• ລ້າງໜ້າແບບຜິດໆ ມີສິດເປັນສິວໄດ້

ໂດຍ: ແມວດຳ 20 ພະຈິກ 2018 (17.04 ນ.) Read : 155

ການລ້າງໜ້າໃຫ້ສະອາດ ເປັນສິ່ງທີ່ສຳຄັນບໍ່ໜ້ອຍໄປກວ່າການທາຄຣີມບຳລຸງຜິວ, ເພາະບັນຫາສິວເທິງໃບໜ້າອາດມີສາເຫດມາຈາກການລ້າງໜ້າແບບຜິດໆທີ່ຫຼາຍທ່ານອາດຈະຄິດບໍ່ເຖິງ, ດັ່ງນັ້ນ ລອງສັງເກດເບິ່ງວ່າທ່ານມີພຶດຕິກຳການລ້າງໜ້າແບບນີ້ບໍ?

1.ໃຊ້ນ້ຳອຸ່ນລ້າງໜ້າ, ເຖິງແມ່ນວ່າ ນ້ຳອຸ່ນຈະຊ່ວຍໃຫ້ຮູຂຸມຂົນເປີດ ແລະເຮັດໃຫ້ຜິວໜ້າສະອາດຂຶ້ນ ແຕ່ໃນຂະນະດຽວກັນມັນກໍເຮັດໃຫ້ຜິວໜ້າແຫ້ງເນື່ອງຈາກມັນໄດ້ລ້າງນ້ຳມັນເທິງໃບໜ້າທີ່ຊ່ວຍປົກປ້ອງຜິວໜ້າອອກໄປເປັນຈຳນວນຫຼາຍ, ເຮັດໃຫ້ຜິວອ່ອນແອ, ເກີດບັນຫາຕ່າງໆໄດ້ງ່າຍໆ.

2.ລ້າງໜ້າຫຼາຍເກີນໄປ, ຈະເຮັດໃຫ້ຜິວໜ້າແຫ້ງ ແລະຜະລິດນ້ຳມັນອອກມາຫຼາຍກວ່າເກົ່າ ແລະເຮັດໃຫ້ເກີດສິວເພີ່ມຂຶ້ນອີກ. ສຳລັບຄົນທີ່ເປັນສິວ ການລ້າງໜ້າເລື້ອຍໆກໍຈະເຮັດໃຫ້ຮູ້ສຶກຄັນຄາຍຍິ່ງຂຶ້ນ, ດັ່ງນັ້ນ ເຮົາຄວນລ້າງໜ້າພຽງແຕ່ 2 ຄັ້ງຕໍ່ມື້ເທົ່ານັ້ນ.

3.ລ້າງໜ້າທັນທີ ທີ່ອອກກຳລັງກາຍແລ້ວ, ຈະເຮັດໃຫ້ເຫື່ອທີ່ໄຫຼອອກມາ ຢຸດກະທັນຫັນ, ເຮັດໃຫ້ຮູຂຸມຂົນຫົດໂຕລົງໃນຂະນະທີ່ເຫື່ອ ແລະໄຂມັນຍັງໄຫຼອອກມາບໍ່ໝົດ, ເຮັດໃຫ້ມັນຝັງໃນຮູຂຸມຂົນກາຍເປັນສິວອຸດຕັນ.

4.ເຊັດໜ້າແຮງເກີນໄປ, ຈະຍິ່ງເປັນການກະຕຸ້ນໃຫ້ສິວລຸກລາມເພີ່ມຂຶ້ນ ແລະອາດເຮັດໃຫ້ເປັນສິວຜົດ, ສິວເກືອໄດ້. ນອກຈາກນີ້, ບໍ່ຄວນເອົາມືໄປສຳຜັດໜ້າຫຼາຍເກີນໄປເພາະອາດຈະເປັນການແຜ່ເຊື້ອສິວໃຫ້ລຸກລາມຫຼາຍຂຶ້ນ.

5.ລ້າງໜ້າໂດຍໃຊ້ຝັກບົວ, ນ້ຳທີ່ອອກມາຈາກຝັກບົວມີແຮງດັນທີ່ແຮງຈົນເຮັດໃຫ້ຄວາມມັນເທິງໃບໜ້າຖືກລ້າງອອກໄປຈົນໝົດ, ເຮັດໃຫ້ຮູຂຸມຂົນກວ້າງຂຶ້ນ.

6.ການລ້າງໜ້າດ້ວຍໂຟມທີ່ມີເມັດສະຄັບຜິວ ແລະໂຟມທີ່ມີສານ AHA, BHA, ເພາະການສະຄັບ ຫຼືຂັດໜ້າຈະເປັນການກະຕຸ້ນໃຫ້ເກີດສິວເພີ່ມຂຶ້ນ, ພ້ອມທັງເຮັດໃຫ້ສິວອັກເສບໜັກກວ່າເກົ່າ. 

7.ໃຊ້ໂທນເນີເຊັດໜ້າຫຼັງລ້າງໜ້າເປັນສິ່ງທີ່ບໍ່ຈຳເປັນ, ພຽງແຕ່ໃຊ້ Cleansing ເຊັດໜ້າກ່ອນລ້າງໜ້າກໍພຽງພໍແລ້ວ, ເນື່ອງຈາກໂທນເນີມັກຈະມີສ່ວນປະສົມຂອງ alcohol ແລະສານເຄມີອື່ນໆທີ່ເຮັດໃຫ້ໜ້າຂອງຄົນທີ່ເປັນສິວເກີດອາການຄັນຄາຍ. 

8.ໃຊ້ Cleansing ບໍ່ເໝາະກັບສະພາບຜິວ, ຄົນທີ່ເປັນສິວຄວນໃຊ້ Cleansing ແບບນໍ້າເພາະມັນຈະມີຄວາມບາງເບົາ, ບໍ່ມ່ວນສ່ວນປະສົມຂອງນ້ຳມັນ, ແຕ່ທັງນີ້ກໍເໝາະກັບຄົນທີ່ບໍ່ແຕ່ງໜ້າໜາຈົນເກີນໄປ. ຫຼັງຈາກເຊັດໜ້າດ້ວຍ Cleansing ແລ້ວກໍຄວນລ້າງໜ້າໃຫ້ສະອາດນຳເດີ! 

ທີ່ມາ: