• ດື່ມເບຍແບບໃດບໍ່ໃຫ້ທ້ອງໃຫຍ່

ໂດຍ: ແມວດຳ 23 ກຸມພາ 2018 (07.44 ນ.) Read : 276

ມີຫຼາຍທ່ານມັກຈະເພີດເພີນກັບການສັງສັນຈົນລືມຄິດໄປວ່າການດື່ມເບຍທີ່ມີປະລິມານຂອງແຄລໍລີສູງຫຼາຍເປັນສິ່ງໜຶ່ງທີ່ເຮັດໃຫ້ທ່ານຕຸ້ຍ ແລະທ້ອງໃຫຍ່ຂຶ້ນ. ເຊິ່ງໃນເບຍ 1 ກຣາມຈະມີປະລິມານແຄລໍລີເຖິງ 7 ກິໂລແຄລໍລີ. ແຕ່ຖ້າເຮົາຮູ້ຈັກວິທີດື່ມເບຍຢ່າງຖືກຕ້ອງບັນຫາຄວາມອ້ວນ, ທ້ອງໃຫຍ່ກໍຈະໝົດໄປ.

1.ຢ່າໃຫ້ທ້ອງວ່າງ:ຫຼາຍຄົນອາດເຄີຍໄດ້ຍິນວ່າ ກິນອາຫານກ່ອນດື່ມເບຍຈະບໍ່ເຮັດໃຫ້ເມົາໄວ, ແຕ່ໃນຄວາມເປັນຈິງແລ້ວມັນຈະເຮັດໃຫ້ເຮົາດື່ມເບຍໄດ້ໜ້ອຍລົງ. ໂດຍສະເພາະການກິນອາຫານປະເພດທີ່ມີໂປຕີນເຊັ່ນ: ຊີ້ນສັດ. 

2.ບໍ່ດື່ມເບຍປະສົມນ້ຳຫວານ:ເຖິງວ່າການດື່ມເບຍທີ່ປະສົມນ້ຳໝາກໄມ້, ນໍ້າອັດລົມຈະເຮັດໃຫ້ດື່ມໄດ້ງ່າຍ ແຕ່ໃນຂະນະດຽວກັນກໍເຮັດໃຫ້ທ່ານອ້ວນຂຶ້ນໄດ້ຢ່າງງ່າຍດາຍເຊັ່ນກັນ, ເພາະວ່ານ້ຳເບຍມີປະລິມານແຄລໍລີທີ່ສູງເມື່ອມາປະສົມກັບນ້ຳອັດລົມທີ່ມີປະລິມານນ້ຳຕານທຽມສູງຈຶ່ງເຮັດໃຫ້ເຮົາໄດ້ຮັບທາດນ້ຳຕານເຂົ້າສູ່ຮ່າງກາຍແບບບໍ່ຮູ້ຕົວ.

3.ຫຼີກລ່ຽງການກິນອາຫານຫຼັງຈາກດື່ມເບຍ:ບາງຄົນຫຼັງຈາກສັງສັນແລ້ວກໍມີອາການຫິວໃນຕອນເດິກ, ແຕ່ອາຫານໃນຕອນເດິກນັ້ນຈະຍິ່ງເພີ່ມປະລິມານແຄລໍລີໃຫ້ຮ່າງກາຍຫຼາຍເກີນຄວາມຈໍາເປັນເຮັດໃຫ້ເຮົາອ້ວນຂຶ້ນ, ແຕ່ຖ້າຫິວຫຼາຍຜູ້ຂຽນແນະນຳໃຫ້ກິນອາຫານທີ່ໃຫ້ພະລັງງານຕ່ຳ ແລະໂປຕີນທີ່ມີໄຂມັນໜ້ອຍເຊັ່ນ: ຜັກ ຫຼືປາ, ສິ່ງທີ່ສຳຄັນຄວນຫຼີກລ່ຽງອາຫານປະເພດແປ້ງ.

4.ໝັ່ນອອກກຳລັງກາຍ:ທຸກໆຄັ້ງກ່ອນອອກໄປດື່ມເບຍຄວນອອກກຳລັງກາຍ ເພື່ອເຜົາຜານປະລິມານພະລັງງານໃນຮ່າງກາຍທີ່ມີຢູ່ກ່ອນທີ່ຈະເຕີມພະລັງງານເຂົ້າໄປອີກ. ນອກຈາກນີ້ ເມື່ອດື່ມເບຍແລ້ວມື້ຕໍ່ມາກໍຄວນອອກກຳລັງກາຍດ້ວຍການແລ່ນ ຫຼືອອກກຳລັງກາຍໃນທ່າຄາດິໂອຈະເຮັດໃຫ້ບັນຫາທ້ອງໃຫຍ່ໆບໍ່ມາກວນໃຈທ່ານອີກ.

5.ການດື່ມວາຍເປັນທາງເລືອກທີ່ດີ:ເຖິງວ່າວາຍຈະມີສ່ວນປະສົມຂອງທາດເຫຼົ້າແຕ່ກໍມີຄຸນປະໂຫຍດຫຼາຍຢ່າງເຊັ່ນ: ວາຍແດງຊ່ວຍປ້ອງກັນໂລກຫົວໃຈ, ບໍ່ໃຫ້ເລືອກກ້າມເປັນກ້ອນ, ນອກຈາກນີ້ ຍັງມີການວິໄຈຄົ້ນພົບວ່າ: ການດື່ມວາຍມື້ລະແກ້ວຈະຊ່ວຍໃຫ້ມີສຸຂະພາບດີຂຶ້ນອີກດ້ວຍ.

ບໍ່ວ່າຈະເປັນວາຍ ຫຼືເບຍກໍດີມັນສາມາດໃຫ້ທັງປະໂຫຍດ ແລະໂທດໃນເວລາດຽວກັນ, ເຊິ່ງຂຶ້ນຢູ່ກັບຕົວທ່ານວ່າຈະດື່ມໜ້ອຍ ຫຼືຫຼາຍ ແລະສຳລັບທ່ານໃດທີ່ເປັນນັກດື່ມກໍຢ່າລືມນຳເອົາເທັກນິກຕ່າງໆດ້ານເທິງໄປນຳໃຊ້ເພື່ອໃຫ້ການດື່ມເບຍຂອງທ່ານປາສະຈາກຄວາມຕຸ້ຍ ແລະທ້ອງໃຫຍ່ໆ.


ທີ່ມາ: