີຈາກແສງແດດເປັນໄພອັນຕະລາຍຢ່າງຍິ່ງຕໍ່ກັບຜິວຂອງຄົນເຮົາ ເພາະນອກຈາກຈະເຮັດໃຫ້ຜິວແຫ້ງ, ດໍາ, ເກີດຝ້າ, ສິວ ແລະຈຸດດ່າງດໍາຕ່າງໆແລ້ວ ຍັງເປັນສາເຫດຂອງການເກີດພະຍາດມະເຮັງຜິວໜັງອີກດ້ວຍ. ດັ່ງນັ້ນ, ຄວນປົກປ້ອງຜິວດ້ວຍການທາຄຼີມກັນແດດເປັນປະຈໍາກ່ອນອອກຈາກເຮືອນ.
8. ເບິ່ງໂລກໃນແງ່ບວກ, ບໍ່ຕຶງຄຽດ ແລະອາລົມດີຢູ່ສະເໝີ: ຈະເຮັດໃຫ້ມີສຸຂະພາບຈິດທີ່ດີ ແລະມີພາວະສົມດຸນຈາກພາຍໃນ ອັນກໍ່ໃຫ້ເກີດສຸຂະພາບທີ່ດີ, ມີຮ່າງກາຍແຂງແຮງ ແລະສົ່ງຜົນໃຫ້ມີຜິວພັນທີ່ດີຕາມມາ.




ທີ່ມາ:
  • ແທັກທີ່ກ່ຽວຂ້ອງ