• ແກ້ໄຂຜົມມັນງ່າຍໆ ສຳລັບທ່ານໃດທີ່ຄ້ານສະຜົມ

ໂດຍ: ແມວດຳ 07 ມັງກອນ 2019 (15.44 ນ.) Read : 205

ຜົມມັນ ເປັນບັນຫາໜຶ່ງທີ່ກວນໃຈສາວໆຫຼາຍຄົນ ເພາະຖ້າຜົມມັນຕະຫຼອດຈຳເປັນຕ້ອງສະຜົມເກືອບທຸກມື້ ເຊິ່ງຜູ້ຂຽນເຊື່ອວ່າເປັນເລື່ອງທີ່ສາວໆຫຼາຍຄົນລຳຄານໃຈ. ດ່ັງນັ້ນ ພວກເຮົາຈຶ່ງນຳເອົາວິທີແກ້ໄຂງ່າຍໆມາຝາກ ແບບສະຜົມເທື່ອດຽວຜົມບໍ່ມັນງ່າຍໆ.

1.ເລືອກຢາສະຜົມສຳລັບຜົມມັນ, ຫຼີກລ່ຽງນ້ຳຢາສະຜົມທີ່ມີຄຸນສົມບັດແບບ 2 in 1, ນອກຈາກນີ້ ກໍບໍ່ຄວນສະຜົມຫຼາຍຄັ້ງເກີນໄປ. ຖ້າຫາກທ່ານໃດທີ່ຜົມມີຄວາມເປິເປື້ອນກໍສາມາດສະໄດ້ທຸກມື້. ເຊິ່ງການສະຜົມທີ່ຖືກຕ້ອງຄວນໝັກຜົມໄວ້ປະມານ 5 ນາທີ ແລ້ວຈຶ່ງລ້າງອອກ.

2.ສະຜົມດ້ວຍນ້ຳອຸນຫະພູມປົກກະຕິ, ເນື່ອງຈາກນ້ຳອຸ່ນ ຫຼືນ້ຳຮ້ອນຈະກະຕຸ້ນຕ່ອມໄຂມັນໃຫ້ຜະລິດນ້ຳມັນອອກມາຫຼາຍຂຶ້ນ.

3. ຫຼີກລ່ຽງການໃຊ້ຄຣີມນວດຜົມ, ຄົນທີ່ຜົມມັນປົກກະຕິຕ່ອມໄຂມັນຈະຜະລິດນ້ຳມັນອອກມາເຮັດໃຫ້ເສັ້ນຜົມຊຸ່ມຊື່ນຢູ່ແລ້ວ. ຖ້າຫາກຢາກໃຊ້ແທ້ໆ ກໍຄວນໃຊ້ສະເພາະບໍລິເວນປາຍເສັ້ນຜົມເທົ່ານັ້ນ.

4.ໝັກຜົມເປັນປະຈຳໂດຍເລືອກໃຊ້ສູດໝັກຜົມທີ່ແກ້ໄຂຜົມມັນ ເຊັ່ນ: ໃຊ້ນ້ຳໝາກນາວ 1 ໜ່ວຍ ປະສົມກັບໄຂ່ຂາວ 2 ໜ່ວຍ ແລ້ວນຳມາໝັກຜົມ 30 ນາທີ. ນອກຈາກຜົມຈະບໍ່ມັນງ່າຍແລ້ວຍັງຊ່ວຍບຳລຸງເສັ້ນຜົມນຳອີກ ແລະຄວນເຮັດແບບນີ້ເປັນປະຈຳອາທິດລະຄັ້ງ.

5.ຫຼີກລ່ຽງການຫວີ ຫຼືສາງຜົມເລື້ອຍໆ ເພາະມັນເປັນການກະຕຸ້ນໃຫ້ໜັງຫົວຜະລິດນ້ຳມັນອອກມາຫຼາຍຍິ່ງຂຶ້ນ.

6.ຫຼີກລ່ຽງການໃຊ້ຜະລິດຕະພັນທີ່ເຮັດໃຫ້ຜົມມັນ ບໍ່ວ່າຈະເປັນຜະລິດຕະພັນຈັດແຕ່ງຜົມໃຫ້ຢູ່ຊົງ ຫຼືຜະລິດຕະພັນເພີ່ມຄວາມເງົາງາມໃຫ້ຜົມ.

7.ຫຼີກລ່ຽງສະຖານທີ່ກາງແຈ້ງທີ່ມີອາກາດຮ້ອນ, ເພາະຄວາມຮ້ອນຈະກະຕຸ້ນຕ່ອມໄຂມັນຜະລິດນ້ຳມັນອອກມາຫຼາຍຂຶ້ນ.

8.ເລືອກກິນອາຫານທີ່ມີວິຕາມິນບີ, ເກືອແຮ່, ຜັກສີຂຽວ, ໝາກໄມ້ ແລະພືດປະເພດຖົ່ວ, ຫຼີກລ່ຽງອາຫານທີ່ມີໄຂມັນສູງ.

9.ເຮັດໃຫ້ຕົນເອງຮູ້ສຶກຜ່ອນຄາຍຢູ່ສະເໝີ, ເນື່ອງຈາກຄວາມຕຶງຄຽດຈະສົ່ງຜົນເສຍກັບສຸຂະພາບກາຍ, ພ້ອມທັງເຮັດໃຫ້ປະລິມານເລືອດ ແລະອົກຊີແຊນທີ່ໄປຫຼໍ່ລ້ຽງຮາກຜົມ ແລະໜັງຫົວຫຼຸດລົງ.

ທີ່ມາ: